Apocalipsis libroqa Bibliapi kashan. Chay libroj sutenqa griego parlaypi apokálypsis palabramanta jamun, chay palabrataj niyta munan “taparay” chayri “velota qhataray”. Chay suteqa sumajpuni, imaraykuchus Apocalipsis libroqa sutʼinchan imaschus may chhika watasta pakasqa karqa chayta, chantapis sutʼinchallantaj imaschus qhepaman kananta. Pisimantawantaj chay libromanta wakin profecías juntʼakonqa.

¿Imasmantataj parlan Apocalipsis libro?

•   Qallariynin (Apocalipsis 1:1-9).

•   Qanchis congregacionesman Jesús willan (Apocalipsis 1:10–3:22).

•   Juanqa mosqoypi jina cielopi rikorqa Jehová Diosta kamachina tiyananpi tiyashajta (Apocalipsis 4:1-11).

•   Juanqa kay imasta mosqoypi jina rikorqa:

  •   Qanchis sellos (Apocalipsis 5:1–8:6).

  •   Qanchis cornetas, qhepa kaj kinsa cornetasqa uj aywan khuska karqa, nisunman waqaywan khuska karqa (Apocalipsis 8:7–14:20).

  •   Qanchis fuentes, sapa fuenteqa Diosmanta uj castigowan junt’a karqa, chaykunataj kay mundoman jichʼaykamusqa karqanku (Apocalipsis 15:1–16:21).

  •   Juanqa mosqoypi jina rikun Diospa enemigosnin chinkachisqa kasqankuta (Apocalipsis 17:1–20:10).

  •   Juanqa mosqoypi jina rikun mosoj cielota, mosoj jallpʼatawan (Apocalipsis 20:11–22:5).

•   Tukukuynin (Apocalipsis 22:6-21).

Apocalipsis librota entiendenapaj phishqa imasta yachana

1.   Allin imasmanta parlan. Chayrayku Diosta sirvejkunaqa mana manchachikunankuchu tiyan Apocalipsis librota leeyta. Ashkha runasqa apocalipsis palabrata uyarispa, kay jallpʼa chinkachisqa kananmanta parlakushasqanta yuyanku. Jinapis Apocalipsis libroqa qallariyninpi, tukukuyninpipis niwanchej, chay librota leejkuna, entiendejkuna, chay libropi nisqanman jinataj kausakojkuna kusisqa kanankuta (Apocalipsis 1:3; 22:7).

2.   Apocalipsis libromanta ashkha versículos, ashkha palabras ima ‘señales’ chayri kikinchaykuna kanku, chayrayku mana nisqanman jinapunichu entiendena tiyan (Apocalipsis 1:1, sutʼinchaynin).

3.   Apocalipsis libro pikunamantachus, chantá imamantachus parlan chay imasmantaqa, Bibliamanta waj librospis parlallantaj.

   •   Jehová: Payqa cielopi “cheqa Dios”, tukuy imata Ruwaj Diostaj (Deuteronomio 4:39; Salmo 103:19; Apocalipsis 4:11; 15:3).

   •   Jesucristo: Payqa ‘Diospa Corderon’ (Juan 1:29; Apocalipsis 5:6; 14:1).

   •   Satanás: Payqa Diablo, Diospa enemigontaj (Génesis 3:14, 15; Juan 8:44; Apocalipsis 12:9).

   •   Jatun Babilonia: Payqa Jehovajta chantá llajtanpata enemigon, tukuy llulla yachachiykunataj paymanta rikhurin, imaynatachus unay tiempopi Babilonia chayri Babel llajtamanta llulla yachachiykuna rikhurerqa ajinata (Génesis 11:2-9; Isaías 13:1, 11; Apocalipsis 17:4-6; 18:4, 20).

   •   “Mar qocha”: Chayqa Diosmanta karunchasqa runaswan ninakun (Isaías 57:20; Apocalipsis 13:1; 21:1).

   •   Ñaupa tiempopi Diosta yupaychana toldopi kaj imas: Diospa trato ruwasqan arca, mar qochaman rijchʼakoj vidrio jina (chayqa karqa mayllakunapaj wirkhi), nina kʼanchanas, incienso, ofrenda qʼolachina altar ima (Éxodo 25:10, 17, 18; 40:24-32; Apocalipsis 4:5, 6; 5:8; 8:3; 11:19).

   •   Millay phiña animales: Chaykunaqa Gobiernoswan ninakun (Daniel 7:1-8, 17-26; Apocalipsis 13:2, 11; 17:3).

   •   Waj imaswan ninakoj números (Apocalipsis 1:20; 8:13; 13:18; 21:16).

4.   Juan mosqoypi jina rikusqanqa “Señorpa pʼunchayninpi” juntʼakunan karqa, chay pʼunchaytaj 1914 watapi qallarerqa (Apocalipsis 1:10). Chay watapi Diospa Gobiernon sayarichisqa karqa, chay Gobiernopi rey kananpajtaj Jesús churasqa karqa. Chayrayku Apocalipsis libromanta ashkha profecías kay tiempopi juntʼakushan.

5.   Apocalipsis librota entiendenapaj, jinallataj tukuynin Bibliatapis entiendenapajqa, Diosmanta yachayta mañakuna, pikunachus Bibliaj nisqanta entiendejkunawantaj yanapachikuna (Hechos 8:26-39; Santiago 1:5).