IREN MEHN KASUKUHL 60
Pousehlahte Kekeirda nin Duwen Kristian Men
Ke sukuhlkier soahng tohto duwen Siohwa erein ata onopki Paipel. Soahng kan me ke sukuhlkier kahrehiong uhk omw uhdahn poakohngala ih oh mwein ke inoukihongehr ih omw mour oh papidaisla. Ma saik, mwein ke kin medemedewe ken wia met ni ahnsou keren. Ahpw, omw kekeirda sohte kin uhdi mwurin omw papidaisla. Ke kak pousehlahte karanihala Siohwa kohkohlahte. Ia duwen?
1. Dahme kahrehda ke anahne pousehlahte kakehlaka omw nanpwungmwahu rehn Siohwa?
Kitail anahne doadoahk laud pwe kitail en pousehlahte kakehlaka atail nanpwungmwahu rehn Siohwa. Dahme kahrehda? “Pwe kitail en dehr peila” sang ih. (Ipru 2:1) Dahme kak sewesei kitail en kin papah Siohwa ni lelepek? Kitail kak soupisengki doadoahk en kalohk oh rapahki ahl teikan me kak kalaudehla atail papah Koht. (Wadek Pilipai 3:16.) Papah Siohwa iei mour me keieu mwahu!—Melkahka 84:10.
2. Soahng dah kan me ke pil anahne pousehla wiewia?
Mendahki onop wet pahn nekier, omw mour nin duwen Kristian men pahn popouslahte. Paipel mahsanih me kitail anahne “pwuhriong nan mour kapw.” (Episos 4:23, 24) Ni omw pousehlahte onopki Mahsen en Koht oh iang towehda mihting en mwomwohdiso kan, ke pahn sukuhlki soahng kapw kan duwen Siohwa oh sapwellime irair kan. Medewe ia duwen omw kak kahlemengih sapwellime irair kan nan omw mour. Pousehlahte wekidala dahme anahn pwehn kaperenda kupwuren Siohwa.
3. Ia duwen Siohwa eh pahn ketin seweseiuk en kekeirda?
Paipel mahsanih: “Koht . . . pahn ketin kanekehla amwail kaiahn. E pahn ketin katengeikumwaildi, e pahn ketin kakehlaikumwailda oh e pahn ketkinkumwaildiong pohn poahsoan teng.” (1 Piter 5:10) Kitail koaros kin lelohng kasongosong. Ahpw Siohwa kin ketikihong kitail dahme anahn pwe kitail en pelianda kasongosong kan. (Melkahka 139:23, 24) E ketin inoukihda me e pahn ketikihong uhk ineng oh kehl en papah ih ni lelepek.—Wadek Pilipai 2:13.
KALAUDEHLA OMW ESE MET
Medewe ia duwen omw kak pousehlahte kekeirda nin duwen Kristian men oh ia duwen Siohwa eh pahn ketin kapaiukada.
4. Pousehlahte patohong oh rong Kompoakepahmw me keieu mwahwo
Kapakap oh onop Paipel me seweseiuk ken kompoakepahnkihla Siohwa. Ia duwen mepwukat eh kak seweseiuk en pousehlahte karanihala ih?
Wadek Melkahka 62:8, oh mwuri koasoiapene peidek wet:
-
Pwe ken kakehlaka omw nanpwungmwahu rehn Siohwa, ia duwen omw kak kamwahwihala omw kapakap kan?
Wadek Melkahka 1:2, oh mwuri koasoiapene peidek wet:
-
Pwe ken kakehlaka omw nanpwungmwahu rehn Siohwa, dahme ke kak wia ni omw wadek Paipel?
Dahme ke kak wia pwehn kamwahwihala mwomwen omw kin onopki Paipel? Pwehn kilang ekei sawas kan, kilang KISIN KASDO, oh mwuri koasoiapene peidek pwukat.
-
Iren sawas dah kan me ke men doadoahngki?
-
Mehnia oaralap me ke men onopki?
5. Wiahda mehn akadei
Ma mie omw mehn akadei me pid papah Siohwa, met pahn seweseiuk en pousehlahte kekeirda. Kilang KISIN KASDO, oh mwuri koasoiapene peidek wet.
-
Soangen kamwahu dah kan me Cameron alehdi ni eh wiahda mehn akadei kan?
Kaidehn aramas koaros me kak keseula nan ehu sahpw tohrohr pwehn kalohk. Ahpw, kitail koaros kak wiahda mehn akadei me kitail kak kapwaiada. Wadek Lepin Padahk 21:5, oh mwuri medewe mehn akadei kan me ke men wiahda . . .
-
nan mwomwohdiso.
-
nan kalohk.
Ia duwen kaweid en iretikitik wet eh kak seweseiuk en kapwaiada omw mehn akadei?
Ekei mehn akadei kan
-
Kamwahwihala omw kapakap kan.
-
Wadekala Paipel pwon.
-
Esehla koaros nan mwomwohdiso.
-
Tepida onop Paipel rehn emen.
-
Wia sawaspen pioneer de regular pioneer.
-
Ma kowe brother men, nantihong wiahla sounsawas men.
6. Pereperenki mour kohkohlahte!
Wadek Melkahka 22:26, oh mwuri koasoiapene peidek wet:
-
Dahme ke kak wia pwe ken pereperenki mour ahnsou wet oh kohkohlahte?
DAHME KE SUKUHLKIER
Pousehlahte kakehlaka omw nanpwungmwahu rehn Siohwa oh wiahda mehn akadei me pid papah ih. Ke ahpw pahn kak pereperenki mour kohkohlahte!
Kousapahl
-
Dahme kahrehda ke kak kamehlele me Siohwa pahn ketin seweseiuk ken papah ih ni lelepek?
-
Dahme ke kak wia pwehn kakehlaka omw nanpwungmwahu rehn Siohwa?
-
Ia duwen mehn akadei kan eh kak seweseiuk en kekeirda?
PIL TEHK
Mehnia me Siohwa ketin kesempwalki, wia mehkot laud pwehn poadidiong ih pak ehute, de kitail en lelepek ong ih erein atail mour?
Sapwellimen Siohwa ladu lelepek men pil kakete sohla peren. Kilang ia duwen eh kak pwurehng peren.
Ia duwen omw kak wiahda mehn akadei oh kapwaiada?
“Use Spiritual Goals to Glorify Your Creator” (The Watchtower, July 15, 2004)
Dahme kahrehda e kesempwal en wiahla Kristian koahiek men, oh ia duwen omw kak wiahla emen?
“En Koahiekla nin Duwen Kristian—‘Rahn Lapalap en Kaun-o Kerendohr’” (Kahn Iroir, May 1, 2009)
