1 Crónicas 21:1-30
21 Chantá Satanasqa* Israelpa contranta oqharikuspa, Davidman yuyayta qorqa Israelpi censota ruwananpaj.+
2 Ajinamanta Davidqa Joabtawan+ llajtamanta kurajkunatawan nerqa: “Rispa israelitasta yupamuychej Beer-Sebamantapacha Dankama.+ Chantá willawankichej, mashkhachus kasqankuta yachanaypaj”, nispa.
3 Joabtaj nerqa: “Jehová Diosqa nacionninta pachaj jinastawanraj mirachichun. Señorníy, reyníy, ¿nichu israelitasqa señorniypa kamachisninña kanku? Señorníy, ¿imajtintaj israelitasta yupachiyta munashankiri? ¿Imapajtaj israelitasta juchayojta rikhurichiwajri?”, nispa.
4 Jinapis reypa kamachisqanqa aswan atiyniyoj karqa Joabpa nisqanmantaqa. Chayrayku Joabqa rispa tukuynin Israel nacionta purimorqa, chantá Jerusalenman kutimorqa.+
5 Joabqa Davidman willarqa mashkhatachus censopi qhelqasqankuta. Tukuynin Israelpi kasqanku uj millón cien mil qharis espadasniyoj, Judapitaj kasqanku 470 mil qharis espadasniyoj.+
6 Reypa nisqanqa Joabman mana allinchu rijchʼarqa.+ Chayrayku Leví aylluta,* Benjamín ayllutapis mana yuparqankuchu.+
7 Davidpa chay ruwasqanqa cheqa Diosta* mayta phiñacherqa, chayrayku Israel nacionta castigarqa.
8 Davidtaj cheqa Diosta nerqa: “Diosníy, chayta ruwaspa noqaqa jatun juchatapuni ruwani.+ Ama jina kaspa kay kamachiykej pantasqanta perdonay ari,+ kaytaqa wampu jinapuni ruwani”,+ nispa.
9 Jehová Diostaj profeta Gadman+ nerqa* Davidman kayta willananta:
10 “Rispa Davidman kayta nimuy: ‘Jehová Diosqa kayta nin: “Kay kinsamanta ujta ajllakuy, mayqentachus ruwasunayta munanki chayta”, nispa’”.
11 Chayrayku Gadqa Davidpaman rispa nerqa: “Jehová Diosqa kayta nin: ‘Ajllakuy,
12 ¿mayqenta munanki? ¿Kinsa wata juntʼata yarqhay+ kanantachu munanki? ¿Enemigosniyki kinsa killata atipaspa espadankuwan japʼichisunankutachu munanki?+ ¿Jehová Dios espadanwan kinsa diasta castigasunaykichejtachu munanki? Kay qhepa kajta ajllakojtiykeqa Jehová Diospa angelnin runasta wañurachenqa+ Israel nacionnintinpi uj wañuchej onqoywan’,+ nispa. Kunanqa allinta piensariy, niwaytaj imatachus nimunayta kachamuwajniyman”, nispa.
13 Davidtaj Gadta nerqa: “Kayqa jatun llakiypuni noqapajqa. Amapuni runaqa castigawachunchu,+ castigaspaqa Jehová Dios castigawachun, payqa manchay jatun khuyakuyniyoj”,+ nispa.
14 Jehová Diostaj wañuchej onqoyta+ Israel nacionman kachaykorqa. Chayrayku Israelpi 70 mil runas wañorqanku.+
15 Chantapis cheqa Diosqa uj angelta kachamorqa Jerusalén llajtata chinkarparichinanpaj. Chay ángel Jerusalenta chinkarparichinanpajña kashajtintaj, Jehová Diosqa Jerusalenta rikuspa sonqonta nanachikorqa* chay jina ñakʼariyta apachimushasqanmanta.+ Chayrayku ñakʼariyta apamusharqa chay angelta nerqa: “Chaylla kachun.+ Amaña jinaychu”, nispa. Chaypacha Jehová Diospa angelnenqa jebuseo+ Ornanpa eran*+ qayllapi kasharqa.
