KERENIONG sounpar 40 mwohn pahr 1914, tohnsukuhl en Paipel kan lohkidahr me mie soahng kesempwal kan me pahn pwarada nan pahro. Soahng dah kan me pahn wiawi? Mehn kadehde dah kin kasalehda me 1914 wia pahr kesempwal ehu?

Nan pwuhken Luk 21:24 (NW) Sises mahsanih: “Wehi kan pahn tiakpeseng Serusalem lao ahnsou me kileldier ong wehi kan pahn imwisekla.” Mahso, Serusalem kin wia poahsoan kaun en wehin Suhs me iei mwoalen nanmwarki kan me kohsang kadaudok en Nanmwarki Depit. (Melkahka 48:1, 2) Nanmwarki pwukat kin weksang kaunen wehi teikan. Irail kin kaunda nan “mwoahl me KAUN-O ketin kauwada,” nin duwen wiliepen Siohwa Koht. (1 Kronikel 29:23) Kahrehda Serusalem kin wia kilelepen sapwellimen Siohwa kaunda.

Ia duwen oh iahd me “wehin kan” tepida “tiakpeseng” kaundahn Koht? Met wiawi nan pahr 607 mwohn Krais ahnsou me Serusalem lohdi pahn mehn Papilon akan. Solahr me kin ketidi pohn ‘mwoahl me Siohwa ketin kauwadao’ oh solahr kaundahn nanmwarki kan sang ni kadaudok en Depit. (2 Nanmwarki 25:1-26) Eri, ia duwe, wehi kan pahn kin “tiakpeseng” kaundahn Koht kohkohlahte? Soh, pwehki tohnleng Kapriel mahsanihki duwen Sises me “Koht pahn ketin kasapwilada en nanmwarki duwehte seme Depit.” (Luk 1:32, 33)  Kahrehda ar kin “tiakpeseng” kaundahn Koht pahn imwisekla ni ahnsou me Sises ketin wiahla Nanmwarki.

Iahd me wiewia kesempwal wet pahn pweida? Sises ketin kasalehda me wehi kan de mehn liki kan pahn kakaun erein ahnsou ehu me kileldier. Dahme ntingdi nan Daniel irelaud 4 kin kihda ire kesempwal kan me pahn sewese kapatahda uwen reirei en ahnsowo. Wasaht mahsanih duwen kokohp ehu me Nanmwarki Nepukadnesar en Papilon ouramaniada. E kilangada lapalahn tuhke pwoat me paldi. Kahlap en tuhkeo sohte kak pwurehng wosada pwe e pirapirkipene selmete oh prons. E pahn pirapirepene erein “sounpar isuh.”​—Daniel 4:10-16.

Nan Paipel, ekei pak tuhke kan kin karasahiong kaunda. (Esekiel 17:22-24; 31:2-5) Kahrehda lopdi en tuhkeo kin karasahda ia duwen sapwellimen Koht kaunda, me nanmwarki  kan nan Serusalem kin wia wiliepe, eh pahn lopla. Ahpw, ouraman wet pil kasalehda me ahn ‘wehi kan ar kin tiakpeseng Serusalem’ pahn ongete lepin ahnsou ehu, ahnsou ehu me pahn reireiki “sounpar isuh.” Met kaidehn uhdahn sounpar isuh ahpw e wia karasaras ehu. Ia uwen reirei en ahnsou kiset?

Kaudiahl 12:6, 14 kin kasalehda me sounpar siluh elep nan kokohp wet kin pahrekiong “rahn kid riepwiki weneisek.” Eri “sounpar isuh” nan kokohp wet kin pak riau reirei sang, oh kin pahrekiong rahn 2,520. Ahpw, rahn 2,520 mwurin ohlahn Serusalem, wehin liki kan saikinte uhdihsang arail kin ‘tiakidi’ kaundahn Koht. Kahrehda, e sansal mwahu me kokohp wet dokedoke ahnsou ehu me reirei sang met. Nempe 14:34 oh Esekiel 4:6 kin kasalehda me “rahn ehu pahn wehwehki sounpar ehu.” Kahrehda “sounpar isuh” en kokohp wet pahn reireiki sounpar 2,520.

Sounpar 2,520 wet tepida sang nan October en pahr 607 mwohn Krais ni ahnsou me Serusalem lohdi pahn mehn Papilon kan oh nanmwarki me kohsang kadaudok en Depit sepwildihsang mwoalen nanmwarki. Sounpar 2,520 wet imwisekla nan October en pahr 1914. Ni ahnsowo, “ahnsou me kileldier ong wehi kan” imwiseklahr, oh Koht kasapwiladahngehr Sises Krais en wiahla Nanmwarki nanleng. *​—Melkahka 2:1-6; Daniel 7:13, 14.

Sises ketin kohpadahr me soangen wiewia kapwuriamwei kan duwehte mahwen, lehk lapalap, rerrer en sahpw, soumwahu lusulus laud kan pahn pwarada ni ahnsou me e pahn ketin wiahla Nanmwarki. (Madiu 24:3-8; Luk 21:11) Soangen wiewia pwukat kin wia mehn kadehde kehlail kei me nan pahr 1914 Wehin Koht nanleng kokoudahr oh “imwin rahn akan” en koasoandi suwed wet tepidahr.​—2 Timoty 3:1-5.