Arí. Bibliaqa sutʼita rikuchiwanchej, Dios kasqantapuni. Chantapis niwanchej, mana wajkuna Diospi creesqankuraykullachu noqanchejpis Diospi creenanchej kasqanta. Astawanpis ‘yuyayninchejwan’ reparananchej tiyan, Dios kasqantachus manachus (Romanos 12:1; 1 Juan 5:20). ¿Imaraykutaj Dios kasqantapuni yachanchej? Chayta Bibliapi qhawarina.

•   Cielopipis jallpʼapipis tukuy ima maychus kananpi kasqanqa, kausay kasqanpis, rikuchiwanchej chay tukuy imas mana qhasillamantachu rikhurisqanta. Biblia nin: “Sapa waseqa ruwajniyojpuni. Tukuy imata ruwajtajrí Diospuni”, nispa (Hebreos 3:4). Kay Bibliaj nisqantaqa, wakinkuna mana creenkuchu. Jinapis ashkha yachayniyoj runasqa creenku. a

•   Runasqa imapajchus kausashasqanchejta yachayta munanchej. Mana chayta yachaspaqa, qhasillapaj kausashasqanchejta yuyasunman. Tukuy ima kapuwajtinchejpis, mana sonqo juntʼasqachu kasunman. Chayrayku Biblia niwanchej, ‘Diosmanta yachakuyta necesitasqanchejta’, payta yupaychayta munasqanchejta ima (Mateo 5:3; Apocalipsis 4:11). Chay munayniyoj kasqanchejqa, Dios kasqantapuni rikuchiwanchej. Chantapis rikuchiwanchej, Dios munakuwasqanchejta, payman qayllaykunanchejta munasqanta ima (Mateo 4:4).

•   Bibliaj profeciasnenqa, unayña qhelqakojtinpis tukuy ima nisqan juntʼakun. Chay profecías maychus kajta juntʼakusqanqa, rikuchiwanchej chay profeciasta Diospuni willachisqanta (2 Pedro 1:21).

•   Bibliata qhelqajkunaqa, kunan tiempopi imastachus yachanchej, chayta unayña yacharqanku. Tiemponkumanta runastaj, mana chaykunata yacharqankuchu. Sutʼincharinapaj, ñaupa runasqa creej kanku jallpʼanchejqa elefante patapi, monte khuchi patapi, toro patapi, chayri waj animal patapi kasqanta. Bibliatajrí nin, Diosqa ‘jallpʼata mana imallaman warkhuykusqanta’ (Job 26:7). Chantapis nillantaj, jallpʼanchejqa “muyu” kasqanta (Isaías 40:22). Chayrayku ashkha runas ninku: “Bibliata qhelqajkunaqa mana sapallankumanta chayta yachankumanchu karqa. Diospunichá chayta paykunaman willarqa”, nispa.

•   Diospi mana creejkunaqa tapukuyta yachanku: “Sichus Dios kʼacha, tukuy atiyniyojtaj chayqa, ¿imaraykutaj kay jinata sufrinchejri? ¿Imaraykutaj iglesiaspis problemasllata rikhurichinkuri?”, nispa (Tito 1:16). Bibliaqa chay tapuykunaman, waj tapuykunamanpis kutichin. Chayta yachayqa, Diospi creenaykipaj yanapasunkiman.