AHNSOU me Paipel tepin ntingdi, e kin doadoahngki lepin lokaiahn Ipru sheʼohlʹ oh lokaiahn Krihk haiʹdes tohtohsang pak 70. Lepin lokaia pwukat koaros kin pidada duwen mehla. Nan ekei wasa kan nan Paipel en mahsen en Pohnpei,  e kin kawehwehdi lepin lokaia pwukat ong “sousou.” Ahpw nan wasa tohto, e kin kawehwehdi ong “ehl,” “sapwen me melahr akan” de “wasahn me melahr akan.” Kawehwe pwukat sohte pwung ong lepin lokaiahn Ipru oh Krihk pwukat. Ia uhdahn wehwehn lepin lokaia riau pwukat? Kitail tehkpene ia duwen lepin lokaia pwukat ar kin kadoadoahk nan iren Paipel kan.

Eklesiasdes 9:10 mahsanih: “Sohte pahn mie wiewia, de lamalam, de loalokong, de erpit, nan wasahn me melahr akan [sheʼohlʹ] iei wasa me ke pahn kohla ie.” Ia duwe, met kin wehwehki me sheʼohlʹ iei sousou ehu me kitail kin sarepedi aramas akan loale? Soh. Pwe ni ahnsou me Paipel kin mahsanih duwen sousou ehu me aramas emen kin seridi ie, e kin doadoahngki lepin lokaiahn Krihk oh Ipru tohrohr kan ah kaidehn sheʼohlʹ de haiʹdes. (Senesis 23:7-9; Madiu 28:1) Oh pil Paipel sohte kin doadoahngki lepin lokaia sheʼohlʹ ong sousou ehu me aramas tohto kin seridi loale, me duwehte sousou en peneinei.​—Senesis 49:30, 31.

Eri, soangen wasa dahieu sheʼohlʹ? Mahsen en Koht kasalehda me sheʼohlʹ de haiʹdes kin pid mehkot me wehwe laudsang ihte sousou en aramas emen de aramas tohtohie. Karasepe, Aiseia 5:14 kasalehda me sheʼohlʹ ‘men kadallehlahr me melahr akan oh ewe sarapesengier.’ Ni lokaiahn karasaras, sheʼohlʹ kadallehlahr aramas melahr tohtohie, ahpw e pil men kadallehlahte pil ekei. (Lepin Padahk 30:15, 16) E weksang wasahn seridi en aramas melahr akan me mie irepen meh depe kak kohlong loale. Nan sheʼohlʹ “dewen aramas tohto mie wasao.” (Lepin Padahk 27:20) Sheʼohlʹ sohte kak dirala. Sohte irepen meh depe kak kohlong loale. Kahrehda sheʼohlʹ de haiʹdes kaidehn uhdahn wasa ehu me mi wasakis. Ni lokaiahn karasaras, e kin wehwehkiong wasa me pali laud en me melahr akan kin wie memeir ie.

Padahk en Paipel me pid duwen kaiasada kin sewese kitail en kalaudehla atail esehla wehwehn sheʼohlʹ oh haiʹdes. Mahsen en Koht kin doadoahngki sheʼohlʹ de haiʹdes ni ahnsou me e kin mahsanih duwen soangen mehla me pahn  mie koapworopwor en kaiasada. * (Sohp 14:13; Wiewia 2:31; Kaudiahl 20:13) Mahsen en Koht pil kin kasalehda me irail oko me mihmi nan sheʼohlʹ de haiʹdes kaidehn irail akante me kin papah Siohwa ahpw pil iangahki aramas tohto teikan me saikinte iang papah ih. (Kilang Senesis 37:35 oh Melkahka 55:15, wasa me sheʼohlʹ kin kawehwehdiong “sousou” oh “sapwen me melahr akan.”) Kahrehda, Paipel mahsanih me pahn mie “iasadahn koaros me pwung oh me sapwung kan.”​—Wiewia 24:15, NW.