16 Davidtaj qhawarispa Jehová Diospa angelninta rikorqa cielopi sayashajta,* espadanwantaj Jerusalenta señalashajta.+ Davidwan kurajkunawanqa qhashqa telaswan qhatasqa kasharqanku,+ chay ratopachataj pampakama kʼumuykukorqanku.+
17 Davidtaj cheqa Diosta nerqa: “Diosníy, kay naciontaqa noqa yupacherqani. Noqa kay juchata ruwani. Noqa pantaykuni.+ Kay ovejitasniykirí, ¿ima juchayojtaj kankuri? Jehová Diosníy, ama jina kaspa noqata castigaway ari, tataypa familianta castigay ari, ama kay nacionniykitaqa castigaychu”,+ nispa.
18 Jehová Diospa angelnintaj Gadta+ kamacherqa Davidman nimunanta, wicharispa Jehová Diospaj uj altarta ruwamunanta, jebuseo Ornanpa eranpi.+
19 Davidtaj wicharerqa Gad nisqanman jina. Gadqa Jehová Diospa sutinpi parlarqa.
20 Ornanqa eranpi trigota trillasharqa, jinallapi kutirikuspa angelta rikorqa, paywan kasharqanku chay tawa wawasnintaj pakakamorqanku.
21 David Ornanpaman chayajtintaj, Ornanqa Davidta rikuytawan chay ratopacha eramanta llojsimuspa Davidpa ñaupaqenpi pampakama kʼumuykukorqa.
22 Davidtaj Ornanta nerqa: “Kay era jallpʼaykita vendepuway, kaypi Jehová Diospaj uj altarta ruwapunaypaj. Chaywanqa kay nacionmanta castigo chinkarenqa. Noqaqa mashkhachá valen chayta qʼalitunta pagapusqayki”,+ nispa.
23 Ornantaj Davidta nerqa: “Señorníy, japʼikapullay. Señor reyníy, imatachus nisqaykita ruwallay. Kay wakastapis qopusqayki qʼolachina* ofrendasta jina Diosman jaywanaykipaj, kay trillana tablatapis+ llantʼapaj qopusqayki, kay trigopis chʼaki mikhuy ofrendapaj kachun. Chay tukuyninta qopusqayki”, nispa.
24 Rey Davidtaj Ornanta nerqa: “Mana. Noqaqa pagapusqaykipuni mashkhachus valesqanta. Mana qanpaj imasniykita japʼikapuymanchu Jehová Diosman qonaypajqa, nitaj jaywanasta qʼolachiymanchu ni mashkhayta gastakuspaqa”,+ nispa.
25 Chayrayku Davidqa chay jallpʼamanta Ornanman qorita pagaporqa, qanchis kilosta jina.*
26 Chaypitaj Davidqa Jehová Diospaj uj altarta ruwaporqa,+ chaypi jaywanasta qʼolachiporqa, khuska mikhurikuy ofrendastapis jaywarqa, Jehová Diosmantaj qhaparikorqa, Diostaj Davidta uyarispa cielomanta ninata kachaykamorqa+ ofrenda qʼolachina altarman.
27 Jehová Diostaj angelta kamacherqa+ espadanta jallchʼananman churaykunanta.
28 Davidqa jebuseo Ornanpa eranpi Jehová Dios uyarisqanta reparaspa, chaypi jaywanasta jaywallajpuni.
29 Jinapis Jehová Diospa toldonqa, mayqentachus Moisés chʼin pampapi ruwacherqa chay, jinallataj ofrenda qʼolachina altarpis jaqay tiempopeqa Gabaonpa pata lugarninpi kasharqa.+
30 Davidtaj mana Gabaonman rerqachu Diosta tapukoj. Payqa sinchʼi mancharisqa kasharqa Jehová Diospa angelninpa espadanta rikusqanrayku.
Sutʼinchaykunasnin
^ Ichá nillanmantaj “churanakojqa”.
^ Uj aylloqa uj familiamanta miraj ashkha familias kanku.
^ Glosariopi cheqa Dios nisqata leeriy.
^ Chayri “mosqoypi jina willaykunata japʼej Gadman nerqa:”
^ Chayri “pesachikorqa”.
^ Hebreo parlaypeqa nin, “rikorqa jallpʼawan cielowan tinkuypi sayashajta”.
^ Chayri “ruphachina”.
^ Hebreo parlaypeqa nin, “600 siclos”. Uj sicloqa pesarqa 11,4 gramos (0,367 onzas troy). Yanapa B14 nisqata leeriy.
