Mwaren Koht iei Siohwa oh e kin wehwehki “E Kahrehiong en Wiahla.” Siohwa iei Koht wasa lapalahpie, oh ih me ketin kapikada soahng koaros. E ketin sapwellimanki manaman en wia soahng sohte lipilipil me e ketin kupwurki.

Ni lokaiahn Ipru, mwaren Koht ntingdi ni mesen nting pahieu. Ni lokaiahn wai, mesen nting pwukat iei YHWH de JHVH. Mwaren Koht pwarada kereniong pak 7,000 nan Paipel ni eh tepin ntingdi ni lokaiahn Ipru. Nan sampah pwon, mwomwen aramas akan ar kin nda mwar wet Siohwa kin wekpeseng, re kin doadoahngki ngohr me aramas tohto kin doadoahngki ni pein arail lokaia.

▸ Irelaud 1, par. 15

Audepen Paipel pwilisang rehn Koht, ahpw e ketin doadoahngki ohl akan en ntingihada Paipel. Met duwehte kaunen doadoahk men me ndahng nah sekteri en ntingihada ehu kisinlikou me audaudki ahn kauno madamadau kan. Koht ketin doadoahngki sapwellime manaman pwehn ketin kaweid sounnting en Paipel kan en ntingihada sapwellime madamadau kan. Sapwellimen Koht manaman kaweid irail ni soangsoangen ahl akan, ekei pak e kin kahrehiong irail en kilang kaudiahl kan de ouraman kan me re pahn ntingihedi.

▸ Irelaud 2, par. 5

Mepwukat wia padahk kei nan Paipel me kin kawehwehda dahme mehlel ahnsou koaros. Karasepe, ire  mehlel duwen “werekiong aramas suwed kan e kin kauwehla tiahk mwahu” kin padahkihong kitail me kitail kin mwekidki en wia me mwahu de me suwed sang rehn aramas akan me kitail kin werekiong. (1 Korint 15:33) Oh ire mehlel duwen “mehkot me aramas pahn padokedi, ihme e pahn dolung” padahkihong kitail me kitail sohte kak pitsang imwilahn atail wiewia kan.​—Kalesia 6:7.

▸ Irelaud 2, par. 12

Met iei rohng ehu sang rehn Koht. E kak wia kawehwe ehu duwen kupwuren Koht, padahk duwen dahme konehng, kehkehlik ehu, de kopwung ehu. E pil kak wia rohng ehu duwen dahme pahn wiawi ni ahnsou kohkohdo. Mie kokohp tohto nan Paipel me pweidahier.

▸ Irelaud 2, par. 13

Sises me ketin kapwaiada kokohp en Paipel tohto duwen Mesaia. Menlau kilang koakon “ Kokohp kan Duwen Mesaiao.”

▸ Irelaud 2, par. 17, nting tikitik kan me mi pah

Siohwa ketin kapikada sampah pwehn wia wasahn kousoan paradais ehu ong aramas akan me poakohng ih. Sapwellime koasoandi sohte wekila. Ni ahnsou keren, Koht pahn ketikihsang soahng suwed kan oh ketikihong sapwellime aramas akan mour soutuk.

▸ Irelaud 3, par. 1

Sehdan iei tohnlengo me tapiada uhwong Koht. E adaneki Sehdan, me wehwehki “Sounpelian,” pwehki e uhwongada Siohwa. E pil adaneki Tepil, me wehwehki “Sounkaraun likamw.” Ahd wet kohwohng ih pwehki e kin kinehda likamw duwen Koht oh pitih aramas.

