2 Reyes 25:1-30
25 Sedequiasqa jisqʼon watastaña kamachisharqa, chunka kaj killaña karqa, chunka kaj pʼunchaytaj. Chay pʼunchay Babiloniamanta rey Nabucodonosorqa+ tukuynin ejercitontin Jerusalenman jamorqa.+ Rey Nabucodonosorqa Jerusalenpa muyuyninpi toldosninta* sayacherqa Jerusalenwan maqanakunanpaj, llajtaj muyuyninpitaj uj perqata sayaricherqa cercaykunanpaj.+
2 Rey Sedequiasqa 11 watastaña kamachisharqa, Jerusalén llajtataj cercasqallapuni kasharqa.
3 Tawa kaj killaña karqa, jisqʼon kaj pʼunchaytaj. Jerusalén llajtapitaj yarqhayqa allin sinchʼiñapuni karqa,+ niñapuni imapis karqachu runas mikhunankupaj.+
4 Chantá llajtaj perqanta uj trechota urmacherqanku.+ Tutantaj tukuynin soldados ayqekorqanku iskaynin perqaspa punkunta, reypa huertan chayninta. Reypis Arabá ñanta ayqekorqa.+ Caldeostaj llajtaj muyuyninpi kasharqanku.
5 Chantá caldeo soldadosqa reyta qhatiykorqanku, Jericó chʼin pampaspitaj tariparqanku. Reypa soldadosnintaj tukuyninku ayqekorqanku.
6 Chantá caldeo soldadosqa reyta japʼiytawan,+ Babiloniaj reyninpaman aparqanku Riblá lugarman, chaypitaj juzgarqanku.
7 Chantá Sedequiaspa wawasninta paypa rikunanta wañucherqanku. Chantá Nabucodonosorqa Sedequiasta ciegoyarpacherqa. Makisninta chakisnintawan cobre cadenaswan wataykuspataj Babiloniaman apakaporqa.+
8 Babiloniamanta rey Nabucodonosorqa 19 watastaña kamachisharqa, phishqa kaj killaña karqa, qanchis kaj pʼunchaytaj. Chay pʼunchay Babiloniamanta reypa kamachin Nebuzaradanqa+ Jerusalenman chayamorqa, payqa guardiaspa kamachejninku karqa.+
9 Nebuzaradanqa ruphaykucherqa Jehová Diospa wasinta,+ reypa wasinta,*+ Jerusalenpi karqa chay tukuynin wasista,+ sumajpaj qhawasqa karqanku chay runaspa wasisninkutapis.+
10 Guardiaspa kamachejninkuwan kasharqanku chay tukuynin caldeo soldadosqa, Jerusalenpa muyuyninmanta perqasta urmaracherqanku.+
11 Guardiaspa kamachejninku Nebuzaradanqa presosta apakaporqa llajtapi puchorqanku chay runasta, Babiloniaj reyninman kutisqa rikhurerqanku chay runasta, tukuynin runastapis.+
12 Guardiaspa kamachejninkoqa chaypi saqerqa aswan wajcha runasllataña uva huertasta qhawanankupaj, esclavos jinataj trabajanankupaj.+
13 Chantá caldeo soldadosqa tʼunata ruwarqanku Jehová Diospa wasinpi karqa chay cobre pilaresta,+ carrosta,+ Jehová Diospa wasinpi karqa chay cobremanta jatun wirkhitapis.*+ Chay cobretataj Babiloniaman apakaporqanku.+
14 Apakapullarqankutaj baldesta, palasta, nina wañuchinasta, copasta, templopi Diosta yupaychanapaj imaschus cobremanta ruwasqa karqa chay tukuy imastapis.
15 Guardiaspa kamachejninkoqa apakapullarqataj brasa apaykachanasta, fuentestapis, chay imasqa oro puromanta,+ qolqe metalmanta ruwasqa karqa.+
16 Chay iskay pilaresmanta, chay jatun wirkhimanta, chay carrosmantapis, mayqenkunatachus Salomón ruwarqa Jehová Diospa wasinpaj, chaykunamanta ashkhapuni cobre tantakorqa, mana pesay atinapuni karqa.+
17 Sapa pilarqa sayayninman pusaj metrosniyoj karqa,*+ pilarpa patanpi karqa chay pʼuñoqa cobrellamantataj karqa, sayayninmantaj miderqa uj metro 30 centimetrosniyoj.* Chay pʼuñuta muyuykoj mallapis granadaspis cobrellamantataj karqanku.+ Iskaynin pilares kikinkamalla karqanku.
