1, 2. Menlau kihda ekei karasepe kan duwen irail kan me Siohwa kin ketin wiahkin irail kompoakepah keren akan.

SOANGEN aramas dah me ke pahn pilada en wia kompoakepahmw men? Ele ke pahn men patehng aramas emen me kin pwungki omw madamadau kan oh mehkan me ke mwahuki oh kesempwalki. Oh ke pahn kin mwadang poakepoakehla aramas emen me ahneki irair mwahu kan me duwehte mehlel oh kadek.

² Nan poadopoad, Koht kin ketin pilada soangen aramas ekei ren wia kompoakepah keren akan. Karasepe, Siohwa kin ketin kamwarehki Eipraam kompoakepah. (Wadek Aiseia 41:8; Seims 2:23.) Koht mahsanih me Depit wia ‘soangen ohl me e kupwurki’ pwehki e wia soangen aramas me Siohwa kin ketin poakohng. (Wiewia 13:22) Siohwa pil kin ketin wiahki soukohp Daniel emen me e “ketin loalloale.”​—Daniel 9:23.

3. Dahme kahrehda Siohwa ketin pilada soangen aramas ekei en wia kompoakepah kan?

 ³ Dahme kahrehda Siohwa ketin wiahki Eipraam, Depit oh Daniel ren wia kompoakepah kan? E mahsanihong Eipraam: “Pwehki omw kapwaiadahr ei mahseno.” (Senesis 22:18) Kahrehda Siohwa kin ketin karanih irail oko me ni karakarahk kin wia dahme e kin ketin padahkihong irail en wia. E mahsanihong mehn Israel kan: “Re en kin peikiong ie, pwe I en wiahla arail Koht oh re en wiahla nei aramas.” (Seremaia 7:23) Ma ke pahn peikiong Siohwa, ke pil pahn kak wiahla kompoakepah!

4, 5. Ia duwen Siohwa eh kin ketin doadoahngki sapwellime kehl pwehn sewese sapwellime aramas akan?

⁴ Medewehla duwen kamwahupen kompoakepahnki Koht. Paipel mahsanih me Siohwa kin ketin raparapahki ahnsou mwahu kan “pwehn ketin kakehlahda irail kan me arail mohngiong kin loalopwoatohng ih.” (2 Kronikel 16:9) Ia duwen Siohwa eh kak ketin doadoahngki sapwellime kehl pwehn seweseiuk? Ehu ahl iei me Siohwa mahsanih nan Melkahka 32:8: “I pahn padahkihong uhk ahl me ke pahn weid ie; I pahn kaweid uhk oh panawihiuk.”

⁵ Ia uwen met eh wia mahsen kansenamwahu duwen sapwellimen Siohwa epwel mwahu! E pahn ketikihda kaweid me anahn oh sinsilei iuk ni omw pahn kapwaiada sapwellime kaweido. Koht kupwurki seweseiuk pwe ken kak powehdi omw songosong kan oh apwal akan. (Wadek Melkahka 55:22.) Ma ke pahn uhpah Siohwa ni omw mohngiong unsek, ke kak ahneki soangen koapworopworohte me sounmelkahkao mahsanih: “I kin aririh KAUN-O ahnsou koaros; e kin ketiket limwahi, oh sohte  mehkot kak kauweiehla.” (Melkahka 16:8; 63:8) Ei, Siohwa kak ketin seweseiuk ken mourki mour ehu me kin kaperenda ih. Ahpw nin duwen omw esehier, mie emen imwintihti en Koht me men ireiukasang wia met.

6. Ia pakaraun me Sehdan wia me pid aramas akan?

⁶ Irelaud 11 en pwuhk wet kin kawehwehda ia duwen Sehdan me Tepilo eh uhwongada Sapwellimen Koht pwuhng en kaunda. Sehdan karaune Koht oh nda me Siohwa me likamw oh sapwung ni eh sohte ketin mweidohng Adam oh Ihp en pein pilada dahme pwung oh dahme sapwung. Mwurin Adam oh Ihp ara wiahdahr dihp oh ni ahnsou me sampah tepidahr direkihla kadaudokara kan, Sehdan kihda peidek me pid dahme uhdahn kin kamwakid wiewiahn aramas koaros nan sampah. Sehdan wiahier pakaraun wet: ‘Aramas akan sohte kin papah Koht sang ni arail limpoakohng ih. Kihong ie ahnsou oh I ahpw pahn kak wekidala aramas koaros sang papah Koht.’ Poadopoad en ohl emen me ede Sohp kin kasalehda me iei met me Sehdan kin kamehlele. Ihs Sohp? Ia duwen eh mour eh kin pidada ahn Sehdan uhwong wet?

