OARITIK KAN
Sises Krais—Mesaia me Mie Inoupe
PWEHN sewese kitail en kasawihada ihs me Mesaiao, Siohwa Koht ketin kamwakid soukohp tohto nan Paipel pwe ren kihda oaritik kan duwen Soundoarepen aramas menet me Koht ketin inoukidahr. Oaritik pwukat kin pid duwen eh pahn ketin ipwidi, sapwellime doadoahk en kalohk oh eh pahn ketin pwoula. Kokohp en Paipel pwukat koaros kin pweida rehn Sises Krais. Pweidahn kokohp pwukat kin inenen pwung oh oaritik. Kitail tehkpene mahs ekei kokohp kan me kohpada wiewia kan me kin pid duwen ipwidi en Mesaia oh duwen ahnsou me e seri.
Soukohp Aiseia kohpadahr me Mesaia pahn wia kadaudoken Nanmwarki Depit. (Aiseia 9:7) Sises ipwisang peneinei en Depit.—Madiu 1:1, 6-17.
Pil emen sapwellimen Koht soukohp Maika kohpadahr me seri menet pahn wiahla kaun emen oh me e pahn ipwidi nan “Pedleem Eprata.” (Maika 5:2) Ni ahnsou me Sises ketin ipwidi, mie kahnimw riau nan Israel me adaneki Pedleem. Ehu iei me mi limwahn Nasaret ni paliepeng en wehio, oh mehteio karanih Serusalem nan Suda. Pedleem me karanih Serusalem mahs kin adaneki Eprata. Ih kahnimw wet me Sises ketin ipwidi ie, duwen me kokohpo kohpadahr!—Madiu 2:1.
Pil ehu kokohp en Paipel kohpadahr me sapwellimen Koht Ohlo pahn ketin kapwurpwurdo “sang nan Isip.” Sises ketin wisiklahng nan Isip ni ahnsou me e seri. E ketin kapwurpwurdo sang nan Isip mwurin mehlahn Erod oh met kokohpo pweida.—Oseia 11:1; Madiu 2:15.
Nan kisin koakon me oaralap koasoia “ Kokohp kan Duwen Mesaia,” iren Paipel kan me irekidi pahn oaralap “Kokohp” kin kasalehda oaritik kan duwen Mesaia. Menlau kapahrekihpene ire pwukat oh iren Paipel kan me irekidi pahn oaralap me nda “Pweidahn kokohp.” Omw pahn wia met pahn kakehlakahda omw pwoson me Mahsen en Koht me mehlel.
Ni omw pahn kasawih iren Paipel pwukat, tamataman me iren kokohp pwukat ntingdier pahr epwiki kei mwohn Sises ketin ipwidi. Sises mahsanih: “Mehkoaros me ntingdier nan Kosonned en Moses, rehn soukohp ako, oh nan Pwuhken Melkahka Kan, uhdahn pahn pweida rehi.” (Luk 24:44) Ni omw kak kilang nan pein noumw Paipel, kokohp pwukat uhdahn pweidahr ni oaritik!
