80 yachachiy

Israelitas Babiloniamanta lluqsinku

MEDOSWAN persaswan Babiloniata urmachisqankumanta iskay wataña karqa. ¡Kunantaq israelitasta kachapuchkanku! Ari, paykunaqa Babiloniamanta lluqsichkanku. ¿Imaynata kacharichikunku? ¿Pitaq ripunankuta saqichkan?

Ciro paykunata kacharichkan, payqa Persia llaqtamanta rey. Manaraq Ciro nacekuchkaptin, Jehová Isaiasniqta Ciromanta kayta nirqa: ‘Imatachus munasqayta ruwanki. Qam llaqtata japʼikapunaykipaq punkuta kichasqasta saqikunqa’, nispa. Jinataq karqa, Ciro Babiloniata urmachinanpaq kamachirqa. Juk tuta Babiloniap punkunta kichasqata saqirpasqanku, chay chʼisitaq medoswan persaswan llaqtaman yaykurqanku.

Jehovap profetan Isaías nillarqataq: Ciroqa Jerusalén, templon ima, watiqmanta ruwakunanta kamachinqa. nispa. ¿Rey Ciro chayta kamachirqachu? Ari, jinata israelitasta nirqa: ‘Jerusalenman rispa, Jehová Diospa wasinta ruwamuychik’, nispa. Israelitastaq chayta ruwamurqanku.

Chaywanpis, Babiloniamanta mana tukuy israelitaschu Jerusalenman ripurqanku. May karu kasqanrayku, yaqha 800 kilometrosta, purinanku karqa. Wakinkunaqa machitusña, chayri unqusqas karqanku, wakinkunataq mana ripuyta munarqankuchu. Jinamanta achkha qhipakurqanku. Ciroqa mana ripuqkunaman nirqa: ‘Qullqita, qurita, chayri imallatapis, Jerusalenta, Diospa wasintawan ruwamuqkunaman quychik’, nispa.

Chayrayku, Jerusaleman ripuqkunaqa tukuy imata japʼirqanku. Chantapis Ciroqa, Nabucodonosor templomanta urqhusqanta, quri platosta, copasta ima, kutichipurqa. Israelitasqa tukuy imayuq Jerusalenman kutipurqanku.

Israelitasqa 4 killata Jerusalenman chayanankupaq purirqanku. Jerusalenta ruphachisqankumantaqa 70 wataña juntʼakurqa. Israelitas llaqtankuman chayaspapis, manchayta phutikurqanku. Qhawarina imaraykuchus.

Isaías 44:28; 45:1-4; Esdras 1:1-11.