▸ Irelaud 3, par. 4

Siohwa ketin kapikada tohnleng kan mahsie mwohn eh ketin kapikada sampah. Irail kepikipikda pwehn mi nanleng. Mie tohnleng tohtohsang sapw (100 million). (Kaudiahl 5:11) Mie adarail kan oh arail irair kan wekpeseng, oh tohnleng loalopwoat kan ni aktikitik sohte men aramas akan en kaudokiong irail. Mie arail pwukoa kan me wekpeseng oh re kin alehdi soangsoangen doadoahk kan. Iei ekei doadoahk kan me duwehte papah mwohn mwoalen Siohwa, wahseli sapwellime rohng kan, pere oh kaweid sapwellime ladu kan nin sampah, wahdo sapwellime kadeik, oh utung doadoahk en kalohk. (Melkahka 34:7; Kaudiahl 14:6; 22:8, 9) Ni ahnsou kohkohdo, irail pahn iang Sises nan mahwen en Armakedon.​—Kaudiahl 16:14, 16; 19:14, 15.

▸ Irelaud 3, par. 5; Irelaud 10, par. 1

Dihp iei soahng sohte lipilipil me kitail kin pehm, medewe, de wia me kin uhwongada Siohwa de kupwure. Pwehki dihp kin kauwehla atail nanpwungmwahu rehn Koht, e ketikihong kitail kosonned kan, kaweid kan oh ire mehlel kan me kin sewese kitail en soikala  nsenki wiahda dihp. Nin tapio, Siohwa ketin kapikada soahng koaros ni unsek, ahpw ni ahnsou me Adam oh Ihp pilada en sapeikiong Siohwa, ira dipada oh solahr unsek. Ira mahla oh mehla, oh pwehki kitail sohsohki dihp sang Adam, kitail pil kin mahla oh mehla.

▸ Irelaud 3, par. 7; Irelaud 5, par. 3

Met iei sapwellimen Koht mahwen me pahn kauwehla ahn Sehdan sampah oh soahng suwed koaros.

▸ Irelaud 3, par. 13; Irelaud 8, par. 18

Wehin Koht iei koperment ehu me Siohwa ketin kauwada nanleng. Sises Krais ketin kakaun nin duwen Nanmwarki en Wehio. Ni ahnsou kohkohdo, Siohwa pahn ketin doadoahngki Wehi wet pwehn ketikihsang soahng suwed koaros. Wehin Koht pahn kaunda sampah.

▸ Irelaud 3, par. 14

Koht ketin kapikada Sises mwohn soahng teikan koaros. Siohwa ketin poaronehdo Sises nin sampah pwehn pwoukihla aramas koaruhsie. Mwurin Sises eh kamakamala, Siohwa ketin kaiasada ih. Ahnsouwet Sises ketin kakaun nanleng nin duwen Nanmwarki en Wehin Koht.

▸ Irelaud 4, par. 2

Paipel kohpada, de kasalehda mwohn eh wiawi, iahd me Mesaia pahn pwarada. Met pahn wiawi ni imwin ahnsou ehu me adaneki wihk 69, me tepida nan pahr 455 Mwohn Krais oh imwisekla nan pahr 29.

 Ia duwen atail ese me e imwisekla nan pahr 29? Wihk 69 tepida nan pahr 455 Mwohn Krais ni ahnsou me Nehmaia leledo Serusalem oh tapiada onehda sapahl kahnimwo. (Daniel 9:25, NW; Nehmaia 2:1, 5-8) Ni atail kin rong lepin lokaia “wihk,” kitail kin kalapw medewe rahn 7. “Wihk” nan kokohp wet sohte kin wehwehki rahn isuh ahpw wihk en sounpar isuh. Met pahrekiong mwomwen wadawad en rahn akan nan kokohp en Paipel, nin duwen  met, “rahn ehu pahn wehwehki sounpar ehu.” (Nempe 14:34; Esekiel 4:6) Met wehwehki me ehuehu wihk kin reireiki sounpar isuh oh wihk 69 reireiki sounpar 483 (69 x 7). Ma kitail wadek sounpar 483 tepisang nan pahr 455 Mwohn Krais, e pahn lella nan pahr 29. Iei pahro met me Sises ketin papidaisla oh wiahla Mesaia!​—Luk 3:1, 2, 21, 22.

