90 yachachiy

Pukyupi juk warmiwan

JESÚS Samariapi pukyup qayllanpi samarikurqa. Discipulosnintaq mikhunata rantiq llaqtaman rirqanku. Jesuswan parlaq warmiqa, yakuta urqhuq jamurqa. Jesustaq nirqa: ‘Yakuta quriway’, nispa.

Warmi chayta uyarispa tʼukurqa. ¿Imaraykutaq? Jesús judío kasqanrayku, paytaq samaritana kasqanrayku. Judiosqa samaritanosta chiqnikuq kanku. ¡Mana paykunawan parlaqchu kanku! Chaywanpis, Jesusqa nipita chiqnikuqchu. Pay jinata nirqa: ‘Pichus yakuta mañarikususqanta yachawaq chayqa, qam yakuta mañarikuwaq, paytaq kawsay yakuta qusunkiman’, nispa.

‘Señor, mana imapis yakuta urqhunaykipaq kapusunkichu, yaku pukyutaq allin ukhu’, nispa warmi kutichirqa. ‘¿Maymantataq chay kawsachiq yaku kapunsunki?’, nispa tapurillantaq.

Jesustaq nirqa: ‘Kay pukyumanta yakuta ukyaptiykiqa, watiqmanta chʼakillasunqataq. Ñuqa yaku qusqayri, wiñaypaq runata kawsachinman’ nispa.

‘Señor, chay yakuta quway, manaña chʼakinawanpaq, nitaq kay pukyuman yakuta urqhuq jamunaypaq’, nispa warmi mañarikurqa.

Warmiqa ukyana yakumanta parlachkasqanta nirqa. Jesustaq Diosmanta, Reinonmantawan kasqanta parlachkarqa. Chayqa kawsayta quq yakujina. Wiñaypaq kawsachinman.

Jesús warmita nirqa: ‘Riy, qusaykita waqyaspa, kayman kutimuy’, nispa.

Warmitaq nirqa: ‘Mana qusay kapuwanchu’, nispa.

‘Chiqata parlanki. Chaywanpis phichqa qusayuq karqanki, kunan tiyakunki chayqa, mana qusaykichu’, nispa Jesús kutichirqa.

Warmiqa, Jesús chiqata parlasqanrayku, mana imanakuyta atirqachu. ¿Imaynatá Jesús kay imasta yacharqari? Ari, Jesús Diospa akllasqan Cristo karqa. Payta Dios cielomanta kachamurqa, yachaytataq qurqa. Jesuspa discipulosnin kutimuspa, Jesús samaritanawan parlachkasqanta rikuspa tʼukurqanku.

¿Imatataq Jesusmanta yachakunchik? Jesús tukuy laya runata munakurqa. Ñuqanchikpis payjinallataq kanachik tiyan. Mana pillatapis uyanta qhawaspa saqra kasqanta ninanchikchu tiyan. Jesusqa tukuypis wiñaypaq kawsanapaq yachakunankuta munan. Ñuqanchikpis kikillantataq yanapananchik tiyan.

Juan 4:5-43; 17:3.