JOVENESPA TAPUKUYNINKU
¿Qharipura chayri warmipura kakuy juchachu?
Uj joven 23 watasniyoj, David sutiyoj nin: “Wiñasqayman jina repararqani qharis gustawasqankuta. Chayqa pasaponqachá nerqani. Jinapis chayllapipuni yuyasharqani”, nispa.
Davidqa Jehovaj testigon kasqanrayku Jehovata kasukuyta munan. Qhari masisnillantaj gustajtin, ¿atinmanchu Diospa kamachisqanta kasukuyta? ¿Imaynatá Dios qhawan qharipura chayri warmipura khuchichakojkunata?
Qharipura chayri warmipura khuchichakuymanta, ¿imatá Biblia nin?
Qharipura chayri warmipura khuchichakuymanta tukuy ladopi uj jinata yuyanku. Cristianosrí mana paykuna jinachu yuyanchej. Nitaj paykuna imatachus nisqankuwan ‘wayrawan jina kayman jaqayman’ apaykachachikunchejchu (Efesios 4:14). Qharipura chayri warmipura kakuyta, chayman rijchʼakoj waj millay ruwaykunatapis Biblia nisqanman jinapuni qhawanchej.
Qharipura chayri warmipura qhariwarmi jina puñuykuymanta imatachus Biblia nisqanta qhawarina.
“Ama qharipuraqa puñuykunkichejchu warmiwanpis puñuykushawajchej jinaqa” (Levítico 18:22).
“Sonqonkoj munayninman jina, cuerponkuta pʼenqaypi rikhurichinankupaj [...] Diosqa millayta qʼoñirisqa kanankuta saqerqa. Imaraykuchus warmisqa manaña qhariwan puñuykuyta munarqankuchu, astawanqa warmipurallaña puñuykuyta munarqanku” (Romanos 1:24, 26).
“Ama chʼaukiyakuychejchu. Imaraykuchus khuchichakojkuna, santosta yupaychajkuna, qhenchachakojkuna, qhari kashaspa warmiman tukojkuna, qharipura puñuykojkuna, suwakojkuna, munapayajkuna, machajkuna, wajkunapaj sajrata parlajkuna, sutʼi suwaspis manapuni Diospa Gobiernonta herenciata jina japʼenqankuchu” (1 Corintios 6:9, 10).
Jehovaj kamachiykunasnenqa tukuyninchejpaj, qhariwarmispaj, qhari kashaspa qharillawantaj kayta munajkunapaj, chayri warmi kashaspa warmillawantaj kayta munajkunapaj. Jinapis Diosta kusichiyta munanchej chayqa, mana sajra munayninchejwan atipachikunanchejchu tiyan (Colosenses 3:5).
¿Imatá niyta munashanchej?
¿Nishanchejchu qhari kashaspa warmiman tukojkunata chejnikusqanchejta?
Mana. Bibliaqa yachachiwanchej mana pitapis chejnikunachu kasqanta. Astawanpis niwanchej ‘tukuywan allinpi kausakunata’, imayna kausayniyoj kajtinkupis (Hebreos 12:14). Chayrayku qhari kashaspa warmiman tukojkunamanta mana burlakunchejchu, kʼumuykachachinchejchu, nitaj maqanchejchu.
Qharipura casarakunankupaj leyes kajtinpis, ¿nishanchejchu chay leyespa contranpi kashasqanchejta?
Mana. Jehová Diosqa qhariwarmi kausayta rikhuricherqa. Chayrayku payqa Palabranpi niwanchej uj qhareqa uj warmiwan casarakunanta, manataj qharillawantajchu (Mateo 19:4-6). Cristianosqa mana qharipura casarakunankupaj leyesman churanakunchejchu, nitaj apoyanchejchu. Imaraykuchus gobiernosqa runas nisqankuman jinalla chay leyesta orqhonku, nitaj Bibliaj nisqanman jinachu. Chayrayku Bibliaqa cristianosman niwanchej mana politicaman chhapukunata (Juan 18:36).
Pillapis
Pillapis qhari kashaspa warmiman tukun, warmi jinataj kausakun chayqa, ¿cambiayta atinmanchu?
Arí, cambiayta atinman. Bibliapi willawanchej ñaupa tiempomanta wakin runas cambiasqankuta. Apóstol Pabloqa Corintomanta cristianosman qhelqasqan cartapi nerqa, qharipura puñuykojkuna, qhari kashaspa warmiman tukojkuna manapuni Diospa Gobiernonta herenciata jina japʼinankuta. Chantá nillarqataj: “Qankunamanta wakenqa ajina karqankichej”, nispa (1 Corintios 6:9-11).
Chaywan mana nishanchu qhari kashaspa warmi jina kausayta saqepojkunaqa, manaña ni ujtawan chaypi yuyanankuta. Biblia nin: “Diospa qosqan mosoj kausaywantaj pʼachallikuychej. Chay kausayqa Diosta allinta rejsiywan mosojyachisqa kashan”, nispa (Colosenses 3:10). Bibliapi nin jina kausayninchejtaqa, pisimanta pisi cambiayta atinchej.
Pillapis Diospa kamachiykunasninta kasukuyta munan, jinapis sajra munaynillanpipuni yuyan chay, ¿imatá ruwanman?
Sajra munayninchejpi yuyayqa, waj imasta munapayay jinallataj. Chayrayku sapa ujmanta kashan, chay sajra munayninta rijchʼarichej imasta saqenan chayri mana saqenan. Biblia nin: “Diospa espiritunman jina kausallaychejpuni, ajinamanta mana sajra munayniykichejta ruwankichejchu”, nispa (Gálatas 5:16).
Kay versiculopi mana nishanchu, uj runaqa sajra munayninpi manaña ujtawan yuyananta. Astawanpis nishan Bibliata ashkhata estudianan kasqanta, Diosman orakunan kasqanta ima, ajinamanta sajra munayninwan mana atipachikunanpaj.
Qallariypi parlarerqanchej chay jovenqa, cristiano tatasninwan parlarerqa qharimasisnillantaj gustasqanmanta. Chayta ruwaspaqa manaña anchata llakikorqachu, astawanpis llasa qʼepintapis saqeshanman jina karqa. Chayrayku pay nin: “Tatasniywan parlarispaqa aswan sonqo tiyasqa kasharqani, ñaupajmantapacha chayta ruwayman karqa chayqa, aswan sumaj kanman karqa”, nispa.
Jehová Diospa kamachiykunasninta kasukuspaqa astawan kusisqa kanchej. Imaraykuchus “Jehová Diospa kamachisqasnenqa cheqanpuni” ‘sonqotataj kusichin’. Kamachisqasninta kasukusun chayqa, ashkha bendicionesta japʼisun (Salmo 19:8, 11).