Kokohpo pil kohpada ehu wihk tohrohr, me wehwehki pil ehu sounpar isuh. Erein ahnsou wet, nan pahr 33, Mesaiao pahn kamakamala, oh tepidahsang nan pahr 36, rongamwahu en Wehin Koht pahn lohkseli ong wehi kan koaros ah kaidehn mehn Suhs kante.​—Daniel 9:24-27.

▸ Irelaud 4, par. 7

Paipel padahngki me Siohwa Koht iei Sounkapikadao oh e ketin kapikada Sises mwohn mehkoaros. (Kolose 1:15, 16) Sises kaidehn Koht Wasa Lapalahpie. Sohte pak ehu e mahsanih me e pahrekiong Koht. Ni mehlel, e mahsanih: “Sahmo . . . me lapalapasang ie.” (Sohn 14:28; 1 Korint 15:28) Ahpw ekei pelien lamalam kan kin padahngki me Koht wiawihkihda meh silimen, Koht Sahm, Koht Nah, Koht Ngehn Sarawi. Met padahk likamw ehu.

“Ngehn sarawi” iei sapwellimen Koht manaman, sapwellime manaman me soh sansal me e kin ketin doadoahngki pwehn ketin kapwaiada kupwure. Mewet kaidehn emen ngehn de aramas. Karasepe, tepin Kristian akan “direkihla Ngehn Sarawi” oh Siohwa mahsanih: “I pahn kamwerehdi Ngeni pohn aramas koaros.”—Wiewia 2:1-4, 17.

▸ Irelaud 4, par. 12; Irelaud 15, par. 17

Ni ahnsou me Kristian mehlel kan kin kaudokiong Koht, re sohte kin doadoahngki lohpwu. Dahme kahrehda?

1. Ahnsou reirei lohpwu kin wie kadoadoahk nan kaudok likamw. Mahso lohpwu kin kadoadoahk nan soangen kaudok ong kepikipik kan oh tiahk en wia nsenen pwopwoud nan kaudok me kaidehn Kristian. Erein sounpar 300 mwurin pwoulahn Sises, Kristian kan sohte kin doadoahngki lohpwu nan arail kaudok. Ahpw, Kaunen Rom Constantine wiahda me lohpwu en wia kilelepen Kristian. Kilel en lohpwu kin kadoadoahk pwehn song wiahda pelien lamalam en Kristian en ndandla. Ahpw lohpwuo sohte douluhl kin pidada Sises Krais. Ehu dikseneri en Kadolik kawehwehda: “Lohpwu miehier mwohn Kristian akan oh pil wia tiahk en irail me sohte iang Kristian.”​—New Catholic Encyclopedia.

2. Sises sohte ketin pwoula pohn lohpwu. Lepin lokaiahn Krihk me kawehwehdi “lohpwu” uhdahn wehwehki “tuhke pwoat me poadada” de “tuhke pwoat.” Ehu pwuhk kawehwehda: “Sohte wasa nan Paipel nan pali nting en Krihk [Kadehde Kapw] me koasoia duwen tuhke rioapwoat.” (The Companion Bible) Sises ketin pwoula pohn tuhke pwoat me poadada.

3. Siohwa sohte kupwurki kitail en doadoahngki sansal kan de kilel kan nan atail kaudok.​—Eksodus 20:4, 5; 1 Korint 10:14.

▸ Irelaud 5, par. 12

Sises ketin kehkehlingkihong sapwellime tohnpadahk ko en wia Katamanpen eh pwoula. Irail kin wia met ehuehu pahr ni Nisan 14, me inennehte rahn me mehn Israel kan kin kasarawi Pahsohpao. Koaros me iang towehda Katamano kin pahs pilawao oh waino me wia wiliepen kahlepen Sises oh sapwellime nta. Irail akan me pahn iang Sises kakaun nanleng kin kang pilawao oh nim waino. Irail akan me ahneki koapworopwor en mour kohkohlahte nin sampah kin ni wahu iang towehda Katamano ahpw irail sohte kin kang pilawao de nim waino.