7, 8. (a) Dahme kahrehda Sohp weksang aramas akan nan eh ahnsowo? (b) Ia duwen Sehdan eh kin peidengki dahme uhdahn kin kamwakid Sohp en papah Koht?

⁷ Sohp kin wie momour pohn sampah mpen sounpar 3,600 samwalahr oko. Ih ohl mwahu men pwe Siohwa mahsaniheki duwen ih: “Sohte aramas nin sampah me loalopwoat oh mwahu duwehte ih. E kin kaudokiong ie oh kin kanahieng pwe en dehr wiahda me suwed ahnsou koaros.” (Sohp 1:8) Sohp kin kaperenda Koht.

⁸ Sehdan kin peidengki dahme uhdahn kin kamwakid Sohp en papah Koht. Tepilo patohwanohng Siohwa:  “Komw ketin silehdier ih oh eh peneinei oh pil mehkoaros me e ahneki. Komw pil kin ketin kupwuramwahwih mehkoaros me e kin wia, oh sapweo direkilahr kou me komw ketikihong. Ahpw ma komw pahn ketikihsang mehkoaros me e ahneki​—e pahn lahlahwei komwi mwohn silangomwi.”​—Sohp 1:10, 11.

9. Ia duwen Siohwa eh ketikihda pasapengpen ahn Sehdan uhwongo oh dahme kahrehda?

⁹ Sehdan kin akupwungki me Sohp kin papah Koht pwehki dahme e alehsang reh. Tepilo pil kin ngihtehtehki me ma Sohp pahn lelohng kasongosong kan, e pahn uhwongada Koht. Ia duwen Siohwa eh ketin sapengala ahn Sehdan koasoi en uhwong pwukat? Pwehki ire wet kin doke ia uhdahn kahrepen ahn Sohp papah Siohwa, e ketin mweidohng Sehdan en kasonge Sohp. Ni ahl wet, e pahn sansalda mwahu ma Sohp kin limpoakohng Koht de soh.

10. Apwal dah kan me lelohng Sohp? Ia duwen eh mwekidki mepwukat?

¹⁰ Sehdan mwadangete kasonge Sohp ni soangen ahl tohto. Ekei nein Sohp mahn akan, aramas pirapahsang, oh ekei, aramas kemehla. Pali laud en nah ladu kan kamakamala. Met kahrehda Sohp en paisuwedla. Patehng met, nah seri ehk ko mehkihla melimel ehu. Mendahki kahpwal pwukat, “Sohp sohte dipikihda eh lahlahwehki Koht.”​—Sohp 1:22.

11. (a) Ia pil ehu pakaraun me Sehdan wia me pid mour en Sohp? Dahme Siohwa ketin wia? (b) Ia duwen Sohp eh mwekidki eh soumwahu kasaut oh weirek laud?

¹¹ Sehdan sohte uhdi wasaht. Sehdan kilang me Sohp kolokolete eh lelepek mendahki eh dipwisou kan ohla, nah ladu kan mehla, oh nah seri kan pil mehla. Ahpw e medewe me Sohp pahn uhwongada Koht ma e pahn  soumwahuda. Siohwa eri ketin mweidohng Sehdan en kihong Sohp soumwahu kasaut oh weirek laud ehu. Ahpw met sohte pil kahrehiong Sohp en kesehla eh pwoson Koht. “Nan apwal pwukat koaros Sohp sohte mwahn lahlahwekihla Koht.”​—Sohp 2:10.

12. Ia duwen Sohp eh kihda pasapeng ong ahn Sehdan uhwong Siohwa?

¹² Sohp sohte wehwehki me Sehdan me kihkihong ih kahpwal pwukat. Pwehki e sohte wehwehki oaritik en ahn Sehdan uhwongada sapwellimen Siohwa pwuhng en kaunda, Sohp medemedewe me Koht me ketikihong ih kahpwal pwukat. (Sohp 6:4; 16:11-14) Mendahki met, e wie kolokolete eh lelepek ong Siohwa. Sehdan nda me Sohp kin papah Koht pwehki dahme e alehsang reh. En Sohp eh tengediong lelepek kin kasalehda me karaun wet likamw.

13. Dahme wiawi pwehki Sohp eh lelepek ong Koht?

¹³ Ahn Sohp lelepek kihong Siohwa sapwellime pasapeng kehlail ong ahn Sehdan uhwongo. Sohp uhdahn wia kompoakepahn Siohwa, oh Koht ketin katingih eh kin kasalehda lelepek.​—Sohp 42:12-17.

14, 15. Dahme kahrehda kitail kak nda me ahn Sehdan uhwong Sohp pil kin dokedoke aramas koaros?

