42 yachachiy

Juk china burro parlan

¿IMA burrollatapis parlaqta uyarinkichu? ‘Mana, ¿ichari?’ ‘Animalkunaqa mana parlankuchu’. Chaywanpis Bibliapi juk china burro parlasqanta willakun. ¿Imaynataq chay kanman karqari?

Israelitakunaqa Canaán jallpʼaman yaykunankupaq wakichikurqankuña. Balac Moabmanta reyqa, israelitakunata manchachikun. Chayrayku, israelitakunata maldecinanpaq, juk yachayniyuq qharita Balaam sutiyuqta waqyan. Achkha qullqita japʼinanrayku, Balaamqa juk china burroman wicharispa, Balacwan tinkuq richkarqa.

Jehová mana Balaam llaqtanta maldecinanta munarqachu. Chayrayku juk jatun espadayuq angelta Balaamta sayachinanpaq kacharqa. Balaam mana angelta rikurqachu, china burrontaq rikurqa. China burroqa angelmanta karunchakuyta munaspa, siriykukurqa. Balaamtaq mayta phiñakuspa, burronta kʼaspinwan siqʼurqa.

Jehová china burro parlasqanta Balaamta uyarichirqa. ‘¿Imanayki, kayjinata siqʼunawaykipaqri?’, nispa china burro tapurqa.

Balaamtaq: ‘Wamputajina rikuchiwanki. ¡Sichus makiypi cuchillo kanman chayqa, kunitan wañuchiykiman!’, nispa qhaparirqa.

‘¿Maykʼaqllapis jinata ruwarqaykichu?’, nispa burro tapurqa.

‘Mana’, nispa Balaam kutichin.

Chaymantaraq Jehová Balaamta ñanpi jatun espadayuq angelta rikuchirqa. Angeltaq nirqa: ‘¿Ima nispataq china burroykita kimsa kutita siqʼunkiri? Ñuqa jamuni jarkʼasunaypaq, mana Israelta maldeciq rinaykipaq. Sichus burroyki mana sayanmanchu karqa, wañuwaqña karqa, manataq burroykita wañuchiymanchu karqa’, nispa.

Balaam kutichin: ‘Ñuqaqa juchallikuni. Mana ñanpi kasqaykita yacharqanichu’, nispa. Angelqa Balaam ñanninta ripunanta saqirqa, Balaamtaq Balacwan tinkumuq rirqa. Chaywanpis Balaamqa maldeciyta Israelta munarqa, Jehovataq paywan kimsa kutita llaqtanta bendecichin.

Números 21:21-35; 22:1-40; 23:1-30; 24:1-25.