▸ Irelaud 5, par. 21

Lepin lokaiahn Ipru neʹphesh oh lokaiahn Krihk psy·kheʹ nan Paipel kin pidada soahng siluh pwukat (1) aramas emen, (2) mahn emen, (3) mour en aramas emen de mahn emen. Iet ekei karasepe kan:

• Aramas emen. Paipel mahsanih me ni mwehin Noha “me welimen [lokaiahn Krihk psy·kheʹ] . . . pitla.” (1 Piter 3:20) Wasaht lepin lokaia psy·kheʹ kin wehwehki aramas, Noha, eh pwoud, neira pwutak silimen, oh arail pwoud kan.

• Mahn emen. “Koht pil ketin mahsanih, ‘Soahng koaros me kin mie ar mour [lokaiahn Ipru neʹphesh] en audehla pihl akan, oh menpihr kan [lokaiahn Ipru neʹphesh] en audehla pahnlahng.’ Koht pil ketin mahsanih, ‘Pwelen sampah en kapwarehda soangen mahn mahnd oh lawalo koaros [lokaiahn Ipru neʹphesh] oh soangen mahn laud oh tikitik koaros’ [lokaiahn Ipru neʹphesh]​—eri, e ahpw pweida.”​—Senesis 1:20, 24.

•  Mour en aramas emen de mahn emen. Siohwa ketin mahsanihong Moses: “Irail koaros me men kemeiukala [lokaiahn Ipru “kemehla omw neʹphesh”] re melahr.” (Eksodus 4:19) Ni Sises eh ketiket sampah, e ketin mahsanih: “Ngehi me Silepen sihpw mwahu. Silepen sihpw mwahu kin tounmeteikihla eh mour [lokaiahn Krihk psy·kheʹ] pwehki nah sihpw akan.”​—Sohn 10:11.

  Lepin lokaia neʹphesh de psy·kheʹ pil kak kadoadoahk pwehn kawehwehda ineng de ineng en men mwenge me aramas de mahn emen ahneki. Aramas mehla men de paliwar ehu me mehla pil kak wehwehki neʹphesh de psy·kheʹ.​—Nempe 6:6; Lepin Padahk 23:2; Aiseia 56:11; Akkai 2:13.

▸ Irelaud 6, par. 5; Irelaud 15, par. 17

Lepin lokaiahn Ipru ruʹach oh lokaiahn Krihk pneuʹma kin kalapw kawehwehdi ong “ngehn” nan Paipel en mahsen en Pohnpei. Lepin lokaiahn Ipru oh Krihk pwukat kak wehwehki soahng tohto ahpw ahnsou koaros lepin lokaia pwukat kin wehwehkiong mehkot me soh sansal ong aramas, duwehte kisinieng de ahng en esingek en aramas oh mahn akan. Lepin lokaia pwukat pil kin wehwehkiong ngehn kan oh sapwellimen Koht manaman. Paipel sohte kin padahngki me mie mehkot me kin wie momour mwurin paliwar eh kin mehla.​—Eksodus 35:31; Sohp 34:14, 15; Madiu 12:43; Luk 11:13.

▸ Irelaud 6, par. 5; Irelaud 15, par. 17

Lepin lokaiahn Krihk ‘Kiehna’ kin kawehwehdi “ehl” nan Paipel en mahsen en Pohnpei. Kiehna iei eden wahu ehu me karanih Serusalem wasa me kihd kan kin isihsla oh uhdahn sohrala. Sohte mehn kadehde me ni mwehin Sises, mahn akan de aramas akan me wie momourte kin lokolok de isihsla nan wahu wet. Eri Kiehna kaidehn kilelepen wasa ehu me soh sansal, me aramas melahr akan kin isihs oh lokolok kohkohlahte. Ni ahnsou me Sises kin mahsanih duwen irail ako me lekdekiong nan Kiehna, e kin mahmahsanih duwen aramas akan me pahn kasohrala douluhl.​—Madiu 5:22; 10:28.

