Jesusqa Chʼujllas fiestaj qanchis kaj dianpi “qolqe churana cajas kasharqa chaynejpi” yachacherqa (Juan 8:20; Lucas 21:1). Chay lugarqa ichapis Warmispa Pationpi karqa. Chay patiopitaj, runasqa templopaj qolqeta churaj kanku.

Chantapis chaypeqa, Chʼujllas fiestapi tutantinta kʼachanasta kʼanchachej kanku. Chaypeqa tawa jatuchej candelereos kaj. Sapa candelerotaj tawa jatuchej fuentesniyoj karqa. Chay fuentespitaj aceite juntʼa kaj tutantinta kʼanchananpaj. Chay patiopi Jesusqa nerqa: “Noqa kay mundopaj kʼanchay kani. Qhepayta jamojqa ni jaykʼaj laqhapi purenqachu, manachayqa kausayta qoj kʼanchay tiyaponqa”, nispa (Juan 8:12). Chayta uyarejkunaqa chay candelerosmantachá yuyarikorqanku.

Fariseostajrí mana creerqankuchu. Chayrayku nerqanku: “Qanqa, qan kikiykimanta willakunki, willasqaykitaj mana cheqachu”, nispa. Jesustaj nerqa: “Noqallamantataj willakuni chaypis, willasqayqa cheqapuni. Yachani maymantachus jamusqayta, maymantajchus rishasqaytapis. Qankunatajrí mana yachankichejchu maymantachus jamusqayta, nitaj maymanchus rishasqaytapis. [...] Leyniykichejpipis qhelqasqa kashan: ‘Iskay runaschus kikinta willanku chayqa, willasqankoqa cheqa’, nispa. Noqaqa, noqa kikiymanta willakuni, kachamuwaj Tataypis noqallamantataj willan”, nispa (Juan 8:13-18).

Fariseostajrí manapuni creesqankurayku nerqanku: “¿Maypitaj Tatayki kashanri?”, nispa. Jesustaj nerqa: “Qankunaqa mana rejsiwankichejchu, nillataj Tataytapis rejsinkichejchu. Noqatachus rejsiwankichejman chayqa, Tataytapis rejsillawajchejtaj”, nispa (Juan 8:19). Chay fariseosqa Jesusta japʼiyta munaspapis, mana japʼerqankuchu.

Jesusqa nillarqataj: “Noqa ripojtiy qankunaqa maskʼawankichej, chaywanpis juchaykichej patapi wañunkichej. Maymanchus risaj chaymanqa mana jamuyta atinkichejchu”, nispa. Judiostaj chayta mana entiendespa  piensarqanku: “¿Pay kikinchu wañuchikonqa? ¿Imaraykutaj nishan ‘maymanchus risaj chaymanqa mana jamuyta atinkichejchu’ nispari?”, nispa. Paykunaqa maymantachus Jesús jamusqanta mana yacharqankuchu. Chayrayku Jesús nerqa: “Qankunaqa kay jallpʼamanta kankichej, noqataj cielomanta kani. Qankunaqa kay mundomanta kankichej, noqarí mana kay mundomantachu kani”, nispa (Juan 8:21-23).

Jesusqa chayta nispa, cielopi tiyakusqanmanta, pay Mesías kasqanmanta parlasharqa. Fariseostajrí mana creerqankuchu. Chayrayku Jesusta taporqanku: “¿Pitaj chanta qan kankiri?”, nispa (Juan 8:25).

Jesusqa payta qhesachasqankuta, chejnikusqankuta ima rikorqa. Chayrayku nerqa: “Imapajñataj qhasita parlashaykichejri”, nispa. Chantá Tatanta jatunchayta munaspa, paypi creenankuta munaspa nerqa: “Kachamuwajneyqa cheqa kajtapuni parlan, noqataj paymanta uyarisqayta kay mundopi parlani”, nispa (Juan 8:25, 26).

Chantá Jesús nerqa: “Noqata kʼaspiman warkhuwasparaj reparankichej pichus kasqayta, nitaj imatapis sapallaymantachu ruwasqayta, reparallankichejtaj Tatay yachachiwasqallanta parlasqayta. Kachamuwajneyqa noqawan kashan, manataj sapallaytaqa saqerpawanchu, imaraykuchus noqaqa imatachus munasqantapuni ruwani”, nispa (Juan 8:28, 29). Chayta nispa Jesusqa, Tatanpi atienekusqanta rikucherqa. Judiostajrí mana atienekorqankuchu.

Jinapis ashkha judiosqa paypi creerqanku. Jesustaj paykunata nerqa: “Nisqasniytachus kasukullankichejpuni chayqa, cheqamanta yachachisqasniy kankichej, cheqa kajtataj rejsinkichej, chay cheqa kajtaj kacharichisonqachej”, nispa (Juan 8:31, 32).

Wakin judiosqa chayta uyarispa uj jinayarqanku, nerqankutaj: “Abrahanpa mirayninmanta kayku, manataj jaykʼajpis ni pejpa esclavosninchu karqayku. Chantá, ¿imaraykutaj nishawayku ‘kacharichisqa kankichej’ nispari?”, nispa. Paykunaqa waj nacionpa atiyninpi kashaspa esclavos karqanku. Jinapis Jesuspa tiemponpeqa mana esclavos nichikuyta munarqankuchu. Jesustajrí nerqa: “Cheqatapuni niykichej: Pichus juchata ruwayman yachasqa kajqa, juchaj esclavon”, nispa (Juan 8:33, 34).

Judiosqa mana reparakorqankuchu juchaj esclavon kasqankuta. Chayrayku Jesús nerqa: “Esclavoqa mana wiñaypajchu patronninpa wasinpi qhepakun”, nispa (Juan 8:35). Arí, uj esclavoqa mana patronninmanta herenciata japʼinmanchu, chantapis patronqa ima ratollapis kachapunman. Jinapis patronpa wawanqa herenciata japʼiyta atin, ‘wiñaypajtaj’ wasinpi qhepakuyta atin. Patronpa reconocesqan wawapis wañupunankamallataj qhepakun.

Diospa Wawanmanta cheqan kajta yachayqa, juchamanta, wañuymantawan “wiñaypaj” kacharichiwanchej. Chayrayku Jesús nerqa: “Noqachus kacharichisqaykichej chayqa, cheqamanta kacharichisqa kankichej”, nispa (Juan 8:36).