Jehovaj testigosnintaqa tukuy runaswan Bibliamanta parlariy gustawayku, “amaña jamuwaychejchu” niwarqayku chaykunawanpis. Chaytataj ruwayku Diostawan runa masiykutawan munakusqaykurayku (Mateo 22:37-39). Diosta munakusqayku sonqoykuta aysan Wawan Jesuspa kamachisqanta kasukunaykupaj. Jesús kamacherqa Diospa Gobiernonmanta runasman allinta sutʼinchanata (Hechos 10:42; 1 Juan 5:3). Chayrayku ñaupa tiempomanta profetas jina, tukuy runasman Diospa Palabranta willashallaykupuni (Jeremías 25:4). Runa masiykuta munakusqaykupis sonqoykuta aysallantaj ‘Diospa Gobiernonmanta sumaj willaykunata’ tukuyman willarinaykupaj, mana uyariyta munawarqaykuchu chaykunamanpis. Imajtinchus paykunapis salvakuyta atinkuman (Mateo 24:14).

 Chantapis mana uyariyta munawarqaykuchu chay wasisman watejmanta kutejtiykoqa, ashkha kutispi uyariyta munajkunawan tinkuyku. ¿Imajtintaj chay pasan?

•   Wakin kutisqa waj runasñataj chay wasiman astakunku.

•   Wakin kutisqa ujnin familiarnin chayri ujnin inquilinon yachakuyta munan.

•   Runasqa cambianku. Wakinkunaqa mundontinpi ashkha imasta pasashasqanta rikusqankurayku chayri kausayninkupi ima desgraciapis pasasqanrayku ‘Diosta necesitasqankuta reparakunku’. Chayrayku Bibliamanta astawan yachakuyta munanku (Mateo 5:3). Mana predicajta saqewanchejchu chaykunapis apóstol Pablo jina cambiankuman (1 Timoteo 1:13).

 Jinapis mana ni pita obligaykuchu uyarinawaykupaj (1 Pedro 3:15). Sapa uj ajllakunan tiyan mayqen religionpichus kananta (Deuteronomio 30:19, 20).