Números 6:1-27
6 Jehová Diosqa Moisesman nillarqataj:
2 “Israelitasman kay jinata niy: ‘Sichus uj qharipis chayri uj warmipis Jehová Diospaj tʼaqasqa nazareo*+ kananta nin chayqa,
3 ama tomachunchu vinota, nitaj ima machachej ujyanatapis. Ama tomachunchu vinomanta ruwasqa vinagreta, nitaj waj machachej ujyanasmanta ruwasqa vinagretapis.+ Ama tomachunchu uvas chʼirwasqata, nitaj mikhuchunchu uvasta, ni uvas kʼisatapis.
4 Nazareo kashaspaqa amapuni mikhuchunchu uvasmanta ima ruwasqatapis, kachun mana poqosqa uvasmanta chayri qarasninmantapis.
5 ”’Nazareo kashaspaqa ama chujchanta kʼutukuchunchu.+ Payqa chujchanta wiñachikunan tiyan Jehová Diospaj tʼaqasqa kasqanta rikuchinanpaj, mashkha tiempopajchus ajina tʼaqasqa kananta nerqa chay tiempo juntʼakunankama.
6 Jehová Diospaj tʼaqasqa kashaspaqa ama runa wañusqaman* qayllaykuchunchu.*
7 Tatan, maman, hermanon chayri hermanan wañupojtinpis amapuni qayllaykuchunchu, ama jinamanta chʼichichakunanpaj.+ Umanpi wiñachikusqan chujchanqa señal kashan Diospaj tʼaqasqa nazareo kasqanmanta.
8 ”’Mashkha tiempopajchus nazareo kananta nisqan juntʼakunankamaqa Jehová Diospaj tʼaqasqallapuni kanan tiyan.
9 Sichus pipis kaymanta jinalla chay nazareoj qayllanpi wañunman,+ Diospaj tʼaqasqa kasqanta rikuchej chujchantataj chʼichipaj qhawachinman chayqa, payqa umanta pʼajlakunan tiyan+ ima pʼunchaychus llimphuchasqa kanqa chay pʼunchay, nisunman qanchis kaj pʼunchay.
10 Pusaj kaj pʼunchaypitaj sacerdoteman apanan tiyan iskay jurkʼutasta chayri iskay paloma irpasta, tinkukuna toldo punkuman.
11 Sacerdoteqa ujnin kajta jaywanqa jucharayku ofrendapaj, ujnintataj qʼolachina* ofrendapaj. Ajinamanta chay runaj juchan perdonasqa kanqa+ wañusqawan* chʼichichakusqanmanta. Chantá chay runaqa chay pʼunchayllataj Diospaj tʼaqakunan tiyan chujchanta watejmanta wiñachikuspa.
12 Payqa watejmanta qallarenqa Jehová Diospaj tʼaqasqa nazareo kayta. Apamonqataj uj watayoj maltón carnerota,* pantasqarayku ofrendapaj. Chaywanpis ñaupaj pʼunchaykunataqa manaña yupanqachu, nazareo kasqanta chʼichichasqanrayku.
13 ”’Kaymin leyqa nazareo runapaj: Nazareo kasqan tiempo juntʼakojtin,+ tinkukuna toldo punkuman renqa.
14 Jehová Diosmantaj apanqa kay ofrendasta: uj watayoj sano maltón carnerota qʼolachina ofrendapaj,+ uj watayoj sano malta ovejata jucharayku ofrendapaj,+ uj sano carnerotawan khuska mikhurikuy ofrendapaj.+
15 Uj canastapitaj apanqa ñutʼu jakʼumanta aceitewan puñasqa* muyu tʼantasta* mana levadurayojta, mana levadurayoj tortillastawan aceitewan jawisqasta, apallanqataj chʼaki mikhuy ofrendata,+ vino ofrendastapis.+
16 Sacerdotetaj tukuy chaykunata Jehová Diospa ñaupaqenman qayllaykuchenqa. Ñaupajtaqa Diosman jaywanqa jucharayku ofrendata, qʼolachina ofrendatawan.
17 Sacerdoteqa Jehová Diosman jaywallanqataj khuska mikhurikuy ofrendapaj carnerota, canastapi mana levadurayoj muyu tʼantastawan. Chaytawan khuska jaywallanqataj chʼaki mikhuy ofrendata,+ vino ofrendatapis.
18 ”’Chantá chay nazareo runaqa, umanmanta chujchanta pʼajlakuchun+ tinkukuna toldo punkupi. Chay chujchanta japʼispataj, khuska mikhurikuy ofrendaj uranpi kashan chay ninaman churaykuchun. Chay chujchantaqa wiñachikorqa Diospaj tʼaqasqa nazareo kashaspa.
19 Nazareo kasqanmanta umanpi señalta pʼajlachikojtintaj, sacerdoteqa chay runaj makisninman churanqa carneroj maki palanta yakupi chayasqata,+ chantá canastamanta mana levadurayoj uj muyu tʼantata,* mana levadurayoj uj tortillatawan.
20 Sacerdotetaj chaykunata kayman jaqayman kuyuchenqa kuyuchisqa ofrendata jina Jehová Diospa ñaupaqenpi.+ Chaytaj sacerdotepaj santopaj qhawasqa kanqa, kuyuchisqa ofrenda pecho jina, jaywasqa pierna jina.+ Chantá nazareo karqa chay runaqa vinota tomayta atillanqaña.
21 ”’Sichus uj nazareo runa imatachus qonan kasqanmanta, kapusqanman jina waj ofrendastawan Jehová Diosman qonanta nin chayqa, chay nisqantaqa juntʼananpuni tiyan. Chaymin nazareopaj leyqa’”.+
22 Chantá Jehová Diosqa Moisesman nillarqataj:
23 “Kayta niy Aaronman, wawasninmanwan: ‘Israelitasta bendecishaspaqa+ kay jinata niychej:
24 “Jehová Diosqa bendecisuchun,+ waqaychasuchuntaj.
25 Jehová Diosqa qanwan kʼacha kachun,*+ allin ñawiwantaj qhawasuchun.
26 Jehová Diosqa qanwan kʼacha kachun, sonqo tiyaykuytataj qosuchun”, nispa’.+
27 Paykunaqa israelitasta bendecinankupaj sutiyta oqharichunku,+ noqataj paykunata bendecisaj”,+ nispa.
Sutʼinchaykunasnin
^ Hebreo parlaypeqa nin, nazír. Chaytaj niyta munan ajllasqa, jaywasqa, tʼaqasqa. Glosariopi nazareo nisqata leeriy.
^ Chayri “amallataj wañusqa kashan chay qayllasman richunchu”.
^ Chayri “ruphachina”.
^ Carnero: waj lugarespi ninku mocho, oveja toro.
^ Chay muyu tʼantasqa chaupinpi juskʼuyoj karqa.
^ Puñay: waj lugarespi ninku ñatuy.
^ Chay muyu tʼantaqa chaupinpi juskʼuyoj karqa.
^ Hebreo parlaypeqa nin, “uyanwan kʼanchasuchun”.
