Jesusqa kausayninta qospa salvawanchej. Payqa yawarninta jichʼarqa Diosta tukuy kasukoj runasta salvananpaj (Mateo 20:28). Chayrayku Bibliaqa nin, Jesusqa “kay mundomanta runaspa salvajnin” kasqanta (1 Juan 4:14). Chantá nillantaj: “Waj runanejtaqa manapuni salvación kanchu. Kay jallpʼapitaj mana waj suti runasman qosqa kanchu chaynejta salvasqa kananchejpaj”, nispa (Hechos 4:12).

 Jesusqa paypi tukuy creejkunarayku wañorqa (Hebreos 2:9; Juan 3:16). Diostaj payta wañusqas ukhumanta kausarichimorqa. Chaymantataj Jesusqa, mana rikukoj cuerpoyoj cieloman kutiporqa (Hechos 3:15). Kunantaj “payqa, pikunachus paynejta Diosman qayllaykushanku chaykunata salvananpajpis wakichisqa kashan. Imaraykuchus payqa kausashallanpuni, paykunapaj Diosmanta yanapata mañapunanpaj” (Hebreos 7:25).

¿Imaraykutaj Jesús yanapanawanchejta necesitanchej?

 Tukuy runas juchasapas kasqanchejrayku (Romanos 3:23). Nacekusqanchejmantapacha juchayoj kasqanchejrayku, tukuyninchej wañunchej, Diosmantataj karunchasqa kashanchej (Romanos 6:23). Jinapis Jesusqa wañuyninpi tukuy creejkunata yanapan. Chayrayku payqa “abogadonchej” jina (1 Juan 2:1, sutʼinchaynin). Jesusqa kausayninta qosqanrayku, noqanchejpaj Diosmanta rogapuwanchej. Payqa Diosmanta mañapuwanchej juchasninchejta perdonananta, mañakuykunasninchejta uyarinanta ima (Mateo 1:21; Romanos 8:34). Diostajrí Jesuspa mañakusqanta uyarin munayninman jina kasqanrayku. Payllataj Wawanta kay jallpʼaman kachamorqa, Jesusnejta “kay mundomanta runas salvasqa kanankupaj” (Juan 3:17).

¿Jesusllapichu creena tiyan salvakunapaj?

 Mana. Salvakunapaj Jesuspi creenanchejpuni kajtinpis, mana chayllatachu ruwananchej tiyan (Hechos 16:30, 31). Bibliaqa nin: “Imaynatachus mana samayniyoj cuerpoqa wañusqa kashan, ajinallatataj mana ruwasqasniyoj creeypis wañusqa kashan”, nispa (Santiago 2:26). Chayrayku salvakunapajqa, kay imasta ruwanachej tiyan:

•   Jesusmanta, Tatan Jehovamantawan yachakunachej tiyan (Juan 17:3).

•   Jesuspiwan Jehová Diospiwan creenanchej tiyan (Juan 12:44; 14:1).

•   Paykunapi creespaqa, kamachiykunasninkuta kasukunanchej tiyan (Lucas 6:46; 1 Juan 2:17). Jesusqa nerqa, Tatanpa munayninta “ruwajkunalla” salvakunankuta, nitaj tukuy “Señor, Señor” nejkunachu (Mateo 7:21).

•   Llakiykunapi kaspapis, creeyniyojllapuni kanachej tiyan. Imaraykuchus Jesús nerqa: “Tukukuykama aguantajrí salvasqa kanqa”, nispa (Mateo 24:13).