Esdras 9:1-15
9 Chay imas ruwakusqanmanta qhepamantaj, kuraj kamachejkunaqa qayllaykamuwaspa niwarqanku: “Israelitaspis, sacerdotespis, levitaspis mana karunchakunkuchu kay qayllapi kaj nacionesmanta, nillataj chay millay ruwasqasninkumantapis.+ Mana tʼaqakunkuchu cananeosmanta, hititasmanta, perizitasmanta, jebuseosmanta, ammonitasmanta, moabitasmanta, egipciosmanta,+ nillataj amorreosmantapis.+ Paykunaqa chay nacionespa millay ruwasqasninkuta ruwashallankupuni.
2 Paykunapis wawasninkupis chay nacionesmanta warmiswan casaranku.+ Ajinamanta paykunaqa Diospaj tʼaqasqa miraymanta kashaspapis+ chay nacioneswan chajruykukunku.+ Mana chayllachu, chay juchata ñaupajta ruwajkunaqa karqanku kuraj kamachejkuna, paykunaj mandonkupi kashanku chay waj kamachejkunapis”, nispa.
3 Chayta uyariytawan ukhu pʼachayta, mana mangasniyoj pʼachaytawan llikʼerqani. Chujchayta, barbaytawan* sikʼirakorqani. Chantá manchay llakisqa tiyaykukorqani.
4 Israelpa Diosninpa palabranta may jatunpaj qhawajkunaqa, presos apasqa kasqankumanta kutinpojkunaj juchankurayku noqaman muyurisqa tantakamorqanku. Noqatajrí ajina tiyasqallapuni karqani, manchay llakisqa, tarde ladota chʼaki mikhuy ofrendata jaywana horakama.+
5 Tarde ladota chʼaki mikhuy ofrendata jaywana horaña kajtintaj,+ llakisqa tiyashasqaymanta sayarikorqani. Chantá ajina llikʼisqa pʼachasniyoj kashaspa, pampapi qonqorikorqani, makisniytataj Jehová Diosniyman oqharerqani.
6 Chantá nerqani: “Diosníy, manchay pʼenqasqa kashani, pʼenqasqa kasqayrayku ni pataman qhawarimusuytapis atinichu. Diosníy, pantasqasniykoqa pataykuman mayta tantaykukun, juchasniykutaj cielokamapuni montonaykukun.+
7 Ñaupa tatasniykoj tiemponkumantapacha kunankama mayta juchallikuyku.+ Chay juchasniykuraykutaj noqaykupis, reyesniykupis, sacerdotesniykupis waj nacionespa reyesninkuman jaywasqa karqayku. Espadawan wañuchisqa karqayku,+ waj nacionesman presos jina apasqa karqayku,+ tukuy imaykuta suwawarqayku,+ maytataj kʼumuykachachiwarqayku. Kunanpis kikillantaj kashayku.+
8 Ajinapis qanqa Jehová Diosniyku, uj ratollatapis allinpaj qhawashawayku. Diosníy, wakinta ayqemojta saqewarqayku, santo lugarniykipitaj allin kausayta qowayku+ ñawisniyku kʼancharinanpaj, ajinamanta tumpallatapis kusirichiwayku esclavos kashajtiykupis.
9 Esclavoslla kajtiykupis,+ qan Diosníy mana saqerpawaykuchu, runaj makinpi esclavos kashajtiykupis. Munakuwasqaykurayku Persiamanta reyeswan allinpaj qhawachiwayku.+ Ajinamanta kallpachawarqayku wasiykita ruwanaykupaj,+ chay urmasqa wasiykita watejmanta ruwanaykupaj, Judapi, Jerusalenpipis jarkʼasqa kanaykupaj.*
10 ”Diosníy, chay tukuy ima kashajtin, ¿imatá niykumanri? Noqaykoqa kamachiwasqaykuta mana kasukorqaykuchu,
11 mayqenkunatachus kamachisniyki profetasnejta qowarqayku chaykunata. Qan niwarqayku: ‘Japʼikapoj yaykunkichej chay jallpʼaspi runasqa millay kausayniyoj kanku. Chayrayku chay jallpʼasqa chʼichichasqa kashanku. Chay runasqa millay imasta ruwanku, jallpʼaj ujnin kantunmanta ujnin kantunkama millay ruwasqasninkuwan juntʼaykuchinku.+
12 Chayrayku ama warmi wawasniykichejta paykunaj qhari wawasninkuwan casarachinkichejchu, nillataj paykunaj warmi wawasninkuwan qhari wawasniykichejta casarachinkichejchu.+ Ama imatapis ruwaychejchu paykuna allin kausayniyoj kanankupajqa, nitaj qhapaj kanankupajpis.+ Chayta kasukuspaqa kallpayoj kankichej, jallpʼaj allin poqoynintataj mikhunkichej, chay jallpʼastataj wawasniykichejman herenciata jina saqenkichej wiñaypaj wiñaynintinpaj’, nispa.
13 Qantajrí Diosníy, mana juchasniykuman jinapunichu castigawarqayku,+ astawanqa kaypi kajkunata ayqejta saqewarqayku.+ Noqaykutaqa mana allin imasta ruwasqaykurayku, juchasniykuraykutaj, chay tukuy imas qhatiriwarqayku.
14 Kunantaj, ¿watejmantachu kamachiwasqaykuta mana kasukuspa chay millay kausayniyoj runaswan wawasniykuta casarachiykuman kasqa?+ ¿Manachu noqaykupaj sinchʼita phiñakuwaj, tukuyniykutataj chinkarparichiwaykuman ni uj puchuyojta?
15 Israelpa Diosnin Jehová, qanqa cheqan Dios kanki,+ chayrayku noqaykumanta wakenqa kunankama kausashayku. Noqaykoqa ñaupaqeykipi juchayoj kayku, chayta ruwasqaykumanta mana ñaupaqeykipi sayasqa kayta atiykumanchu”,+ nispa.
Sutʼinchaykunasnin
^ Barba: waj lugarespi ninku chhunka, sunkha.
^ Chayri “uj rumi perqata qowayku”.
