Jesusqa uj wata khuskanniyojtaña predicashaspa, paywan khuska predicanankupaj, congregaciontapis ñaupajman apanankupaj apostolesta ajllanan karqa. Niraj ajllashaspataj Jehová Diosmanta yanapata mañakorqa. Chayrayku uj orqoman rispa tukuy tuta Diosmanta mañakorqa. Qʼayantintaj wakin yachachisqasninta tantaykuspa, paykuna ukhumanta 12 apostolesta ajllarqa. Paykunaj sutisninkutaj karqa: Pedro, Andrés, Santiago, Juan, Felipe, Bartolomé, Tomás, Mateo, Alfeoj wawan Santiago, Tadeo, Simón, Judas Iscariote ima.

12 apostolesqa Jesuswan khuska viajaj kanku. Jesusqa paykunata wakichiytawan, predicanankupaj kacharqa. Diosqa paykunaman atiyta qorqa onqosqasta sanoyachinankupaj, supaykunata runasmanta qharqonankupaj ima.

Jesusqa 12 apostolesnin amigosnin kasqankuta nerqa, paykunapitaj atienekorqa. Fariseosqa yuyaj kanku apóstoles  mana yachayniyoj runaslla kasqankuta. Jesustajrí mana jinatachu yuyaj. Chayrayku paykunata wakicherqa kamachisqanta juntʼanankupaj. Paykunaqa Jesuswan khuska karqanku niraj wañuchisqa kashajtin, kausarichisqa kasqantawan. Casi tukuy apóstoles, Jesús jina Galileamanta karqanku. Wakin apostolestaj casados karqanku.

Apostolesqa pantaj runas kasqankurayku wakin kutis imatapis parlallaj kanku, nitaj allin imastachu ajllaj kanku. Wakin kutistaj ni pacienciakojchu kanku, pichus kuraj kasqanmantapis siminakoj kanku. Jinapis kʼachas karqanku, Diostataj munakoj kanku. Jesús cieloman kutipojtintaj, congregacionpaj cimiento jina karqanku.