Jesustaqa Judeapi uj fariseo wasinman invitarqa mikhunata mikhurinankupaj (Lucas 11:37, 38). Niraj mikhushajtinkutaj, fariseosqa makisninkuta codosninkukama mayllakorqanku. Jesustajrí mana mayllakorqachu (Mateo 15:1, 2). Makista codoskama mayllakoyqa mana juchachu karqa, nillataj juchachu karqa mana mayllakuypis.

Jesusta invitarqa chay fariseotajrí, Jesús makinta mana mayllakusqanmanta tʼukorqa. Chayrayku Jesús nerqa: “Fariseos, qankunaqa vasota, platotapis jawallanta mayllankichej, ukhuntataj mana. Ajina qankunapis kankichej, ukhuykichejqa juntʼa kashan tukuy imata munapayaywan, sajra kaywan ima. Mana yuyayniyojkuna. ¿Manachu jawanta ruwajqa, ukhuntapis ruwallarqataj?”, nispa (Lucas 11:39, 40).

Jesusqa chayta nispa, fariseos puraj uyas kasqankumanta parlasharqa. Makisninkuta codosninkukama mayllakojkunaqa, mana sonqonkuta llimphuchasharqankuchu. Chayrayku Jesús nerqa: “Imallatapis wajchaspaj ruwaspaqa tukuy sonqo ruwaychej. Ajinamanta tukuy imaykichej llimphu kanqa”, nispa (Lucas 11:41). Chayqa ajinapuni. Pillamanpis imata jaywaspaqa tukuy sonqo qona, manataj runaswan qhawachikunallapajchu, nitaj kʼacha nichikunallapajchu.

Fariseosqa mana tukuy sonqochu wajkunaman imatapis jaywarej kanku. Chayrayku Jesús nerqa: “Qankunaqa yerbabuenamanta, rudamanta, waj qhorasmantawan sapa chunkamanta ujta qonkichej. Diospa cheqan kayninmanta, munakuyninmantataj qonqakapunkichej. Chay imastaqa qonaykichejpuni karqa, ama chay ujkunata qonqaspa”, nispa (Lucas 11:42). Leyqa israelitasman nej chajrasninkupi poqojta, sapa chunkamanta ujta Diosman qonankuta (Deuteronomio 14:22). Ajinallatataj qonanku karqa mentamanta, rudamanta, waj condimentosmantawan. Fariseosqa chayta qojpuni kanku. Jinapis mana cheqan runaschu karqanku, nitaj Diosmanpis kʼumuykukorqankuchu. Ajinamanta mana Diospa Leyninta juntʼarqankuchu (Miqueas 6:8).

Jesús nillarqataj: “¡Ay qankunamanta fariseos! Qankunaqa sinagogaspi ñaupajpipuni tiyakuyta munankichej, mercado plazaspipis napaykuchikuyta munankichej. ¡Ay qankunamanta fariseos! Qankunaqa mana rikukoj sepulturas jina kankichej, runastaj chay patanta purinku mana yachaspalla”, nispa (Lucas 11:43, 44). Mana rikukoj sepulturastaqa runas saruykullaj kanku. Saruykuspataj Diospa Leyninman jina chʼichipaj qhawasqa kaj kanku. Jesustaj fariseosta chay sepulturaswan kikincharqa, sajra ruwasqanku runaspa ñaupaqenpi mana sutʼichu kasqanrayku (Mateo 23:27).

Leymanta ujnin yachachejtaj, chayta uyarispa Jesusta nerqa: “Yachachejníy, chay imasta nispaqa noqaykutapis pʼenqaypi rikhurichiwayku”, nispa. Jinapis chay runasqa cuentata qokunanku karqa mana allintachu ruwashasqankumanta. Chayrayku Jesús paykunata nerqa: “¡Ay qankunamantapis Leymanta yachachejkuna! Qankunaqa mana apay atina qʼepista runasman qʼepirichinkichej, qankunatajrí mana dedollaykichejwanpis chay qʼepista llankhaykunkichejchu. ¡Ay qankunamanta Leymanta yachachejkuna! Qankunaqa profetaspa sepulturasninkuta allinchankichej, ñaupa tatasniykichejtaj paykunata wañucherqanku”, nispa (Lucas 11:45-47).

Jesusqa mana apay atina qʼepismanta parlaspa, fariseospa costumbresninmanta, Diospa Leyninta munasqankuman jina entiendesqankumanta parlasharqa. Fariseosqa costumbresninkuman jinapuni runas kausanankuta munarqanku.  Ajinamantataj runasman llasa qʼepita jina churasharqanku. Chantapis Jesusqa nillarqataj, paykunaj ñaupa tatasninku Diospa profetasninta wañuchisqankuta, Abelmanta qallarispa. Leymanta yachachejkunatajrí, Diospa profetasninta jatunpaj qhawasqankuta runasman yuyachiyta munaspa, chay profetaspa sepulturasninkuta allinchaj kanku. Jinapis ñaupa tatasninku jinallataj, sajra runas karqanku. Tukuynin profetasmanta aswan kuraj kaj profetatataj, wañuchiyta munarqanku. Chayrayku Jesusqa enemigosninta nerqa Diospa ñaupaqenpi juchayoj kanankuta. Ajinapunitaj karqa, 38 watasninman 70 wata kashajtin, paykunaqa chinkachisqa karqanku.

Jesusqa nillarqapuni: “¡Ay qankunamanta Leymanta yachachejkuna, yachaypa llaventa runasmanta qhechojkuna! Qankunaqa mana yaykorqankichejchu, yaykuyta munajkunatapis jarkʼankichej”, nispa (Lucas 11:52). Paykunaqa Diospa Palabranmanta runasman yachachinanku karqa. Jinapis mana saqerqankuchu Diospa Palabranmanta yachakunankuta, nitaj entiendenankutapis.

Jesús chay imasta nejtin, ¿imatataj ruwarqanku fariseoswan leymanta yachachejkunawan? Jesús llojsipushajtin, paykunaqa mayta phiñakorqanku, maytataj Jesusta tapuykacharqanku imaynallamantapis pantachiyta munaspa. Ajinamanta payta presochanankupaj.