▸ Irelaud 7, par. 20

Ih kapakap wet me Sises ketin wia ni ahnsou me e ketin padahkihong sapwellime tohnpadahk kan ia duwen arail pahn kapakap. E pil adaneki kapakap en Samat. Karasepe, Sises ketin padahkihong kitail en kapakap ni ahl wet:

• “Mwaromwi en sarawihla”

  Kitail patohwan kapakapki Siohwa en ketikihsang soangen likamw koaros me wiawihong mware. Kitail wia met pwehki koaros me mi nanleng oh nin sampah en kapinga oh wauneki mwaren Koht.

• “Wehiomwi en pweida”

  Kitail kin kapakapki sapwellimen Koht koperment en kauwehla ahn Sehdan sampah suwed wet, en kaunda sampah pwon, oh en wiahiong sampah en wiahla paradais ehu.

• “Kupwuromwi en kin wiawi nin sampah”

  Kitail kin kapakapki kupwuren Koht ong sampah en pweida pwe irail me peik kan, aramas unsek kan en kak  mour kohkohlahte nan Paradais, duwehte me Siohwa ketin kupwurki ni ahnsou me aramas akan tepin kepikipikda.

▸ Irelaud 8, par. 2

Siohwa ketikihda pweinen pweipwei sapahlo pwehn kapitala tohnsampah sang dihp oh mehla. Mewet iei pweipwei me anahn pwehn pwainsapahldo mour unsek en aramas me tepin ohlo, Adam, kasalongehlahr oh en kamwahwihala nanpwungen aramas rehn Siohwa. Koht ketin poaronehdo Sises nin sampah pwe en kak ketin pwoukihla aramas dipan koaros. Pwehki pwoulahn Sises, aramas koaros ahneki koapworopwor en mour kohkohlahte oh unsekla.

▸ Irelaud 8, par. 21; Irelaud 9, par. 13

Kokohp me mi nan Daniel irelaud 4 padahkihong kitail me Koht pahn ketin kauwada sapwellime Wehio nan pahr 1914.

Kokohpo: Siohwa ketikihong Nanmwarki Nepukadnesar kokohp ouraman ehu duwen lapalahn tuhke pwoat me paldi. Nan ouramano, selmete prons ehu pirapiriong ni kahlep en tuhkeo pwehn dehr kekeirda erein “sounpar isuh,” de tepin ntingdahn Paipel koasoia “ahnsou isuh.” Mwurin mwo, tuhkeo pahn pwurehng keirda.​—Daniel 4:1, 10-16.

Ia wehwehn kokohpo ong kitail: Tuhkeo kin wehwehki sapwellimen Koht kaunda. Erein sounpar tohto, Siohwa kin ketin doadoahngki nanmwarki kan nan Serusalem  en kaunda wehin Israel. (1 Kronikel 29:23) Ahpw nanmwarki ko salelepekla, oh arail kaunda imwisekla. Serusalem ohla nan pahr 607 Mwohn Krais. Ahnsowo iei tepidahn “ahnsou isuh.” (2 Nanmwarki 25:1, 8-10; Esekiel 21:25-27) Ni Sises eh ketin mahsanih, “Serusalem pahn tiatipeseng pahn nehn me rotorot akan, lao ar ahnsou pahn imwisekla,” e mahmahsanih duwen “ahnsou isuh” wet. (Luk 21:24) Eri, “ahnsou isuh” ko sohte imwisekla erein Sises eh ketiket sampah. Siohwa ketin inoukihda me e pahn ketin idihada Nanmwarki men ni imwin “ahnsou isuh.” Kaundahn Nanmwarki kapw menet, Sises, pahn ketin wahdo kapai laud ong sapwellimen Koht aramas akan koaros nin sampah, kohkohlahte.​—Luk 1:30-33.

Uwen reirei en “ahnsou isuh”: “Ahnsou isuh” ko reireiki sounpar 2,520. Ma kitail tepida wadek sounpar 2,520 sang pahr 607 Mwohn Krais, kitail pahn lel pahr 1914. Ih ahnsowo me Siohwa ketin kasapwilda Sises me Mesaiao en wia Nanmwarki en Wehin Koht nanleng.