¹⁴ Kaidehn Sohp kelehpw me Sehdan kin peikasalki eh lelepek ong Koht. Ke pil iang pidada ire wet. Met sansalda mwahu sang dahme Siohwa mahsanih nan Lepin Padahk 27:11: “Samwa, ke en loalokongla, I ahpw pahn kin pereperen; e pahn mie ei pasapeng ong mehmen me pahn kauwei ie.” Mahsen pwukat ntingdi sounpar epwiki kei mwurin Sohp eh mehla. Met kin kasalehda me Sehdan kin wie kaukauwehte Koht oh kin karakaraune Sapwellime ladu kan. Ahnsou me kitail kin mourki mour  ehu me kin kaperenda Siohwa, kitail kin iang kihda pasapeng ong ahn Sehdan karaun likamwo. Ni ahl wet kitail kin kaperenda Koht. Ia omw pepehm ong met? E sou pahn inenen mwahu ma ke kak iang kihda pasapeng me pahn kapwungala ahn Sehdan karaun likamwo, mendahte ma ke pahn anahne wiahda wekidekla kei nan omw mour?

¹⁵ Tehk me Sehdan koasoia: “Aramas kin mweidala mehkoaros me e ahneki pwe en doarehla pein eh mour.” (Sohp 2:4) Ni ahnsou me e koasoia “aramas,” Sehdan kasalehda mwahu me eh pakaraun sohte dokedokehte Sohp ahpw e kin dokedoke aramas koaros. Met wia ire kesempwal ehu. Sehdan kin peikasalki omw lelepek ong Koht. Sehdan me Tepil pahn perenki kilang omw sapeikiong Koht oh kesehla omw wiewia mwahu ni ahnsou me apwal akan pahn pwarada. Ia duwen Sehdan eh pahn wia met?

16. (a) Soangen wiepe dah me Sehdan kin doadoahngki pwehn wekid aramas akan sang Koht? (b) Ia duwen Tepil eh pahn kak doadoahngki soangen wiepe pwukat pwehn uhwong uhk?

¹⁶ Nin duwen Irelaud 10 kasalehda, Sehdan kin doadoahngki wiepe tohto pwehn wekid aramas akan sang Koht. E kin pei “duwehte laion emen me kin weriwer, raparapahki ihs me e pahn kadallehla.” (1 Piter 5:8) Kahrehda ke pahn kilang ahn Sehdan uhwong ni ahnsou me kompoakepahmw kan, kisehmw akan, de pil aramas teikan kin uhwong uhk pwehki omw kin nannantihong en onop Paipel oh pil doadoahngki dahme ke sukuhlkiher. * (Sohn 15:19, 20) Pil ehu ahl iei Sehdan kin “kawekala  pein ih, oh mwomwehda tohnleng en marain.” (2 Korint 11:14) Tepil kak kaweid sapwungih iuk ni ahl me sohte nohn sansal oh kahluweiuk sang elen mour me kin kaperenda Koht. E pil kak doadoahngki pepehm en mwoarosala pwe ken pehm me ke sohte warohng kaperenda Koht. (Lepin Padahk 24:10) Eri sohte lipilipil mehnia ahl me Sehdan kin doadoahngki, ma duwehte “laion emen me kin weriwer” de mwomwehda “tohnleng en marain,” ahpw eh pakaraun duweduwehte: E nda me ni ahnsou me ke pahn mi nan irair apwal de kasongosong, ke sohla pahn papah Koht. Ia duwen omw pahn kak sapeng ahn Sehdan pakaraun oh kasalehda me ke lelepek ong Koht duwehte me Sohp wia?

17. Ia kahrepe keieu kesempwal ong peikiong sapwellimen Siohwa kehkehlik kan?

¹⁷ Ke kak sapeng ahn Sehdan pakarauno ni omw pahn kin mourki mour ehu me kin kaperenda Koht. Dahme met kin pid? Paipel sapeng: “Eri, ke en poakohng KAUN-O omw Koht sang nan mohngiongomw unsek, [“ni omw mour unsek,” NW] oh ni omw kehl koaros.” (Deuderonomi 6:5) Ni omw limpoakohng Koht eh pahn wie lalaudla, ke pahn perenkihla kapwaiada dahme Koht kupwurki ken wia. Wahnpoaron Sohn ntingihedi: “Iet duwen wehwehn poakohng Koht: kitail en peikiong sapwellime kosonned akan.” Ma ke pahn poakohng Siohwa ni mohngiong unsek, ke pahn diarada me “sapwellime kosonned akan me sohte apwal.”​—1 Sohn 5:3.

