Qhariwarmi kausayniykipi, familiaykipi kusisqa tiyakunaykipaj tukuy imata ruwajtiykipis wakin kuti mana suyasqallayki ima llakiypis rikhurinman, chaytaj mayta llakichisunkiman (Eclesiastés 9:11). Chaywanpis llakiypi kajtiyki Jehová yanapasonqa. Qan, familiayki ima Bibliaj yuyaychaykunasninman jina ruwankichej chayqa, ima jatun llakiytapis atipayta atillankichej.

BIBLIA NIN: “Diosman saqeychej tukuy phutikuyniykichejta, imaraykuchus payqa qankunamanta dakun”, nispa (1 Pedro 5:7). Diosqa chʼampayniykimanta mana juchayojchu (Santiago 1:13). Manaqa yanapayta munasunki (Isaías 41:10). Chayrayku “sonqoykichejpi kaj chhikata payman willakuychej” (Salmo 62:8).

Bibliata sapa pʼunchay leesqayki, ukhunchasqayki ima, mayta sonqochasonqa. Ajinata ruwanki chayqa, reparanki Jehová “sonqochawa[sqanchejta] tukuy llakiyninchejpi” (2 Corintios 1:3, 4; Romanos 15:4). Chantá “chay mana unanchay atina sonqo tiyaykuyninta” qowasunchej (Filipenses 4:6, 7, 13).

KAYTA RUWAWAJ:

• Mana anchata llakikunaykipaj, imatapis allinta tʼukurispa ruwanaykipaj Jehovamanta yanapata mañakuy

• Manaraj imatapis ruwashaspaqa, imatachus ajllanaykipi ñaupajta tʼukuriy

BIBLIA NIN: “Allin yuyayniyojqa yachayta astawan japʼin; yachayniyojpa ninrenqa yachayta maskʼan”, nispa (Proverbios 18:15). Imatachus sapa uj familiaykimanta necesitasqankuta yachanaykipajqa, tukuy imata ruway. Chantapis paykunawan parlariy, uyariy ima (Proverbios 20:5).

Munasqa familiaykimanta pillapis wañupojtenqa, ama pʼenqakuychu imaynachus sientekusqaykita rikuchinaykimanta. Yuyarikuy Jesuspis waqarikusqanta (Juan 11:35; Eclesiastés 3:4). Chantapis sumajta puñuy, samariy ima yanapallasunkimantaj (Eclesiastés 4:6). Ajinamanta chay llakiyta atipayta atillanki.

KAYTA RUWAWAJ:

• Niraj ni ima llakiy kashajtin familiaykiwan parlariypuni, ajinamanta ima llakiypis rikhurejtin qanwan parlariyta munanankupaj

• Ajina llakiypi rikukojkunawan parlariy, imaynatachus llakiyninkuta atipasqankumantataj tapuriy

BIBLIA NIN: “Uj kawsaqeqa tukuy tiempopi munakuyniyoj, uj wawqetaj runawan khuska llakiypi sayaykunampaj”, nispa (Proverbios 17:17). Amigosniykeqa yanapayta munasunku, chaywanpis ichá mana yachankuchu imaynatachus yanapasuyta. Chaypajqa imatachus qanrayku ruwanankuta niy (Proverbios 12:25). Chantá Bibliaj nisqanman jina kausakojkunajpa yanapayninta maskʼay. Yanapayninkuwantaj llakiyniykita atipallanki (Santiago 5:14).

Diospi creejkunawan, nisqasninpitaj atienekojkunawan masichakojtiykeqa, mayta yanapasonqanku. Chantá sonqo pʼakisqa kajkunata sonqocharispaqa, sonqochakullankitaj. Jehovapi creesqaykimanta, imatachus tumpamantawan ruwananmantapis parlariy. Wajkunaj allinninta maskʼay, amataj karunchakuychu munakusojkunamanta, llakikusojkunamantawan (Proverbios 18:1; 1 Corintios 15:58).

KAYTA RUWAWAJ:

• Sumaj amigoykiwan parlariy yanapachikuytaj

• Ni imata pakaspalla imatachus necesitasqaykimanta sutʼita parlariy