Jeremías 19:1-15
19 Jehová Diosqa nerqa: “Rispa manka llutʼa runamanta uj yuruta rantimuy.+ Chantá pusariykukuy llajtamanta wakin kurajkunata, sacerdotesmanta wakin kurajkunatawan.
2 Paykunawan khuska riy Hinón wayqʼoman,*+ Kʼanalla Punku nisqa yaykunaman. Chaypitaj willamuy imatachus nisqayki chayta.
3 Qanqa kayta ninki: ‘Judamanta reyes, qankunapis Jerusalenpi tiyakojkuna, uyariychej Jehová Diospa nisqanta. Angelesta kamachej Israelpa Diosnin Jehovaqa kayta nin:
”’“Kay lugarman uj jatun ñakʼariyta apachimusaj, pichus chayta uyarejqa mayta mancharikonqa.*
4 Chayta ruwasaj saqerpariwasqankurayku,+ kay lugartataj mana rejsiyman tukuchisqankurayku.+ Kay lugarpi uywa wañuchisqasta jaywashanku waj diosesman. Chay diosestaqa ni ñaupa tatasninkupis, nitaj Judamanta reyespis rejserqankuchu. Paykunaqa kay lugarta mana juchayoj runaspa yawarninkuwan juntʼaykuchinku.+
5 Paykunaqa Baal santopaj pata lugaresta ruwarqanku, chaykunapi wawasninkuta Baalpaj qʼolachina ofrendasta jina ruphaykuchinankupaj.+ Noqaqa mana kamacherqanichu, nitaj nerqanichu chayta ruwanankuta, noqaqa chaypi ni yuyallarqanipischu”,+ nispa’.
6 ”‘Jehová Diosqa nin: “Chayrayku uyariway, uj pʼunchay qayllamushan, chaypachaqa kay lugarta manaña Tófet nenqankuchu, nitaj Hinón wayqʼo* nenqankuchu. Astawanpis Wañuchina wayqʼo nenqanku.+
7 Judawan Jerusalenwan imatachus yuyaychakusqankutaqa, kay lugarpi mana allinman tukuchisaj. Paykunataqa enemigosninkoj espadanman entregaykusaj, paykunata wañuchiyta munanku chaykunaj makisninkuman entregaykusaj. Wañusqa cuerposninkutaqa qaraykusaj pʼisqosman, jallpʼapi purej animalesman ima.+
8 Chantapis kay llajtataqa mancharinaman tukuchisaj, silbarispa burlakunankupaj. Chayninta pasajkunaqa chayta rikuspa mayta mancharenqanku, tukuy chay imas pasasqanmantataj burlakuspa silbarenqanku.+
9 Paykunamanqa mikhuchisaj qhari wawasninkoj aychankuta, warmi wawasninkoj aychankuta. Paykunaqa purajmanta mikhunakonqanku, enemigosninku muyuykusqankurayku, nitaj ni imanakuyta atisqankurayku. Chayqa kanqa paykunata wañuchiyta munajkuna muyuykusqankurayku”,+ nispa’.
10 ”Chayta niytawan ranterqanki chay yuruta pʼakinki qanwan renqanku chay runaspa ñaupaqenkupi.
11 Paykunamantaj ninki: ‘Angelesta kamachej Jehová Diosqa nin: “Imaynatachus manka llutʼajpa ruwasqan yuruta pillapis pʼakirparin, manañataj chayta allinchakuyta atinchu, ajinallatataj tʼunaykusaj kay llajtapi tiyakojkunata, jinallataj kay llajtatapis. Paykunaqa wañusqasninkuta Tofetpi pʼampanqanku manaña campo kanankama”,+ nispa’.
12 ”Jehová Diosqa nin: ‘Ajinata ruwasaj kay lugarta, kay lugarpi tiyakojkunatapis. Ajinamanta kay llajtaqa Tófet jina kanqa.
13 Jerusalén wasispis, Judamanta reyespa wasisninkupis kay Tófet jina chʼichipaj qhawasqa kanqa.+ Ajina chʼichipaj qhawasqa kanqanku tukuy chay wasis. Imaraykuchus chay wasispa terrazasninkupeqa* uywa wañuchisqasta qʼolacherqanku* imaschus cielopi kan chay imaspaj,+ waj diosesmanpis chaypi vino ofrendasta jaywarqanku’,+ nispa”.
14 Jehová Diosqa Jeremiasta Tofetman willaj kacharqa. Jeremiasqa chaymanta kutimuspa Jehová Diospa wasi pationman rerqa, chaypitaj tukuy runasman nerqa:
15 “Angelesta kamachej Israelpa Diosnin Jehovaqa kayta nin: ‘Ima ñakʼariytachus apachimunayta nerqani, chayta apachimusaj kay llajtaman, tukuy ranchosninmanpis. Imaraykuchus paykunaqa kʼullukuspa* mana nisqasniyta kasuwarqankuchu’,+ nispa”.
Sutʼinchaykunasnin
^ Hebreo parlaypeqa nin, “Hinonpa wawanpa wayqʼonman”.
^ Hebreo parlaypeqa nin, “uyarejpataqa ninrisninpuni sonarenqa”.
^ Hebreo parlaypeqa nin, “Hinonpa wawanpa wayqʼon”.
^ Chayri “wasi patasninkupeqa”.
^ Chayri “ruphacherqanku”.
^ Chayri “tercos kaspa”.
