Bibliapeqa uj cheqallapi tatuajesmanta parlan. Chaymanta parlaspa Levítico 19:28 nin: “Amallataj tatuajesta ruwakunkichejchu”, nispa. Jehová Diosqa chay kamachiyta israelitasman qorqa. Payqa mana munarqachu qayllankupi tiyakoj runas jina, cuerponkupi sutista tatuachikunankuta, diosesninkumanta dibujitosta tatuachikunankuta ima (Deuteronomio 14:2). Cristianosqa israelitasman qosqa Leyta juntʼanapaj mana obligasqachu kaspapis, imaynatachus chay yuyaychaykuna yanapanawanchejpi piensarinanchej tiyan.

¿Allinchu kanman uj cristiano tatuajesta ruwachikunan?

 Chayta yachanapajqa wakin versiculosta qhawarisun.

•   1 Timoteo 2:9 nin: ‘Warmispis maychus kajta kʼachanchakuchunku wajkunata jatunpaj qhawaspa, allin yuyaywantaj’, nispa. Kay yuyaychayqa mana warmisllapajchu, manaqa qharispajpis. Uj cristianoqa imaynatachus kʼachanchakusqanwan mana wajkunata pʼenqachinanchu tiyan, nitaj runaswan allinpaj qhawachikunanraykullachu kʼachanchakunan tiyan.

•   Wakin runasqa tatuajesta ruwachikunku runaykachanankupaj, paykunallamantaña imatapis ruwayta atisqankuta rikuchinankupaj, cuerponkumanta dueños kasqankuta rikuchinankupaj ima. Jinapis Biblia nin: ‘Cuerpoykichejta Diosman jaywaychej kausashaj jaywanata jina, paypa qhawayninpi llimphuta, payta kusichinanpaj jinataj. Ajinamanta Diosta sirvinkichej tukuy yuyayniykichejwan’, nispa (Romanos 12:1). Allin yuyayniyoj runaqa, imaraykuchus uj tatuajeta ruwachikuyta munasqanpi ñaupajta piensarin. Wakin runasqa tatuajesta ruwachikunku ashkha runas ruwachikusqankuraykulla, manachayrí ima grupomantachus kasqankuta rikuchinankuraykulla. Chayrayku allin kanman kayta tapurikuna: “Chay tatuajeta ruwachikuspa, unayninman manaña gustawajtin, ¿imatá ruwasaj? ¿Chay tatuajesta ruwachikusqaymanta arrepientekusajchu?”. Imaraykuchus uj tatuajeta ruwachikuyta munasqanchejpi piensarisun chayqa, imatachus ruwananchejta allinta ajllasun (Proverbios 4:7).

•   Proverbios 21:5 nin: “Kʼuchi runaj wakichikusqanqa allinpuni llojsin. Mana allinta yuyaychakuspa imatapis ruwarpajkunataj wajchayanku”, nispa. Kay versiculopi nin jina, wakenqa mana piensarispalla tatuajesta ruwachikunkupacha. Tatuajesta ruwachikoj runastaqa, tiempowan mana allinchu rin. Paykunaqa trabajotapis mana tariyta atillankuchu, runaspis tatuajesniyojta rikuspa mana allinpajchu qhawanku. Chayrayku tatuajesninkuta orqhochikuyta munanku. Jinapis chayta ruwachikoyqa ashkha qolqepaj. Chantapis anchata nanakun. Tatuajesta orqhojkuna, tatuajesmanta yachajkunapis ninku, ashkha runas tatuajesta ruwachikusqankumanta arrepientekusqankuta chayri pesachikusqankuta.