Israelita Elcanaqa iskay warmisniyoj karqa. Ujnenqa Ana karqa, ujnintaj Penina. Paytaj Anata astawan munakoj. Peninaqa ashkha wawasniyoj karqa, Anatajrí mana. Chayrayku Peninaqa Anata kʼumuykachachej. Elcanaqa sapa wata familianwan Siloman rej Jehová Diosta yupaychanankupaj. Chaypitaj payqa repararqa Ana may llakisqa kashasqanta. Chayrayku nerqa: “Ama waqaychu, noqa qanwan kashani, maytataj munakuyki”, nispa.

Chantá Anaqa sapallan Diosmanta mañakoj riporqa. Payqa waqaspa mañakorqa: “Jehová Diosníy, sichus uj wawata qowanki chayqa, qopusqayki tukuy kausayninpi sirvisunanpaj”, nispa.

Kuraj kaj sacerdote Eliqa Anata waqashajta rikuspa machasqa kasqanta yuyarqa. Chantá Anaqa nerqa: “Mana machasqachu kashani wiraqochiy. Sinchʼi llakisqa kashani, chaytataj Jehová Diosman willashani”, nispa. Elitaj pantaykusqanta reparakuspa nerqa: “Jehová Dios uyarisuchun mañakusqaykita”, nispa. Chaymanta Anaqa allillanña kasharqa, riporqataj. Niraj watanmantaj uj wawitayoj karqa, Samuel sutitataj churarqa. Payqa may kusisqachá kasharqa.

Anaqa imatachus Jehová Diosman nisqanta mana qonqaporqachu.  Chayrayku payqa Samuelta pʼitiytawan Diosta yupaychana toldoman pusarqa, Elimantaj nerqa: “Jehová Diosmanta mañarqani kay wawata qonawanta. Chayrayku pusanpuni tukuy kausayninpi payta sirvinanpaj”, nispa. Elcanawan Anawanqa sapa wata wawanku Samuelta watukoj rej kanku, uj mosoj ropatataj apapoj kanku. Chantá Jehová Diosqa, Anaman kinsa qhari wawasta, iskay warmi wawastawan qorqa.