Jeremías 34:1-22
34 Babiloniamanta rey Nabucodonosorqa* tukuy soldadosninwan, kamachiyninpi kaj tukuy gobiernoswan, tukuy llajtaswan khuska Jerusalén llajtaj contranpi maqanakorqa, jinallataj tukuy llajtasninpa contranpipis.+ Chaypacha Jehová Diosqa Jeremiasman kayta nerqa:
2 “Israelpa Diosnin Jehovaqa kayta nin: ‘Judamanta rey Sedequiaswan+ parlaj riy. Payman nimuy: “Jehová Diosqa kayta nin: ‘Kay llajtataqa Babiloniamanta reypa makinman jaywaykusaj, paytaj ninawan kay llajtata ruphaykuchenqa.+
3 Qanqa mana paypa makinmanta ayqenkichu. Qantaqa japʼisonqankupuni, paypa makisninmantaj jaywaykusonqanku.+ Qanqa Babiloniamanta reypa ñawisninta qhawanki, paytaj qanwan uyapura parlanqa, Babiloniamantaj apasonqa’,+ nispa.
4 Judamanta rey Sedequías, Jehová Diospa nisqanta uyariy: ‘Jehová Diosqa kayta qanmanta nin: “Qanqa mana espadawanchu wañuchisqa kanki.
5 Qanqa mana ima llakiyniyoj wañupunki.+ Pʼampakunayki pʼunchayqa sumajta qʼapaj qhorasta ruphachenqanku, imaynatachus tatasniykipaj, pikunachus qanmanta ñaupajta reyes karqanku chaykunapaj ruwarqanku ajinata. Runasqa qanrayku waqaspa nenqanku: ‘Ay reyníy’, nispa. ‘Noqamin chaytaqa nini’ nispa nin Jehová Diosqa”’”’”.
6 Profeta Jeremiasqa Jerusalenpi tukuy chayta willarqa Judamanta rey Sedequiasman.
7 Chaypachallataj Babiloniamanta reypa soldadosnenqa, maqanakusharqanku Jerusalenpa contranpi, jinallataj Judapi puchoj llajtaspa contrankupipis,+ nisunman Lakís+ llajtaj contranpi, Azecá+ llajtaj contranpi ima. Imaraykuchus Judá nacionpa sumaj jarkʼachasqa llajtasninmantaqa chay llajtasllaña puchorqanku.
8 Jehová Diosqa Jeremiaswan parlarqa, rey Sedequías Jerusalenpi runaswan uj tratota ruwasqanmanta qhepataña. Sedequiasqa paykunawan tratota ruwasqa tukuyninku esclavosninkuta kacharipunankupaj.+
9 Ajinamanta tukuy hebreo esclavos kacharichisqa kanankupaj, qharis, warmis ima, manaña judío hermanosnillankutaj esclavosninku kanankupaj.
10 Tukuy kuraj kamachejkuna, jinallataj tukuy runaspis Sedequiasta kasorqanku. Paykunaqa nisqanku, trato ruwasqankuman jina esclavosninkuta, esclavasninkutapis kacharipunankuta, manañataj esclavosninkuta jinallapunichu japʼikunankuta. Paykunaqa kasukuspa esclavosninkuta kachariporqanku.
11 Aswan qhepamantaj kachariporqanku chay esclavosninkuta, chay esclavasninkutapis watejmanta kutichimorqanku a la fuerzalla esclavosninkuman tukuchinankupaj.
12 Chayrayku Jehová Diosqa watejmanta Jeremiaswan parlallarqataj. Jehovaqa nerqa:
13 “Israelpa Diosnin Jehovaqa kayta nin: ‘Ñaupa tatasniykichejta Egiptopi esclavos kasqankumanta orqhomorqani chay pʼunchayqa,+ paykunawan uj tratota ruwarqani.+ Paykunamanqa nerqani:
14 “Qanchis watas juntʼakojtin, qankunaqa rantikorqankichej chay hebreo hermanosniykichejta kacharipunkichej, pikunawanchus sojta watata sirvichikorqankichej chaykunata. Paykunataqa kacharipunaykichej tiyan”,+ nispa. Ñaupa tatasniykichejtajrí mana kasuwarqankuchu, nitaj uyariwarqankuchu.
15 Qankunarí mana ñaupa tatasniykichej jinachu ruwarqankichej. Astawanpis kunallanraj ñaupaqeypi allin kajta ruwarqankichej runa masiykichejta kacharipuspa. Qankunaqa ñaupaqeypi uj tratota ruwarqankichej, sutiywan sutichasqa kashan chay wasipi.
16 Jinapis qankunaqa esclavosta kacharipusqaykichejmanta pesachikorqankichej. Chantá sutiyta chʼichicharqankichej,+ kachariporqankichej chay esclavosta, chay esclavasta kutichimuspa, a la fuerzalla watejmanta esclavosman tukuchispa ima. Paykunataqa maymanchá riyta munanku chayman rinankupaj kachariporqankichej kanpis’, nispa.
17 ”Chayrayku Jehová Diosqa nin: ‘Qankunaqa mana kasuwarqankichejchu, nitaj hermanoykichejta, ni runa masiykichejtapis kacharerqankichejchu.+ Chayrayku kunan noqa qankunata kacharichisqaykichej, nispa nin Jehová Diosqa. Noqa kacharichisqaykichej espadawan wañunaykichejpaj, jinallataj wañuchej onqoywan, yarqhaywan ima.+ Chantá kay jallpʼamanta tukuy gobiernos qankunata rikuspa mancharenqanku.+
18 Trato ruwasqayta pʼakejkunataqa enemigosninkuman jaywaykusaj. Paykunaqa ñaupaqeypi trato ruwasqankuta mana juntʼarqankuchu. Chay tratotaqa noqawan ruwarqanku uj waka uñata khuskanmanta partiytawan, chaypa chaupinta pasaspa.+
19 Chay khuskanmanta partisqa waka uñaj chaupintaqa pasarqanku: Judamanta kuraj kamachejkuna, Jerusalenmanta kuraj kamachejkuna, reypa kamachina wasinmanta autoridades, sacerdotes, nacionmanta tukuy runas ima.
20 Noqaqa paykunata enemigosninkoj makinkuman jaywaykusaj, pikunachus paykunata wañuchiyta munanku, chaykunaj makinkuman. Paykunaj ayasninkutaqa* pʼisqos, jallpʼapi purej animales ima mikhukaponqanku.+
21 Noqaqa Judamanta rey Sedequiasta, kuraj kamachisnintapis enemigosninkoj makinkuman jaywaykusaj, pikunachus paykunata wañuchiyta munanku, chaykunaj makinkuman, jinallataj Babiloniamanta reypa soldadosninpa makinkumanpis,+ pikunachus kaymanta ripushanku chaykunaj makinkuman’,+ nispa.
22 ”Jehová Diosqa nin: ‘Noqa kamachisaj paykuna kutimunankuta, watejmantataj paykunata pusamusaj kay llajtaman. Paykunaqa kay llajtawan maqanakonqanku, japʼikapuspataj ninawan ruphaykuchenqanku.+ Noqaqa Judamanta llajtasta chʼinpachata saqesaj, ni uj runayojta’,+ nispa”.
Sutʼinchaykunasnin
^ Hebreo parlaypeqa nin, “Nabucodorosor”. Kay suteqa ajinatapis escribikullantaj.
^ Chayri “cuerposninkutaqa”.