18 Guardiaspa kamachejninku Nebuzaradanqa apakapullarqataj kuraj sacerdote* Serayata,+ iskay kaj sacerdote Sofoniasta,+ punkuta qhawajkunamantataj kinsa runasta.+
19 Chantá llajtamanta apakapullarqataj soldadospa comandantenta, mayqenchus reypa wasinpi cargoyoj karqa chayta. Apakapullarqataj llajtamanta reypa phishqa yuyaychaj runasninta, soldadospa capitanninkoj secretariontapis, mayqenchus nacionmanta runasta tantaj soldados kanankupaj chayta. Apakapullarqataj 60 runasta, pikunachus llajtallapiraj kasharqanku chaykunata.
20 Guardiaspa kamachejninku Nebuzaradanqa+ chay runasta aparqa Babiloniaj reyninpaman, Riblá+ lugarman.
21 Babiloniamanta reytaj chay runasta Riblapi wañuracherqa, Hamat+ jallpʼaspi. Ajinata Judá naciontaqa jallpʼasninmanta presota apakaporqanku.+
22 Babiloniamanta rey Nabucodonosorqa Guedaliasta+ churarqa kamachinanpaj Judapi karqankuraj chay runasta.+ Guedaliasqa Ahicampa+ wawan karqa, Ahicamtaj Safanpa+ wawan karqa.
23 Soldadospa tukuy capitanesnin, soldadosninkupis uyarisqanku Babiloniamanta reyqa Guedaliasta kamachinanpaj churasqanta. Chayrayku paykunaqa chay rato Guedaliaswan parlaj rerqanku Mizpaman. Paykuna karqanku Netaniaspa wawan Ismael, Careahjpa wawan Johanán, netofatita Tanhumetpa wawan Seraya, maacatitaj wawan Jaazanías ima. Paykunawan khuskataj kasharqanku tukuynin soldadosninku.+
24 Guedaliastaj chay capitanesman, soldadosninkumanpis juraporqa. Paykunamantaj kayta nerqa: “Ama manchachikuychejchu caldeospa kamachisnin kaytaqa. Kay jallpʼaspi tiyakuspa Babiloniaj reyninta sirviychej, allintaj risonqachej”,+ nispa.
25 Ismaelqa+ reypa mirayninmanta karqa, Netaniaspa wawan, Netaniastaj Elisamaj wawan karqa. Qanchis kaj killapitaj, Ismaelqa chunka runaswan khuska jamorqa, paykunaqa Guedaliasta wañurpacherqanku. Guedaliaswan Mizpapi kasharqanku chay judiospis, chay caldeospis wañullarqankutaj.+
26 Chaymantataj tukuy runas, wawaspis, machituspis, soldadospa capitanesninpis Egipto nacionman riporqanku+ caldeosta manchachikusqankurayku.+
27 Judamanta rey Joaquinqa+ 37 watastaña preso kasharqa. Chay wataj 12 killanpi, 27 pʼunchayninpi Babiloniaj reynin Evil-Merodacqa, Judaj reynin Joaquinta carcelmanta kachariporqa. Evil-Merodacqa chay wata kamachiyta qallarerqa.+
28 Rey Evil-Merodacqa Joaquinwan kʼacha karqa. Babiloniapi presos kasharqanku chay reyesmantapis Joaquintaqa aswan allinpaj qhawarqa.*
29 Joaquinqa preso ropanta orqhokaporqa, wañupunankamataj reypa mesanpi mikhorqa.
30 Joaquinmanqa sapa día mana faltayta reypa mikhunanmanta qoj kanku, wañupunan pʼunchaykama.
Sutʼinchaykunasnin
^ Chayri “carpasninta”.
^ Chayri “kamachina wasinta”.
^ Hebreo parlaypeqa nin, “Mar”.
^ Hebreo parlaypeqa nin, “18 codosniyoj karqa”. Uj codoqa 44,5 centímetros karqa. Yanapa B14 nisqata leeriy.
^ Hebreo parlaypeqa nin, “3 codos”.
^ Glosariopi kuraj sacerdote nisqata leeriy.
^ Chayri “kamachina tiyananta aswan pataman churarqa”.
