Jesusqa fariseospa kurajninkoj wasinpi kashaspa, sumaj imasta yachacherqa. Chaypi yachachiytawantaj, Jerusalenman purirerqa, paywan khuskataj ashkha runas rerqanku. Chay runas Jesuspa yachachisqasnin kanankupaj wakichisqachus manachus kasqankuta qhawarina.

Ashkha runas paywan rishajtinku, Jesusqa paykunaman nerqa: “Sichus pipis yachachisqay kayta munan chayqa, noqata astawan munakunawan tiyan tatanmanta, mamanmanta, warminmanta, wawasninmanta, hermanosninmanta, hermanasninmanta, kikin kausayninmantapis nisqaqa, manachayqa mana yachachisqay kayta atinchu”, nispa (Lucas 14:26). ¿Ima nisharqataj Jesús chayta nispa?

Jesusqa mana nisharqachu yachachisqasnin familiaresninkuta mana munakunankuta. Astawanpis Jesusqa, payta astawan munakunankuta nisharqa. Mana chayta ruwaspaqa, Jesuspa kikinchayninmanta recién casarasqa runaman rijchʼakunkuman karqa. Chay runaqa jatun mikhuyman wajyarisqa kashaspa casarakusqanraykulla mana rerqachu (Lucas 14:20).

Chantapis Jesusqa mana nisharqachu, yachachisqasnin kausayninkuta pisipaj qhawanankuta. Astawanpis payta astawan munakunankuta nisharqa, kausayninkuta wañuy pataman churananku kajtinpis. Arí, Jesuspa yachachisqanman tukoyqa mana pujllakuy jinachu. Chayrayku sumajta tʼukurina tiyan Jesuspa yachachisqan kanapajqa.

Jesús nerqa: “Sichus pipis yachachisqay kayta munan chayqa, kʼaspin lijrarisqa qhepayta jamunan tiyan, manachayqa mana yachachisqay kayta atinchu”, nispa (Lucas 14:27). Jesusqa chayta nispa, yachachisqasnin llakiypi rikukunankuta, qhatiykachasqataj kanankuta nisharqa. Chayrayku yachachisqasnenqa, pay jinallataj ñakʼarichisqa kanankupaj wakichisqa kananku karqa. Imajtinchus Jesuspis nerqa enemigosninpa makinpi wañunanta.

Jesuswan khuska risharqanku chay runasqa, sumajta piensarikunanku karqa Jesuspa yachachisqan kaspa imastachus ruwananku kasqanpi. Chayrayku Jesusqa nerqa: “Mayqennillaykichejpis wasita ruwakuyta munan chayqa, ¿manachu ñaupajtaqa tiyaykukuspa qolqentaraj qhawarikun, wasinta tukuchananpaj kapunchus manachus, chayta? Cimientota churaspaña manachus tukuchayta atinman chayqa, tukuy rikojkuna asipayankuman”, nispa (Lucas 14:28, 29). Chayrayku Jesuspa qhepanta Jerusalenman risharqanku chay runasqa, sumajta qhawarikunanku karqa, Jesuspa yachachisqan kayta atinankutachus manachus.

Chayta astawan entiendenankupaj, Jesús nerqa: “Pi reyllapis waj reywan maqanakoj rishaspa, ¿manachu ñaupajtaqa tiyaykukuspa yuyaychachikunraj, chunka waranqa  soldadosllawan atipayta atenqachus manachus chayta, chay waj rey iskay chunka waranqa soldadoswan jamushajtin? Mana atipananpaj jina kaspaqa, chay ujnin rey karullapiraj kashajtin, kachaswan parlachimunman mana maqanakuspalla allinyakapunankupaj”, nispa. ¿Imatataj Jesús yachachisharqa? Pay nerqa: “Ajina ari, pillapis qankunamanta tukuy kapuyninta mana saqejqa, manapuni yachachisqay kayta atinchu”, nispa (Lucas 14:31-33).

Jesusqa chayta nispa paywan risharqanku chay runasta, tukuy yachachisqasnintawan yuyaychasharqa. Yachachisqasnenqa qhepanta rinankupaj tukuy kapuyninkuta, kausayninkutapis qhesachanankupaj wakichisqa kananku tiyan. Chayrayku may allin kanman chaypi tʼukurinanchej, Diosmantapis mañakunanchej.

Chantá Jesusqa aswan ñaupajta orqopi yachachisqanmantañataj parlarqa. Payqa orqopi yachachishaspa yachachisqasninman nerqa: “Qankunaqa kay mundoj kachin kankichej”, nispa (Mateo 5:13). Kacheqa imapis mana pierdekunanpaj sumaj. Jesusqa yachachisqasninman “kay mundoj kachin” kasqankuta nerqa, imaraykuchus paykunaqa, runasta yanapayta aterqanku Diospa qayllallanpipuni kanankupaj, llimphu kausayniyoj kanankupajtaj. Jesusqa pisi tiempollatawanña willananta yachasqanrayku nerqa: “Kacheqa sumajpuni, kachichus laqʼayapunman chayqa, ¿imawantaj chay kachita kachinchakonqari?”, nispa (Lucas 14:34). Jesuspa yachachisqanta uyarejkunaqa, yacharqanku mana tukuy kachipunichu puritu kasqanta, manachayqa waj mineraleswan chajrusqa kasqanta. Chay chajrusqa kachitaj, mana valenchu.

Jesusqa kachimanta parlaspa yachachisqasninta nisharqa, may chhika unaytaña yachachisqan kaspapis, mana saykʼunankuta. Saykʼupunkuman chayqa, waj mineraleswan chajrusqa kachi jina mana valej kankuman. Kay mundomanta runastaj, paykunamanta asikunkuman, Diospis manaña allinpajchu paykunata qhawanman. Chantapis Diospa sutinta pisipaj qhawachinkuman. Chayrayku ama saykʼunachu. Jesús nerqa: “Pillapis ninriyojqa uyarichun”, nispa (Lucas 14:35).