Israelitas Jerusalenman kutipusqankumanta 70 watas jinaña karqa. Jinapis wakin israelitasqa sigue Persiaj llajtasninpi kasharqanku. Paykunamanta ujnenqa sacerdote Esdras karqa, pichus Diospa Leyninmanta yachachej. Payqa Jerusalenpi Diospa Leyninta mana kasukushasqankuta yachaytawan, paykunata yanapaj riyta munarqa. Persiamanta rey Artajerjestaj nerqa: “Dios yachayta qosunki Leyninta yachachinaykipaj. Chayrayku Jerusalenman riy, qanwan riyta munajkunatataj pusay”, nispa. Chantá Esdrasqa Jerusalenman kutipuyta munajkunawan tantakuspa Diosmanta mañakorqa allillanta kutipunankupaj. Chaymantataj rerqanku.

Tawa killanmantaj Jerusalenman chayarqanku. Kurajkunataj Esdrasman nerqanku: “Israelitasqa Jehová Diosta mana kasuspa llulla diosesta yupaychaj warmiswan casarakunku”, nispa. Esdrastaj ñaupaqenpi qonqorikuspa orakorqa: “Jehová Diosníy, noqaykupaj ashkha imasta ruwarqanki, noqaykutaj juchalliyku”, nispa. Israelitasqa pesachikuspapis, sajra imasta ruwallarqankupuni. Chayrayku Esdrasqa kurajkunata, juecesta ima churarqa. Kinsa killaspitaj mana kasukojkunata Jerusalenmanta qharqorqanku.

Jerusalenpa perqasnintaqa 12 wataspi tukorqanku. Chantá Esdrasqa israelitasta tantaykuspa ñaupaqenkupi Diospa Leyninta leerqa. Kʼuyuna librota kicharejtintaj israelitasqa sayarikorqanku. Esdrastaj Diosta jatuncharqa. Israelitastaj makisninkuta oqharispa nerqanku: “Ajina kachun”, nispa. Chantá Esdrasqa Leyta leerqa, sutʼincharqataj. Israelitastaj sumajta uyarerqanku. Diosmanta karunchakusqankuta reparaspataj waqarqanku. Qʼayantinpis Esdrasqa Diospa Leyninta leellarqapuni. Israelitastaj Chʼujllas fiestata ruwananku kasqanta reparaytawan, chayta wakicherqanku.

Chay fiestaqa 7 diasta karqa. Israelitastaj sumaj cosecha kasqanmanta kusikorqanku, Jehová Diosmantaj agradecekorqanku. Chay jina fiestataqa  Josuej tiemponmantapacha mana ruwasqankuchu. Israelitasqa chay fiesta pasayta tantakuytawan orakorqanku: “Jehová Diosníy, qan kacharichiwarqayku, chʼin lugarpipis mikhuyta qowarqayku, kay sumaj jallpʼatapis qowarqayku. Noqaykutaj ashkha kutispi mana kasukorqaykuchu. Kachamusqayki profetastapis mana uyarerqaykuchu. Jinapis qanqa pacienciakorqanki, Abrahanwan tratota ruwasqaykitapis mana qonqarqankichu. Kunanmantapacha kasusqaykupuni”, nispa. Chantá chay nisqankuta qhelqarqanku, kuraj runaswan, levitaswan, sacerdoteswantaj chayman sellaykorqanku.