Judeapi runasman willaraytawan, Jesusqa iskay diasta Samaria jallpʼapi qhepakorqa. Chaymantaqa Galilea jallpʼaman kuterqa, maypichus wiñakorqa, chayman. Jinapis Jesusqa mana samarikojchu Galileaman rerqa, manaqa astawan willananpaj. Jesusqa mana yacharqachu llajtanpi allinpajchus manachus qhawanankuta. Imaraykuchus payllataj nerqa, “profetaqa llajtanpi mana allinpaj qhawasqa kasqanta” (Juan 4:44). Jesuspa yachachisqasnintajrí, wasisninkuman, ruwanasninkumanwan kutiporqanku.

Jesusqa Galileaman kutispa ajinata runasman willarqa: “Diospa Gobiernontaj qayllapiña kashan. Juchasniykichejmanta pesachikuychej, Diosmanta sumaj willaykunatataj creeychej”, nispa (Marcos 1:15). Galileapitaj ashkha runas Jesusta sumajta uyarerqanku, allintataj paymanta parlarqanku. Paykunaqa chayta ruwarqanku, mana Jesús sumaj willaykunata willasqanraykullachu, manachayqa milagrosninta rikusqankurayku. Chaytataj rikusqanku, Jerusalenman Pascuapaj rispa (Juan 2:23).

Jesusqa Galilea jallpʼapi kashaspa, Caná ranchopisina willayta qallarerqa, maypichus yakuta vinoman tukucherqa, chaypi. Chay ranchopi kashajtin, Capernaum llajtamanta uj qhapaj runa, Jesús Judeamanta kutimusqanta uyarisqa. Chay runaqa rey Herodes Antipas kamachishajtin autoridad karqa. Paypa wawanqa sinchʼi onqosqa kasharqa, wañupusharqañataj. Wawanmanta may llakisqa kasqanrayku, Jesusta maskʼaj rerqa. Chantá taripaytawan nerqa: ‘Señor, jakulla ari, waway wañupushanña’, nispa (Juan 4:49).

Jesustaj payman nerqa: “Kutipullay, wawaykeqa sanoyapunña”, nispa (Juan 4:50). Chay runaqa Jesusta uyarispa maytachá tʼukorqa, jinapis payta creespa wasinman kutiporqa. Ñanta rishajtin, kamachisnin taripasqanku, willasqankutaj wawan allinyakapusqantaña. Paytajrí Jesuspunichus manachus sanoyachisqanta yachayta munaspa, kamachisninta taporqa ima horatachus sanoyapusqanta.

Kamachisnintaj kuticherqanku: “Qayna tarde la unata jina calenturan chinkaporqa”, nispa (Juan 4:52).

Paytaj yuyarikorqa, chay kikin horallapitaj Jesús nisqanta “wawaykeqa sanoyapunña” nispa. Chaymantaqa chay runa, wasinpi tukuy kajkunapiwan Jesuspa yachachisqasninman tukorqanku.

Jesusqa Caná ranchopi iskay milagrosta ruwarqa. Ñaupajtaqa uj casamientopi yakuta vinoman tukucherqa. Chantataj qhapaj runaj wawanta karullamanta sanoyacherqa. Jesusqa chay onqosqamanta 25 kilómetros jina karupi kasharqa. Willayta qallarisqanmantapacha, mana chay iskay milagrosllatachu ruwarqa. Jinapis Caná ranchopi iskay kaj milagronqa, Galileaman Diospa profetan jina kutisqanta rikucherqa. Chaywanpis Jesusqa manaraj yacharqachu kikin llajtanpi profetata jinachus manachus qhawanankuta.

Chaytaqa llajtan Nazaretman chayasparaj yacharqa. Qhepanta yachakusunchej, imastachus llajta masisnin Jesusta nisqankuta.