Jueces 6:1-40
6 Israelitasqa watejmanta Jehová Diospa qhawayninpi sajra imasta ruwallarqankutaj.+ Chayrayku Jehová Diosqa madianitaspa makisninkuman paykunata jaywaykorqa qanchis watasta.+
2 Madianitasqa israelitasta mayta ñakʼaricherqanku.+ Israelitastaj madianitasta manchachikuspa, pakakunasta* ruwakamorqanku orqospi, cuevaspi, mana chayay atina lugarespi ima.+
3 Israelitas imatapis tarpojtinku, madianitasqa amalequitaspis,+ jinallataj inti llojsimuynejpi tiyakojkunapis,+ paykunawan maqanakoj rej kanku.
4 Israelitaswan maqanakunankupaj muyuyninkupi jarakamoj kanku, chajrasninkutapis qʼalata tʼustiykoj kanku Gazakama. Israelitas mikhunankupajqa mana imatapis puchuchejchu kanku. Nillataj saqejchu kanku ni ovejastapis, ni wakastapis, ni burrostapis.+
5 Paykunaqa uywasninkuwan rej kanku, toldosninkuta* apariykukuspa, langostas jina may chhika rej kanku.+ Paykunapis, camellosninkupis mana yupay atina karqanku.+ Israelitaspa jallpʼasninkumantaj juntʼaykoj kanku tukuy imata tukuchinankupaj.
6 Ajinata madianitas ruwasqankurayku, israelitasqa mayta pobreyaykorqanku. Chantá paykunaqa Jehová Diosman qhaparikorqanku yanapata mañakuspa.+
7 Israelitas madianitasmanta kacharichinanta Jehová Diosmanta mañakojtinku,+
8 Jehová Diosqa uj profetata* kachamorqa. Paytaj israelitasman nerqa: “Kayta nin Israelpa Diosnin Jehovaqa: ‘Noqa Egiptomanta orqhomorqaykichej, chaypi esclavos kashajtiykichej.+
9 Mana Egipciospa makisnillankumantachu kacharicherqaykichej, manachayqa tukuy pikunachus ñakʼarichisorqachej chaykunamantapis. Paykunataqa ñaupaqeykichejmanta wijchʼorqani, jallpʼasninkutataj qankunaman qoporqaykichej.+
10 Nerqaykichejtaj: “Noqamin Jehová Diosniykichejqa kani.+ Amapuni amorreospa diosesninkuta yupaychankichejchu,* pikunaj jallpʼasninkupichus tiyakushankichej chaykunaj diosesninkuta”,+ nispa. Chaywanpis qankunaqa mana kasuwarqankichejchu’,*+ nispa”.
11 Chaypacha Jehová Diospa angelnenqa jamuspa+ uj jatun sachʼa urapi tiyaykukorqa, Ofrá chaypi. Chay sachʼaqa abí-ezrita+ Joaspata karqa. Joaspa wawan Gedeontaj,+ trigota wajtasharqa uvas sarunapi, madianitas ama trigota rikunankupaj.
12 Ajinapi Jehová Diospa angelnenqa payman rikhurispa nerqa: “Wapu soldado Gedeón, Jehová Diosqa qanwan kashan”,+ nispa.
13 Gedeontajrí kuticherqa: “Ay wiraqochíy, sichus Jehová Dios noqaykuwan kashan chayqa, ¿imaraykutaj tukuy kay imas qhatirishawaykuri?+ ¿Maytaj tatasniyku tʼukuna imasta willawasqaykuri?+ Paykunaqa niwaj kayku: ‘Jehová Dios Egiptomanta orqhomuwarqanchej’, nispa.+ Kunantaj Jehová Diosqa saqerpariwayku,+ madianitaspa makisninkumantaj jaywaykuwayku”, nispa.
14 Jehová Diostaj payta qhawarispa nerqa: “Rispa kallpaykiwan israelitasta kacharichimuy madianitaspa makisninkumanta.+ Noqamin kachashayki”, nispa.