Ia duwen atail alehdi kapatdahn nempe 2,520? Paipel mahsanih me “sounpar siluh elep” de ahnsou siluh elep kin pahrekiong rahn 1,260. (Kaudiahl 12:6, 14) Eri “ahnsou isuh” ko kin pak riau reireisang, de rahn 2,520. Rahn 2,520 kin pahrekiong sounpar 2,520 pwehki nan kokohp “rahn ehu pahn wehwehki sounpar ehu.”​—Nempe 14:34; Esekiel 4:6.

▸ Irelaud 8, par. 23

Lepin lokaia ong “tohnleng lapalap” kin wehwehki “kaun en tohnleng kan.” Paipel kin koasoia emente tohnleng lapalap, oh mware iei Maikel.​—Daniel 12:1; Sud 9.

Maikel iei Kaun en sapwellimen Koht karis en tohnleng lelepek kan. Kaudiahl 12:7 mahsanih: “Maikel oh ienge tohnleng kan mahweniong drakono . . . oh ienge kan.” Pwuhken Kaudiahl mahsanih me Kaun en sapwellimen Koht karis kan iei Sises, eri Maikel iei pil ehu mwaren Sises.​—Kaudiahl 19:14-16.

▸ Irelaud 9, par. 4

Imwin rahn akan wehwehki erein ahnsou ieu me mwekid laud kan pahn wiawi nin sampah mwohnte Wehin Koht kasohrehla ahn Sehdan sampah. “Imwin sampah” oh “ketidohn Nein-Aramas” pil kin kadoadoahk nan kokohp en Paipel oh lepin lokaia pwukat pil kin wehwehki ahnsoukohte. (Madiu 24:3, 27, 37) “Imwin rahn akan” tepida ni ahnsou me Wehin Koht tepida kakaun nanleng nan pahr 1914 oh pahn imwisekla ni ahnsou me ahn Sehdan sampah pahn kasohrala ni Armakedon.​—2 Timoty 3:1; 2 Piter 3:3.

▸ Irelaud 9, par. 5

Kaiasada kin wehwehki ahnsou me Koht ketin kapwurehdo aramas emen me melahr ong mour. Paipel kin kasalehda kaiasada duwau me wiawi. Me kaiasada aramas akan iei Elaisa, Elisa, Sises, Piter, oh Pohl. Sapwellimen Koht manaman kelehpw me kahrehda manaman kapwuriamwei pwukat en kak wiawi. Siohwa  ketin inoukihda en kaiasada koaros, “me mwahu oh suwed” ong mour nin sampah. (Wiewia 24:15) Paipel pil kin koasoia duwen iasadahng nanleng. Iasada wet kin wiawi ni irail akan me Koht ketin pilada de keiehdi ar kin iasada pwehn mour nanleng rehn Sises.​—Sohn 5:28, 29; 11:25; Pilipai 3:11; Kaudiahl 20:5, 6.

▸ Irelaud 9, par. 13

Katieni de wunahni iei wiewia sapwung en song ehuiong ngehn akan, de doadoahngki emen me duwehte sounwunahni, sounkapwour eni, de sounkosetipw en koasoiong ngehn akan. Aramas akan me kin wia wunahni kin wia met pwehki re kamehlele padahk likamw me dene mie ngenen aramas me kin wie momour mwurin mehla oh wiahla eni kehlail men. Ngehn suwed kan pil kin song en kamwakid aramas akan en sapeikiong Koht. Kasawih oh kawehwe usu kan pwehn ese dahme pahn wiawi ni ahnsou kohkohdo, kosetipw, akmanaman, wunahni, kihlenwo, doadoahngki manaman en ngehn suwed kan pil kin wia kisehn katieni. Pwuhk tohto kan, pil iangahki makasihn kan, wiepen kasawih usu kan oh ndahng emen dahme pahn pweida reh nan ehuehu sounpwong, kasdo kan, kilel kan oh pil koul kan kin wiahki me wunahni, akmanaman, doadoahngki manaman en ngehn suwed kin mwomwen kaperen oh sohte keper. Tiahk en mehla kan, duwehte meirong ong me mehla, kasarawi en mehla, kataman en mehla kan, ekei tiahk en pehdinpwong pil kin pidada ehuiong ngehn suwed kan. Aramas kalapw doadoahngki wini kan ni ar kin song doadoahngki ahn ngehn suwed kan ar manaman.​—Kalesia 5:20; Kaudiahl 21:8.

