Jesuspa apostolesnin Galilea jallpʼapi willasharqanku chaypacha, Juan Bautistaqa iskay watasta jinaña carcelpi kasharqa. Payqa, Mesías chayamunanta willarqa.

Pay manaraj wisqʼasqachu kashajtenqa, Galileapi Herodes Antipas rey kasharqa. Paytaj warminmanta divorciakuytawan, hermanon Felipej warminwan casarakorqa. Chay warmej sutintaj Herodías karqa. Herodesqa Diospa Leyninta juntʼasqanta nej. Jinapis Herodiaswan casarakuspaqa qhenchachakorqa, Diospa Leynintataj pʼakerqa. Chayrayku Juan Bautistaqa, ashkha kutista nerqa mana allintachu ruwasqanta. Rey Herodestajrí, ichapis warmin Herodiasta kasuspa, Juan Bautistata carcelman wisqʼaykucherqa.

Herodesqa Juanwan ni imata ruwayta aterqachu. Imajtinchus runasqa Juanta profetata jina qhawaj kanku (Mateo 14:5). Herodiastajrí “Juanta chejnikuspa wañuchiyta munarqa” (Marcos 6:19). Kunantaj imaynapichus Herodías Juanta wañuchichisqanta qhawarina.

32 watamanta Pascua fiestapaj pisi tiempollaña faltashajtin, rey Herodesqa diachakunanpaj jatun mikhuyta wakicherqa. Chaymantaj invitakorqa kamachejkunata, comandantesta, Galileamanta may rejsisqa runasta ima. Chaypitaj Salomé sutiyoj sipas tusorqa. Payqa Herodiaspata, Felipejtawan wawanku karqa. Salomej tususqanqa, Herodeswan mikhojkunata mayta kusicherqa.

Herodespis entenadan tususqanmanta kusisqallataj kasharqa. Chayrayku payta nerqa: “Imatachus munasqaykita mañakullaway, noqataj qollasqayki”, nispa. Juraporqataj: “Imatachus mañakuwasqaykita qollasqayki, kamachisqay jallpʼasmanta khuskannintapis”, nispa. Sipastajrí niraj imatapis nishaspa, mamanta tapumorqa: “¿Imatataj mañakuymanri?”, nispa (Marcos 6:22-24).

Mamantaj Juan Bautistata chejnikusqanrayku nerqa: “Juan Bautistaj umanta mañay”, nispa. Sipastaj usqhayllata yaykuspa rey Herodesmanta mañakorqa: “Kunanpacha Juan Bautistaj umanta uj charolapi qonawaykita munani”, nispa (Marcos 6:24, 25).

Rey Herodesqa chayta uyarispa mayta llakikorqa. Nitaj niyta aterqachu “mana” nispaqa, jurasqanta diachakunman jamojkuna uyarisqankurayku. Juan mana juchayoj kajtinpis, reyqa chay ratopacha uj guardiata kamacherqa Juanpa umanta apamunanta. Guardiataj carcelman rispa Juanpa umanta qholumorqa. Chantá Juanpa umanta uj charolapi apamuspa sipasman jaywarqa, sipastaj mamanman jaywarqa.

Juanpa yachachisqasnenqa, chayta yachaytawan Juanpa ayanta apakaporqanku, pʼampamorqankutaj. Chantá tukuy chay imasta Jesusman willamorqanku.

Herodesqa Jesús onqosqasta sanoyachisqanta, supaykunatapis qharqosqanta uyarispa mancharikorqa. Payqa yuyarqa, Jesusqa Juan Bautista kasqanta, ‘wañusqas ukhumantataj kausarimusqanta’ (Lucas 9:7). Chayrayku Jesusta rikuytapuni munarqa. Jinapis Jesuspa yachachisqanta mana uyariyta munarqachu. Astawanpis Jesús Juan Bautistapunichus manachus kasqallanta yachayta munarqa.