15 Gedeontajrí kuticherqa: “Ay Jehová Diosníy, ¿imaynatataj noqa israelitasta kacharichiymanri? Familiayqa Manasés ayllu* ukhupi familiasmanta aswan juchʼuy. Noqataj tataypa familian ukhupeqa mana imapischu kani”, nispa.
16 Jehová Diostaj nerqa: “Noqa qanwan kasaj.+ Chayrayku madianitastaqa uj runata jinalla atipanki”, nispa.
17 Gedeontaj nerqa: “Sichus allin ñawiwan qhawawanki chayqa, uj señalta rikuchiway ari, qanpuni noqawan parlashasqaykita yachanaypaj.
18 Ama jina kaspa amallaraj ripuychu, mikhuyta waykʼuspa apamusunaykama”,+ nispa. Angeltaj kuticherqa: “Kayllapi suyasqayki kutimunaykikama”, nispa.
19 Gedeonqa rispa uj chivitota ñakʼaytawan* wakichimorqa, arroba jina* jakʼumantataj mana levadurayoj tʼantata ruwamorqa.+ Aychataqa uj canastaman churaykorqa, caldontataj uj mankaman. Tukuy chaytataj angelman aparqa, chay jatun sachʼa uraman.
20 Chantá Diospa* angelnenqa payta nerqa: “Jaqay jatun rumi pataman chay aychata churamuy, chay mana levadurayoj tʼantatawan, patanmantaj caldota jichʼanki”, nispa. Gedeontaj chay nisqanta ruwarqa.
21 Chaymanta Jehová Diospa angelnenqa, makinpi japʼisharqa chay bastonwan tʼojsirerqa chay aychata, mana levadurayoj tʼantatapis. Tʼojsirisqantawantaj chay jatun rumimanta nina lauray llojsimuspa aychata ruphaykorqa, chay mana levadurayoj tʼantatapis.+ Jehová Diospa angelnintaj chinkariporqa.
22 Ajinapi Gedeonqa repararqa Jehová Diospa angelninpuni kasqanta.+
Chay ratopachataj nerqa: “Ay Tukuyta Kamachej Señor Jehová Diosníy. Jehová Diospa angelninwan uyapura tinkuni”,+ nispa.
23 Jehová Diostajrí nerqa: “Sonqo tiyaykuy qanpaj kachun. Ama mancharikuychu,+ mana wañunkichu”, nispa.
24 Chaypi Gedeonqa Jehová Diospaj uj altarta* ruwaporqa. Chaymantapacha chay altarqa sutikun Jehová-Salom.*+ Kunankamataj kakushallanpuni abí-ezritaspa llajtanku Ofrapi.
25 Chay chʼisipacha Jehová Diosqa Gedeonta nerqa: “Tataykej torillonta apamuy, qanchis watayoj iskay kaj torillonta. Chantapis tataykejpata Baalpa altarnin tiyapun chayta thuñimuy, chay altar qayllapi kashan chay yupaychana kʼullu postetapis* kʼutumuy.+
26 Jinaspataj chay jarkʼachasqa pata lugarpi Jehová Diospaj uj altarta ruwamuy, rumista filaraspa. Chantá chay iskay kaj torillota apamuspa, yupaychana kʼullu posteta kʼuturasqayki pataman churanki, qʼolachina* ofrendata jinataj jaywanki”, nispa.
27 Chaypacha Gedeonqa kamachisninmanta chunka qharista pusariykukuspa, Jehová Diospa kamachisqanta ruwamorqa. Chaywanpis mana pʼunchaychu chayta ruwarqa, manachayqa tutan. Payqa tatanpa familianta manchachikoj, chay llajtayoj runastapis.
28 Qʼayantin tutamanta chay llajtayoj runas jatarinankupajqa, Baalpa altarnenqa thuñisqa rikhurisqa, chay qayllapi kasharqa chay yupaychana kʼullu postepis kʼutusqa kasqa, uj mosoj altarpitaj iskay kaj torillo qʼolachisqa kasqa.
29 Chayta rikuspa paykunapura tapunakorqanku: “¿Pitaj kayta ruwanman karqari?”, nispa. Runasta tapuspataj yacharqanku Joaspa wawan Gedeón chayta ruwasqanta.
