Jesusqa Jericó llajtamanta puririytawan, Betaniaman rerqa. Chayman chayananpajtaj, 20 kilometrosta jina wichayman rerqa. Betania ranchoqa Olivos orqo kʼuchupi kasharqa, inti llojsimuy ladopi. Jerusalentaj chaymanta kinsa kilometrospi jina kasharqa. Betaniapeqa Lázaro iskaynin hermanasninwan tiyakorqa.

Pascua fiesta qayllaña kasqanrayku, ashkha judíos Jerusalenman rerqanku. Paykunaqa ichapis uj wañusqata llankharisqankurayku, chayri waj chʼichipaj qhawasqa imasta ruwasqankurayku chʼichipaj qhawasqa kasharqanku. Chayrayku “Pascua ñaupajta leyman jina llimphuchakunankupaj” rerqanku (Juan 11:55; Números 9:6-10). Chay runasmanta wakenqa, templopi sayaj jina Jesusmanta ninakorqanku: “¿Ima ninkichejtaj qankuna? ¿Manachu fiestallamanpis jamonqa?”, nispa (Juan 11:56).

Tukuypis Jesusllamanta parlasharqanku. Chayrayku judiospa religionninkuta ñaupajman apajkunamanta wakenqa, Jesusta japʼiyta, wañuchiyta ima munarqanku. Paykunaqa “runasta kamacherqanku, maypichus Jesús kashasqanta yachaspaqa paykunaman willanankuta, ajinamanta payta japʼinankupaj” (Juan 11:57). Paykunaqa Jesusta wañuchiyta munarqanku, Lazarota kausarichimorqa, chaypachaña (Juan 11:49-53). Chayrayku wakin runasqa yuyasharqanku Jesús pakayllapi purinanta.

Jesustajrí, viernesta Betaniaman chayarqa, Pascua fiestapaj “sojta pʼunchay kashajtin” (Juan 12:1). Viernestaqa inti yaykupusqantawan 8 de nisán qallarerqa, sabadota inti yaykupusqantawantaj tukukorqa. Chayrayku Jesusqa manaraj chay día qallarishajtin Betaniaman chayarqa. Imajtinchus Samarikuna Pʼunchaypi karu lugaresman reyqa, Leyman jina jucha karqa. Ichapis Jesusqa Betaniapi ñaupaj kutipi jinallataj Lazaroj wasinman rerqa.

Betaniapeqa Simón sutiyoj runa tiyakullarqataj. Payqa aswan ñaupajta lepra onqoyniyoj kasqa, jinapis ichá Jesús payta sanoyacherqa. Payqa sábado tardenta wasinpi mikhurinankupaj Jesusta, Lazarota, Martata, Mariata, waj runastawan wajyarikorqa. Simonpa wasinpiña kashajtinkutaj, Martaqa mikhunata qaraspa yanapakorqa.

Mariarí, ¿imatataj ruwarqa? Payqa Simonpa wasinman uj yuritupi “perfumasqa aceiteta khuskan litrota jina” apakorqa, “chayqa nardo puro may valorniyoj karqa” (Juan 12:3). Chay perfumasqa aceiteqa 300 kuraj denario qolqe valerqa. Chay chhika qolqeta uj runa ganananpajtaj, uj wata juntʼata jina llankʼanan karqa. Chantá Mariaqa chay yuritoj kunkanta pʼakerqa. Chay perfumasqa aceitewan Jesuspa umanman, chakisninmanwan jawiykuspataj, chujchanwan chʼakicherqa. Perfumasqa aceitej qʼapaynenqa wasiman juntʼaykorqa.

Jesuspa yachachisqasnenqa, chayta rikuytawan phiñakuspa ninakorqanku: “¿Imapajtaj chay  perfumasqa aceiteta usuchinri?”, nispa (Marcos 14:4). Chantá Judas Iscariote nerqa: “¿Imaraykutaj chay perfumasqa aceiteta mana venderqanchejchu 300 denario qolqepiri? Chay qolqetaqa wajchasman qosunman karqa”, nispa (Juan 12:5). Judasqa mana wajchasta khuyasqanraykuchu chayta nerqa, manachayqa suwa kasqanrayku. Payqa qolqe cajata japʼej, chayman churasqa qolqetataj suwakapullajpuni.

Jesustaj parlasqankuta uyarispa nerqa: “¿Imaraykutaj kay warmipaj rimashankichejri? Chay ruwasqanqa noqapaj may allin. Wajchasqa qankunallawanpuni kanqanku, noqatajrí mana qankunallawanpunichu kasaj. Kay warmeqa perfumasqa aceitewan cuerpoyman churaykuwaspa, pʼampakunaypaj wakichishawan. Cheqatapuni niykichej: Tukuy kay mundopi, mayllapipis Diospa Gobiernonmanta sumaj willaykuna willakojtin, kay warmej ruwasqanpis willakullanqataj, paymanta runas yuyarikunankupaj”, nispa (Mateo 26:10-13).

Ashkha runas uyarisqanku Jesús Betaniapi uj día kurajtaña kashasqanta. Chayrayku ashkha judíos Simonpa wasinman rerqanku. Paykunaqa mana “Jesusraykullachu rerqanku, manachayqa Lazarotapis rikunankupaj, pitachus Jesús wañusqas ukhumanta kausaricherqa, chayta” (Juan 12:9). Chantá kuraj sacerdotesqa Jesustawan Lazarotawan wañuchinankupaj yachachinakorqanku. Paykunaqa yuyarqanku ashkha judíos Lazarota kausashajta rikuspa Jesuspi creesqankuta. Chay sacerdotesqa manchay sajraspuni karqanku.