Fariseosqa Samariapichus chayri Galileapichus, maykʼajchus Diospa Gobiernon jamunanta Jesusta taporqanku. Paykunaqa yuyaj kanku tukuypa rikunanta jamunanta. Jesustajrí nerqa: “Diospa Gobiernonqa mana reparayllata jamonqa, nitaj runaspis nenqankuchu: ‘¡Qhawaychej! Kaypi kashan’, nispa. Chayri: ‘¡Qhawaychej! Jaqaypi kashan’, nispa. Diospa Gobiernonqa chaupiykichejpi kashan”, nispa (Lucas 17:20, 21).

Jesusta uyarejkunamanta wakenqa, ichapis yuyarqanku chay Gobiernoqa Diospa kamachisninpa sonqonkupi kashasqanta. Jinapis chayqa mana ajinachu karqa. Imajtinchus Diospa Gobiernonqa, mana fariseospa sonqonkupichu kasharqa. Astawanpis Diospa Gobiernonqa paykunaj chaupinkupi kasharqa. Imajtinchus rey kananpaj Diospa ajllakusqanqa paykunawan kasharqa (Mateo 21:5).

Jesusqa ichapis fariseos ripusqankumantaña yachachisqasninman astawan willarqa Diospa Gobiernon jamunanmanta. Payqa kutimunan tiempomanta nerqa: “Pʼunchaykuna jamonqa, chaypachataj noqawan khuska kayta munankichej, manataj rikuwankichejchu”, nispa (Lucas 17:22). Jesusqa chayta nispa, Diospa Gobiernonpi aswan qhepamanraj rey kananta nisharqa. Chaykamataj Jesuspa yachachisqasnin yachayta munanqanku maykʼajchus kutimunanta. Jinapis chaytaqa Dios ninña. Chay pʼunchay chayamunankamataj suyakunanku kanqa.

Chantá Jesús yachachisqasninman nerqa: “Runastaj nisonqachej: ‘¡Qhawaychej! Jaqaypi kashan’, nispa. Chayri: ‘¡Qhawaychej! Kaypi kashan’, nispa. Ama riychejchu, nitaj paykunata qhatiychejchu. Imaynatachus lliuj lliujqa, cieloj ujnin kʼuchunmanta ujnin kʼuchunkama kʼancharin, ajinallataj kanqa noqa atiyniyta rikuchisaj, chay pʼunchaypipis”, nispa (Lucas 17:23, 24). Jesusqa nerqa Mesiaspa kutimuynenqa lliuj lliuj jina kananta, tukuynejmanta runastaj reparayta atinankuta. Arí tukuy runaspuni Diospa Gobiernon jamusqantaña reparayta atenqanku.

Chantá Jesusqa kutimunan tiempomanta runasta, ñaupa tiempomanta runaswan kikincharqa. Pay nerqa: “Imaynachus Noejpa tiemponpi karqa, ajinallataj kanqa noqa atiyniyta rikuchisaj, chay pʼunchaykunapipis [...]. Ajinallataj karqa Lotpa tiemponpipis: Runasqa mikhusharqanku, ujyasharqanku, rantisharqanku, vendesharqanku, tarpusharqanku, wasistapis ruwasharqanku. Sodoma llajtamanta Lot llojsimusqan pʼunchaytaj, cielomanta azufreyoj nina paramorqa, tukuyninkutataj tukucherqa. Ajinallataj kanqa noqa atiyniyta rikuchisaj, chay pʼunchaypipis”, nispa (Lucas 17:26-30).

Arí, Noej tiemponmanta, Lotpa tiemponmanta runasqa, mikhusharqanku, ujyasharqanku, rantisharqanku, vendesharqanku, tarpusharqanku,  wasistapis ruwasharqanku. Jinapis mana chayraykuchu chinkachisqa karqanku. Imajtinchus Noej familian, Lotpa familianpis, chaykunamanta wakin imasta ruwallarqankutaj. Astawanpis chinkachisqa karqanku chay imasllawan musphaykachasqankurayku. Paykunaqa Diosmanta qonqaporqanku, nitaj reparakorqankuchu tukukuy tiempopi kashasqankuta. Chayrayku Jesusqa, yachachisqasninman nerqa imachus Diospa munaynin kasqanta reparanankuta, chayta juntʼanankupajtaj kallpachakunankuta. Ajinamanta Jesusqa yachachisqasninta yanaparqa Diospa kʼajaj phiñakuynin pʼunchaypi mana wañunankupaj.

Paykunaqa mana kay mundoj imasninwan musphanankuchu kanqa. Chayrayku Jesús nerqa: “Chaypacha, pichus wasi patapi kajqa ama uraykamuchunchu wasinmanta imallantapis orqhonanpaj, chajrapi kajpis ama wasinman kutimuchunchu imantapis oqharinanpaj. Lotpa warminmanta yuyarikuychej”, nispa (Lucas 17:31, 32). Lotpa warmenqa kachiman tukorqa.

Chantá Jesusqa reyña kajtin imachus kananta nerqa: “Chay chʼiseqa, iskay ukhu uj camallapi kashanqanku, ujnin apasqa kanqa, ujnintaj saqerpasqa kanqa”, nispa (Lucas 17:34). Jesusqa chaywan nisharqa wakin salvakunankuta, wakintaj wañunankuta.

Chantá yachachisqasnin taporqanku: “¿Señor, maypitaj chay kanqari?”, nispa. Jesustaj kuticherqa: “Maypichá aya kashan, chayman ankaspis tantakonqanku”, nispa (Lucas 17:37). Chaywanqa nisharqa, imaynatachus ankas karupi imatapis sutʼita rikunku, ajinallatataj paykunapis pichus Cristo kasqanta sutʼita reparanankuta, Cristowan khuskataj kanankuta. Chaypachaqa Jesús paykunaman cheqa kajta yachachenqa salvakunankupaj.