Aswan qhepaman Diospa Gobiernon kay jallpʼaman allin kausayta apamonqa. Diospa Gobiernonqa cielomantapacha kamachimonqa. Chay Gobiernopi kamachejtaj Reyninchej Jesucristo kanqa. Chaymanta imatachus Biblia nisqanta qhawarina.

1.   Diosqa “tukuy kay pachapi chʼajwasta” chʼinyachenqa. Pay nisqanman jinataj ‘kay jallpʼapi sonqo tiyaykuy kanqa, Diospa ñaupaqenpi allinpaj qhawasqa runaspaj’ (Salmo 46:9; Lucas 2:14).

2.   Diospa Gobiernon cielomantapacha tukuy jallpʼata kamachimonqa. Payqa fronterasta chinkachenqa, tukuytaj uj suyullamantapis kasunman jina kausakusun, manataj maqanakusunchu lindesrayku chayri llajtanchejrayku (Daniel 7:14).

3.   Diospa Gobiernonpi kamachej Jesustaqa, “Allin Kawsayta Apamoj Rey” nikullantaj. Payqa jallpʼantinman allin kausayta apamonqa (Isaías 9:6, 7).

4.   Diospa Gobiernonqa maqanakuyta, chʼajwasta rikhurichej runasta ima chinkachenqa. Payqa “chejnikun sajra ruwajta, pikunachus phiñakuspa kallpankuman atienekuyta munajkunata” (Salmo 11:5; Proverbios 2:22).

5.   Diosqa kamachisninman yachachin tukuywan allinta kausakunankuta. Chay yachachisqanta japʼikojkunamantataj Biblia nin: “Espadasninkuta arado rejasman tukuchenqanku, tʼojsina lanzasninkumantataj hocesta ruwakaponqanku. Nitaj mayqen naciompis waj naciompa contranta maqanakunampaj wakichikonqachu, nitaj wañuchinaku chʼajwapajpis oqharikonqachu”, nispa (Isaías 2:3, 4).

 Jallpʼantinmanta ashkha testigos yachakushayku tukuywan allinta kausakuyta (Mateo 5:9). Tukuy rijchʼaj kayku, 230 kuraj suyuspi, lugarespi ima tiyakuyku. Ni jaykʼajtaj armasta oqhariykumanchu runa masiykuwan maqanakunaykupaj.