▸ Irelaud 10, par. 10; Irelaud 16, par. 4

Siohwa iei Koht Wasa Lapalahpie, oh ih me ketin kapikada audepen lahng oh sampah pwon. (Kaudiahl 15:3) Ihme kahrehda ih me ketin sapwellimanki soahng koaros oh sapwellimanki pwuhng en kaunda, de manaman unsek, pwehn kaunda sapwellime kepikipik kan koaros. (Melkahka 24:1; Aiseia 40:21-23; Kaudiahl 4:11) E ketin wiahda kosonned kan ong soahng koaros me e ketin kapikada. Siohwa pil ketin sapwellimanki manaman en idihada meteikan en wia kaun kei. Kitail kin utung sapwellimen Koht pwuhng en kaunda ni atail kin poakohng ih oh peikiong ih.​—1 Kronikel 29:11.

▸ Irelaud 11, par. 10

Kauwehla liseian kin wiawi pwehn kemehla seri men me saikinte ipwidi. Kaidehn sapwungala ehu me wiawi de ohla pwehki ihme kin wiawihong paliwar en aramas. Ni tepin seri men eh ahpada, e sohte ihte wia kisehn paliwar en eh nohno. Serio wia emen aramas tohrohr.

▸ Irelaud 13, par. 5

Met iei wiepen palien wini me kin doakoahlong nan paliwar en aramas nta de ehu soahng pahieu kan me wiahda nta me kohsang emen tohrohr de nta me e pein nekidala. Soahng pahieu kan me wiahda nta iei plasma, red cell kan, white cell kan, oh platelet kan.

▸ Irelaud 13, par. 13

Nan Paipel, lepin lokaia ong “peneu” sohte kin wehwehkihte kalokolok. Ahnsou me peneu kowohng kitail, kitail kin alehdi kaweid, kasukuhl, oh kopwung. Siohwa sohte kin ketin lemei ong irail akan me e kin ketin panawih. (Lepin Padahk 4:1, 2) Siohwa ketikihda mehn kahlemeng kaselel ong pahpa oh nohno kan. Peneu me e ketikihda kin uhdahn katapan me kahrehda aramas kakete perenki ale peneu. (Lepin Padahk 12:1) Siohwa ketin poakohng sapwellime aramas akan, oh e kin ketin kaiahne irail. E kin ketikihong irail kaweid me kin kapwungala madamadau sapwung kan oh met kin sewese irail en esehla medewe oh mwekid ni ahl me pahn kin kaperenda ih. Ong pahpa nohno kan, peneu kin iangahki sewese neirail seri kan en wehwehki dahme kahrehda irail anahne peik. E pil kin wehwehki en padahkihong irail en poakohng Siohwa oh pil sapwellime Mahsen, Paipel, oh ren wehwehki kaweid kan oh ire mehlel kan nan Paipel.

▸ Irelaud 14, par. 13

Aramas akan sohte kak kilang ngehn suwed kan oh ar manaman kehlailasang aramas. Ngehn suwed kan iei irail tohnleng suwed kan. Irail suwedla ni ahnsou me re wiahkinirailla imwintihti en Koht ni arail sapeikiong ih. (Senesis 6:2; Sud 6) Irail iangala uhwong me Sehdan wiahda ong Siohwa.​—Deuderonomi 32:17; Luk 8:30; Wiewia 16:16; Seims 2:19.

▸ Irelaud 16, par. 4