Judamanta rey Josafatqa Baalpa altaresninta chinkacherqa, waj santosta ima. Munarqataj Jehová Diospa leyesninta runas rejsinankuta. Chayrayku kuraj kamachista, levitasta ima kacharqa Jehová Diospa leyesninmanta tukuynin Judapi yachachimunankupaj.

Judá qayllapi kaj nacionesmanta runasqa mana Josafatpa contranpi maqanakorqankuchu. Imaraykuchus yacharqanku Jehová Dios payta yanapashasqanta. Chayrayku rey Josafatman regalosta aparqanku. Moabitaswan, Amonitaswan, Seir orqomanta kajkunawantaj Josafatpa contranpi maqanakoj rerqanku. Rey Josafattaj Jehová Diospa yanapayninta necesitasqanta yacharqa. Chayrayku Jerusalenpi qharista, warmista, wawasta ima tantaykorqa. Ñaupaqenkupitaj orakorqa: “Jehová Diosníy, kay maqanakupi yanapariwayku, imatachus ruwanaykutapis niwayku”, nispa.

Jehová Diostaj Josafatta nerqa: “Ama manchachikuychejchu, noqa yanapasqaykichej. Kakullaychej mana kuyukuspa, rikunkichejtaj imaynatachus librasunaykichejta”, nispa. Imaynatachus Jehová Dios paykunata librasqanta yachakuna.

Qʼayantintaj Josafatqa takejkunata ajllarqa, nerqataj soldadospa ñaupaqenkuta rinankuta. Paykunataj Jerusalenmanta llojserqanku Tecoa chʼin pampapi enemigosninkuwan maqanakoj.

Takejkuna kusiywan Jehová Diosman tukuy kallpankuwan takiyta qallarejtinkutaj, Jehová Diosqa amonitasta, moabitasta pantacherqa paykunapura tukuchinakunankupaj. Ajinapitaj tukuyninku wañorqanku. Jinapis Jehová Diosqa Judamanta runasta, soldadosta, sacerdotesta ima jarkʼarqa. Waj nacionesmanta runastaj chayta yachaspa Jehová Dios llajtanta enemigosninmanta jarkʼashasqanta repararqanku. Jehová Diosqa llajtanta imaymanamanta salvan. Nitaj necesitanchu runaspa yanapanta.