18, 19. (a) Ia ekei sapwellimen Siohwa kehkehlik kan? (Menlau kilang koakon me oaralap koasoia “ Liksang Dahme Siohwa Kalahdeki.”) (b) Ia duwen atail ese me Koht sohte kin ketin padahkihong kitail en wia mehkot me kitail sohte kak wia?

¹⁸ Ia sapwellimen Siohwa kehkehlik kan? Ekei kin pid  wiewia kan me kitail en dehr wia. Karasepe, tehk koakon me oaralap koasoia “ Liksang Dahme Siohwa Kalahdeki.” Wasaht ke pahn kilang irekidi en wiewia kei me Paipel kin uhwong ni sansal. Ni omw pahn kilang wiewia pwukat, mwein ke pahn medewe me ekei sohte nohn suwed. Ahpw mwurin omw pahn medemedewe mwahu iren Paipel kan me pwarada, ke pahn kakehr kilangada duwen kamwahupen sapwellimen Siohwa kosonned akan. Wekidala omw wiewia kan kakete wia  mehkot me keieu apwal ong uhk. Ahpw mourki mour ehu me kin kaperenda Koht kin wahdo nsenamwahu oh peren. (Aiseia 48:17, 18) Oh met mehkot me ke pahn kak wia. Dahme kitail kak esehki met?

¹⁹ Siohwa sohte kin ketin padahkihong kitail en wia mehkot me kitail sohte kak wia. (Wadek Deuderonomi 30:11-14.) E ketin mwahngih dahme kitail kakohng oh dahme kitail sohte kakohng laud sang kitail. (Melkahka 103:14) Patehng met, Siohwa kak ketikihong kitail kehl  pwe kitail en peikiong ih. Wahnpoaron Pohl ntingihedi: “Koht me uhdahn mehlel, oh e sohte pahn ketin mweidohng kumwail en ale songosong me kumwail sohte kak powehdi; ahpw ahnsoun songosong, e pahn ketikihong kumwail kehlail pwe kumwail en kak dadaur oh pitsang nan songosongo.” (1 Korint 10:13) Siohwa pil kak ketikihong uhk “manaman lapalap” pwehn sewese iuk en dadaurete.”​—2 Korint 4:7.

20. Soangen irair dah kan me ke anahne kakairada? Dahme kahrehda met kesempwal?

²⁰ En kaperenda Siohwa kin wehwehki laudsang en ihte liksang dahme e kin ketin kalahdeki. Ke anahne pil poakohng dahme e kin ketin poakohng. (Rom 12:9) Ke sou kin men patehng aramas akan me kin pwungki omw madamadau kan oh mehkan me ke mwahuki oh kesempwalki? Met pil duwehte Siohwa. Eri nantihong poakohng soahng kan me Siohwa kin ketin kesempwalki. Ekei soahng pwukat kin kawehwehdi nan Melkahka 15, wasa me mahsanih duwen irail kan me Koht kin ketin wiahki kompoakepah. (Wadek Melkahka 15:1-5.) Kompoakepahn Siohwa kan kin mweidohng sapwellimen Koht manaman en sewese irail en kakairada irair mwahu kan nan arail mour. Manamano kin sewese irail en kasalehda “limpoak, peren, popohl, kanengamah, kadek, loalopwoat, opampap, oh liksang me suwed.”​—Kalesia 5:22, 23.

21. Dahme pahn sewese iuk en kakairada irair kan me Koht kin ketin kupwurperenki?

²¹ Kaukaule wadek oh sukuhlki Paipel pahn sewese iuk en kakairada irair kan me Koht kin ketin kupwurperenki. Sukuhlki dahme Koht kupwurki pahn sewese iuk en ahneki  madamadau me pahrekiong kupwuren Koht. (Aiseia 30:20, 21) Ma omw limpoak ong Siohwa pahn kehlailla, omw ineng en mourki mour ehu me kin kaperenda Koht pil pahn kehlailla.

22. Dahme ke pahn kak wia ma ke mourki mour ehu me kin kaperenda Koht?

²² Ke anahne nantihong pwehn mourki mour ehu me kin kaperenda Siohwa. Paipel kin karasahiong wekideklahn omw mour duwehte omw kin pwilikihdi omw mour en mahs oh uhd pwuhriong nan likoun mour kapw en aramas. (Kolose 3:9, 10) Ahpw ong me pid sapwellimen Siohwa kehkehlik kan, sounmelkahka men ntingihdi: “I kin ale ketingpen ei kin peikiong sapwellimomwi mahsen kan.” (Melkahka 19:11) Ke pil pahn diarada me mourki mour ehu me kin kaperenda Koht kin wahdo kapai laud. Ni omw kin wia met, ke kak kihda pasapeng ong ahn Sehdan pakarauno oh pil kaperenda Siohwa!