Jesusmantaqa tukuynejpi uyarikorqa. Chayrayku Jesús chʼin lugarespi kashajtinpis, ashkha runas payman rerqanku yachachisqanta uyarinankupaj, milagrosninta rikunankupaj ima. Ajinata uj mashkha diasta kaytawan, Jesusqa Capernaum llajtaman kuterqa, mayqenchus Galilea qocha kantupi kasharqa, chayman. Payqa chay llajtapi qhepakuyta  yachaj, waj lugaresmanpis chaymanta willaj rej. Capernaumman chayasqantawan, tukuy runas chaypi kashasqanta uyarerqanku. Chayrayku ashkhas may wasipichus Jesús kasharqa, chayman rerqanku. Wakin fariseos, leymanta yachachejkunapis Jesusman rillarqankutaj. Paykunaqa risqanku tukuynin Galilea ranchosmanta, Judeamanta, Jerusalenmantawan.

Jesús kasharqa chay wasimanqa, ashkha runaspuni juntʼaykorqanku, niña punkullamanpis chimpaykunapaj jinachu karqa. Jesustaj “Diospa palabranmanta willayta qallarerqa” (Marcos 2:2). Chantapis Jesusqa tukuyman rikucherqa, atiyniyoj kasqanta juchata chinkachinanpaj, onqosqasta sanoyachinanpajpis. Imaynatachus chayta ruwasqanta qhawarina.

Jesús chay wasipi yachachishajtin, tawa runas uj suchu runata wantunanpi aparqanku. Paykunaqa Jesús chay runata sanoyachinanta munarqanku. Jinapis runas wasipi kʼiski kasqankurayku, chay onqosqata ni imaynamanta “Jesús kasharqa chayman” chimpachiyta aterqankuchu (Marcos 2:4). Jesusman mana qayllaykuchiyta atispataj, chay runasqa wasej techonta juskʼorqanku. Chantá suchu runata chay juskʼunta pitawan uraykucherqanku.

Chayta ruwasqankumanta, ¿Jesús phiñakorqachu? Mana. Astawanpis may creeyniyoj kasqankuta rikuspa, suchu runata nerqa: “Wawáy, juchasniyki perdonasqaña kanku”, nispa (Mateo 9:2). Fariseoswan leymanta yachachejkunawanrí, chayta uyarispa phiñakorqanku. Paykunaqa sonqonkupi ajinata yuyasharqanku: “¿Imaraykutaj kay runa ajinata parlanri? Diospa contranta rimashan. ¿Manachu Dioslla juchastaqa perdonayta atin?”, nispa (Marcos 2:7).

Jesustajrí imatachus yuyashasqankuta yachaspa, nerqa: “¿Imaraykutaj ajinata sonqoykichejpi yuyashankichejri? Pillapis kay suchu runamanqa ‘juchasniyki perdonasqaña kanku’ nillanman. ‘Sayariy, wantunaykita oqharispa puririy’ nejtinkurí, ¿puririnmanchu?”, nispa (Marcos 2:8, 9). Jesusqa kausayninta runasrayku qonanta yacharqa. Chayrayku runaspa juchasninkuta perdonayta aterqa.

Chantá Jesusqa tukuy chaypi kajkunaman rikucherqa, kay jallpʼapi juchasta perdonananpaj atiyniyoj kasqanta. Chayrayku suchu runata nerqa: “Qanta niyki: Sayariy, wantunaykita oqharispa wasiykiman ripuy”, nispa. Suchutajrí sayarerqa, chay rato wantunanta oqharispataj tukuy rikushajtinku riporqa. Chay runastaj manchayta tʼukorqanku. Chantá Diosta jatunchaspa nerqanku: “Mana jaykʼajpis kay jinataqa rikorqanchejchu”, nispa (Marcos 2:11, 12).

Jesús imatachus suchu runaman nisqanqa, rikuchiwanchej onqoykunaqa juchanejta rikhurisqanta. Bibliaqa niwanchej, ñaupa tatanchej Adán juchallikusqanta, paynejtataj tukuyninchej juchasapasllataj kasqanchejta. Jucharaykutaj onqoypis, wañuypis tiyan. Jinapis Diospa Gobiernon kamachishajtenqa, Jesusqa Diosta kasukoj runaspa juchasninkuta perdonanqa. Ajinamanta tukuy onqoykuna wiñaypaj chinkanqa (Romanos 5:12, 18, 19).