Kuraj kaj sacerdote Eliqa iskay wawasniyoj karqa. Sutisninkutaj karqa Ofni, Finees ima. Paykunaqa Diosta yupaychana toldopi sacerdotes karqanku. Jinapis Jehová Diospa leyesninta mana kasojchu kanku, runastataj kʼumuykachachej kanku. Israelitas Jehová Diosman jaywanasta apajtinku, paykunaqa aswan sumaj aychasta japʼikapoj kanku. Elitaj chayta qhawallarqa. Jehová Diostajrí chayta mana allinpajchu qhawarqa.

Samuelqa wawallaraj karqa, manataj Ofni, Finees jinachu ruwarqa. Chayrayku Jehová Diosqa payta allinpaj qhawarqa. Uj chʼisitaj, Diosqa payta wajyarqa “Samuel” nispa. Paytaj chay rato Eliman rispa nerqa: “Kaypi kashani”, nispa. Elitajrí nerqa: “Mana wajyarqaykichu. Puñukanpullay”, nispa. Samueltaj puñoj riporqa. Chantá watejmanta wajyasqanta uyarillarqataj. Kinsa kutitaña wajyasqanta uyarejtin, Eliqa cuentata qokorqa Jehová Dios wajyashasqanmanta. Chayrayku nerqa: “Ujtawan wajyamusojtenqa ninki: ‘Parlallay Jehová Dios, kay kamachiykeqa uyarishasunki’, nispa”.

Samuel puñoj ripojtintaj, Diosqa wajyarqa: “Samuel, Samuel”, nispa. Samueltaj nerqa: “Parlallay, kamachiykeqa uyarishasunki”,  nispa. Jehová Diostaj nerqa: “Eliman niy, paytawan familiantawan castiganayta. Payqa yachan wawasnin mana allintachu toldoypi ruwashasqankuta, nitaj kʼaminchu”, nispa. Qʼayantin paqarin, Samuelqa sapa día jina toldoj punkusninta kicharerqa, manchachikorqataj Diospa nisqanta Eliman willayta. Elitajrí payta wajyaspa, nerqa: “Wawáy, ¿ima nisorqataj Jehová Dios? Mana pakaspa willariway”, nispa. Samueltaj tukuy imata willarqa.

Samuel jovenyasqanman jina, Jehová Diosqa payta yanapallarqapuni. Tukuynin israelitastaj yacharqanku Jehová Dios Samuelta ajllasqanta profeta kananpaj, juez kananpajtaj.