30 Chayta yachaspa chay llajtayoj runasqa Joasta nerqanku: “Wawaykita orqhomuy wañuchinaykupaj. Pay Baalpa altarninta thuñiykusqa, chay qayllapi kasharqa chay yupaychana kʼullu postetapis kʼuturpasqa”, nispa.
31 Joastajrí+ chay phiñasqa runasman kuticherqa: “¿Qankunachu Baalman kutikunaykichej tiyan? ¿Qankunachu Baalta salvanaykichej tiyan? Pichus Baalman kutikojqa kunanpacha wañuchisqa kanqa.+ Baal diospuni chayqa, pay kikin jarkʼakuchun,+ paypa altarnintacharí thuñirpanku”, nispa.
32 Chaypacha Joasqa Gedeonta Jerubaal* nispa suticharqa, nerqataj: “Kikin Baal jarkʼakuchun, paypa altarnintacharí thuñirpanku”, nispa.
33 Chaypacha madianitaswan,+ amalequitaswan,+ chantá inti llojsimuynejmanta runaswanqa ujchaykukuspa+ mayuta chimparqanku, Jezreel ura pampaspitaj jarakorqanku.
34 Chaypacha Jehová Diospa espiritonqa Gedeonman jamorqa.+ Wajramanta putututa waqachejtintaj,+ abí-ezritas+ tantakamorqanku payta yanapanankupaj.
35 Chantapis tukuynin Manasés ayllumanta kajkunata wajyachimorqa. Paykunapis yanapaj jamullarqankutaj. Wajyachimullarqataj Aser ayllumanta kajkunata, Zabulón ayllumanta kajkunata, jinallataj Neftalí ayllumanta kajkunatapis. Paykunapis Gedeonman jamullarqankutaj.
36 Chaymanta Gedeonqa Diosman nerqa: “Sichus niwasqaykiman jina israelitasta salvanaypaj yanapawanki chayqa,+
37 kay jina kachun: Era* pataman uj oveja qarata churasaj. Sichus chay qara tutamanta chhullawan chʼaritan rikhurenqa, tukuy pampataj chʼaki kanqa chayqa, chaypi yachasaj israelitasta salvanaypaj yanapanawaykita, qan niwasqaykiman jina”, nispa.
38 Ajinapunitaj karqa. Gedeonqa qʼayantin paqarin tutamanta jatarikuspa, chay qaramanta yakuta chʼirwarqa uj fuente juntʼata.
39 Chaywanpis Gedeonqa Diosta ujtawan nillarqataj: “Uj señaltawan mañarikusqayki, ama noqawan phiñakuychu. Ama jina kaspa kay kutillatawanña uj señalta mañakusqayki, noqawan kashasqaykita yachanaypaj. Ama jina kaspa kay kuteqa tukuynin jallpʼañataj joqʼo rikhurichun, qarataj chʼakilla kachun”, nispa.
40 Diostaj ajinata chay chʼisi ruwarqa. Qʼayantin paqarin qaraqa chʼaki kakusharqa, jallpʼataj chhullawan joqʼochasqa kasharqa.
Sutʼinchaykunasnin
^ Ichá nillanmantaj “jallpʼa ukhupi depositosta”.
^ Chayri “carpasninkuta”.
^ Hebreo parlaypeqa nin, “manchachikunkichejchu”.
^ Hebreo parlaypeqa nin, “mana nisqayta uyariwarqankichejchu”.
^ Uj aylloqa uj familiamanta miraj ashkha familias kanku.
^ Ñakʼay: waj lugarespi ninku degollay, wañuchiy.
^ Hebreo parlaypeqa nin, “uj efá”. Yanapa B14 nisqata leeriy.
^ Chayri “cheqa Diospa”. Glosariopi cheqa Dios nisqata leeriy.
^ Jehová-Salom suteqa niyta munan Jehová Diosmin sonqo tiyaykoyqa.
^ Glosariopi yupaychana kʼullu poste nisqata leeriy.
^ Chayri “ruphachina”.
^ Jerubaal suteqa niyta munan kikin Baal jarkʼakuchun leymanta valekuspa.
