Arí. Diabloqa chayri Supayqa kanpuni. Payqa cielopi uj ángel karqa, Diospa contranpitaj oqharikorqa. Kunantaj payqa ‘kay mundota kamachishan’ (Juan 14:30; Efesios 6:11, 12). Bibliaqa imaymana sutista Diabloman churan. Chay sutistaj imaynachus kasqanta rikuchiwanchej. Wakin sutisqa kaykuna kanku:

•   Satanás, kay suteqa “Churanakoj” niyta munan (Job 1:6).

•   Diablo chayri Kuraj Supay. Kay sutisqa “Qhasimanta Tumpaj” chayri “Llullakuspa Tumpaj” niyta munan (Apocalipsis 12:9).

•   Katari, kay palabraqa Bibliapi “chʼaukiyaj” chayri “engañaj” niyta munan (2 Corintios 11:3).

•   Juchaman tanqaj (Mateo 4:3).

•   Llullakoj (Juan 8:44).

Diabloqa, ¿runaspa sonqonkupi sajra kajllachu?

 Mana. Runasqa yuyanku, Diabloqa runaj sonqonpi sajra kajlla kasqanta, Diospipis chay sajra kaj kasqallantataj ninku. Jinapis Diosninchejqa manchay llimphu. Paypeqa mana ima sajrapis kanchu. Chantapis Bibliaqa nin, Diosqa uj pacha Satanaswan parlasqanta. ¿Pay kikillanwantajchu parlanman karqa? Mana, ¿icharí? (Deuteronomio 32:4; Job 2:1-6). Waj kutipitaj, Satanasqa Jesustañataj juchaman urmachiyta munarqa. Jesuspitaj ni ima juchapis kanchu (Mateo 4:8-10; 1 Juan 3:5). Bibliaqa sutʼita rikuchin, Diabloqa kasqantapuni, manataj ninchu runaj sonqonpi sajra kajlla kasqanta.

 Ashkha runas yuyanku, Diabloqa mana kasqanta. Chaytaj mana tʼukuchiwanchejchu. Imaraykuchus Bibliapuni nin, Satanasqa runasta engañananpaj vivo kasqanta (2 Tesalonicenses 2:9, 10). Chayrayku ashkha runasta creechin pay mana kasqanta (2 Corintios 4:4).

  Wakin runas ninku: “Diabloqa Lucifer sutikullantaj”, nispa.

 ¿Jinapunichu? Mana. Wakin Bibliaspi, Isaías 14:12 versiculopi “Lucifer” suti rikhurin. Chaytaj hebreo parlaypi “kʼanchaj” palabramanta jamun. Jinapis chay suteqa, Babiloniapi reyesmanta chayri gobiernosmanta parlashan. ¿Imaraykutaj chayta ninchej? Profeta Isaiasqa, chay versiculospi Babiloniamanta reyes urmanankumanta parlasharqa. Chay reyesqa mayta jatunchakoj kanku. Diostaj paykunata kʼumuykachachinanta nerqa. Chayrayku paykunamanta burlakuspa nerqa, ‘kʼancharisaj chʼaska jina urmaykamunankuta’ (Isaías 14:4, 13-20).

  Wakin runas ninku: “Diabloqa Diospaj trabajan”, nispa.

 ¿Jinapunichu? Mana. Diabloqa Diospa enemigon, mana paypa kamachinchu. Payqa Diospa kamachisninpatapis enemigon, llullakuspataj paykunata tumpan (1 Pedro 5:8; Apocalipsis 12:10).