Paipel kawehwehda me mahwen en Armakedon sohte pahn wiawi wasatehkis nin sampah ahpw mahwen wet pahn pidada sampah pwon, nanpwungen koperment en aramas koaros oh Koht.

•    “Rohng pwukat kohsang rehn ngehn suwed kan . . . kin kohwong nanmwarki kan en sampah pwon pwe en kihpene irail ong ni mahwen me pahn wiawi ni rahn lapalap en Koht, me Keieu Manaman. . . . Irail kihpene irail nan wasa me adaneki ni lokaiahn Ipru Armakedon.”—Kaudiahl 16:14, 16.

 Lepin lokaia “Armakedon” kohsang lepin lokaiahn Ipru Har Meghid·dohnʹ, me wehwehki “Nahna en Mekiddo.” Mekiddo iei kahnimw ehu nan sahpw en Israel mahso. Pwehki kahrepe wet, ekei kamehlele me Armakedon pahn wiawi nan Israel. Ahpw, sahpw en Mekiddo de pil wasa teikan nan Middle East sohte pahn itarohng “nanmwarki kan en sampah pwon” oh neirail karis en sounpei kan en pokonpene.

 Pwuhk en Kaudiahl ntingdi “ni kilel kan” de ni lokaiahn karasaras kan. (Kaudiahl 1:1) Armakedon sohte kin dokedoke uhdahn wasa ehu, ahpw e kin dokedoke irair en sampah pwon me wehi kan pahn pokonpene pwe ren song uhwong sapwellimen Koht kaunda.—Kaudiahl 19:11-16, 19-21.