Números 23:1-30
23 Chantá Balaamqa Balacman nerqa: “Kaypi ruway qanchis altaresta,+ wakichipuwaytaj qanchis torosta, qanchis carnerostawan”,* nispa.
2 Balactaj chay ratopacha ruwarqa Balaampa nisqanta. Chantá Balacwan Balaamwanqa uj torotawan uj carnerotawan qʼolacherqanku* sapa altarpi.+
3 Chaymanta Balaamqa Balacta nerqa: “Kayllapi quedakuy, qʼolachina ofrendayki chaypi. Noqataj jaqayman risaj. Ichapis Jehová Diosqa noqaman rikhuriwanqa. Kutimuspataj willasqayki imatachus niwanqa chayta”, nispa. Chaymanta Balaamqa wicharerqa uj qʼara lomaman.
4 Chaypitaj Diosqa Balaamman rikhurerqa.+ Balaamtaj Diosman nerqa: “Qanchis altaresta ruwani fila filallata, sapa uj altarpitaj qʼolachini uj torotawan uj carnerotawan”, nispa.
5 Jehová Diostaj Balaampa siminman churarqa imatachus ninanta,+ nerqataj: “Kutispa, Balacman nimuy imatachus nishayki chayta”, nispa.
6 Balaamtaj kutispa, Balacta tariparqa qʼolachina ofrendan chaypi sayashajta, Moabmanta tukuy kuraj kamachejkunatawan khuska.
7 Chaymanta Balaamqa, Diospa nisqasninta sutʼinchayta qallarerqa:+
“Moabmanta rey Balacqa Arammantapacha kayman pusachimuwan,+inti llojsimuy ladopi kaj orqosmantapacha:
‘Jamuy ari, Jacobta maldecipuway,Israelta juchachay’,+ nispa.
8 ¿Ima nispataj maldeciyman kasqa pikunatachus Dios mana maldecinchu chaykunatari?
¿Ima nispataj juchachayman kasqa pikunatachus Jehová Dios mana juchachanchu chaykunatari?+
9 Chhanka patamantapacha paykunata rikuni.
Loma patasmantapacha paykunata qhawashani.
Paykunaqa sapallanku tiyakushanku.+
Paykunaqa waj nacionesmanta waj jina kasqankuta ninku.+
10 ¿Pitaj Jacobpa mirayninta yupayta atinmanri? Paykunaqa tʼiyu jina may chhika kanku.+
¿Pitaj yupayta atinman Israelpa khuskanninpa khuskannillantapisri?
Allin kanman kay cheqan runas jina wañunay,tukukuyniypis paykunaj tukukuynin jina kanan”, nispa.
11 Chantá Balacqa Balaamta nerqa: “¿Imatataj kayta ruwawankiri? Noqaqa pusachimorqayki enemigosniyta maldecipunawaykipaj. Qantajrí paykunata bendeciykunkiraj”,+ nispa.
12 Balaamtaj kuticherqa: “¿Manachu noqaqa nerqayki imatachus Jehová Dios simiyman churanqa chayllata parlasaj nispa?”+
13 Balactajrí payman nerqa: “Ama jina kaspa, waj cheqamanñataj rina ari. Chaymantaqa wakillanta rikunki, mana tukuyninkutachu. Chaymantapacha maldecipuwanki chay runasta”,+ nispa.
14 Ajinamanta Balaacqa Balaamta pusarqa Zofim cheqaman, Pisgá loma pataman.+ Chaypitaj qanchis altaresta ruwaspa, sapa ujninpi qʼolacherqa uj torotawan uj carnerotawan.+
15 Chantá Balaamqa Balacta nerqa: “Kayllapi quedakuy, qʼolachina ofrendayki chaypi. Chaykamataj jaqayman risaj Dioswan parlamoj”, nispa.
16 Jehová Diosqa Balaamman rikhurispa, siminman churarqa imatachus ninanta,+ nerqataj: “Kutispa, Balacman nimuy imatachus nishayki chayta”, nispa.
17 Balaamqa kutispa Balacta tariparqa qʼolachina ofrendan chaypi sayashajta, Moabmanta kuraj kamachejkunatawan khuska. Balactaj payta taporqa: “¿Ima nisunkitaj Jehová Diosri?”, nispa.
18 Balaamtaj Diospa nisqasninta sutʼinchayta qallarerqa:+
“Balac jatarikuy, uyariytaj.
Ziporpa wawan Balac, uyariway.
19 Diosqa mana runachu llullasta parlananpajqa.+
Nitaj runaj wawanchu nisqanmanta wajta ruwananpajqa.*+
Imatapis nin chayqa, ¿manachu juntʼanqa?
Parlan chaypis, ¿manachu ruwanqa?+
20 Noqaqa bendecinaypaj jamuni.
Dios bendecin+ chayqa, mana chaytaqa qʼewiymanchu.+
21 Payqa mana saqenchu Jacobta layqachinankuta.
Mana saqenchu Israel ima llakiypipis rikhurinanta.
Jehová Diosninkoqa paykunawan kashan.+
Paykunaqa jatunmanta qhaparinku Diosqa reyniyku nispa.
22 Diosqa paykunata Egiptomanta orqhomorqa.+
Payqa kʼita toroj wajrasnin jina may atiyniyoj paykunata yanapananpaj.+
23 Jacobta layqaswan* maldecichejtinkupis, mana imananchu.+
Adivinaspa Israelta ima qhatirinanta nejtinkupis, qhasilla.+
Kunanqa Jacobmanta, Israelmantawan ninkuman:
‘Qhawariychej imatachus Dios ruwasqanta’, nispa.
24 Kay runasqa uj león jina sayarenqanku.
Paykunaqa uj león jina jatarenqanku,+imaynatachus uj leonqa mana puñuykunchu japʼisqan animalta mikhuykunankama,wañuchisqan animalespa yawarninta llajwarqonankama ajinata”, nispa.
25 Chaymanta Balacqa Balaamta nerqa: “Sichus kay runasta manapuni maldeciyta atinkichu chayqa, amallataj bendeciychu ari”, nispa.
26 Balaamtaj Balacman kuticherqa: “¿Manachu nerqayki ‘noqaqa Jehová Diospa niwasqallanta ruwasaj’ nispa?”.+
27 Balactajrí Balaamman nerqa: “Ama jina kaspa, wajnejmanñataj rina ari. Ichapis Diospajqa* allin kanqa chaymantapacha kay runasta maldecipunawayki”,+ nispa.
28 Ajinapi Balacqa Balaamta pusarqa Peor loma pataman, maymantachus Jesimón* rikukun chayman.+
29 Chantá Balaamqa Balacta nerqa: “Kaypi ruwapuway qanchis altaresta, wakichipuwaytaj qanchis torosta, qanchis carnerostawan”,+ nispa.
30 Balactaj Balaampa nisqanta ruwarqa, sapa altarpi qʼolacherqa uj torotawan uj carnerotawan.
Sutʼinchaykunasnin
^ Carnero: waj lugarespi ninku mocho, oveja toro.
^ Chayri “ruphacherqanku”.
^ Chayri “pesachikunanpajqa”.
^ Chayri “brujoswan”.
^ Chayri “cheqa Diospajqa”. Glosariopi cheqa Dios nisqata leeriy.
^ Ichá nillanmantaj “chʼin jallpʼa”.
