Caná ranchopi casamiento pasayta, Jesusqa Capernaum llajtaman rerqa. Paywan khuskataj rerqanku: maman María, hermanosnin Santiago, José, Simón, Judas ima.

Jesusqa Capernaumman rerqa, imajtinchus chaymantaqa tukuynejman riyta atikoj. Chantapis chay llajtaqa aswan jatun karqa Nazaretmanta, Caná ranchomantawan nisqaqa. Chaypachataj Jesuspa yachachisqasninmanta casi tukuyninku, Capernaumpi chayri chay qaylla llajtaspi tiyakorqanku. Chayrayku Jesusqa paykunaman astawan yachachiyta aterqa.

Jesusqa Capernaumpi kashaspa, tʼukuna imasta ruwarqa. Chay ruwasqantataj ashkha runas yacharqanku, chay qaylla llajtasmanta kajkunapis. Jesuswan yachachisqasninwanqa, Diosta tukuy sonqo yupaychaj kanku. Chayrayku Capernaumpi pisi tiempota kaytawan, Pascuapaj Jerusalenman rerqanku. Chaypachataj 30 wata karqa.

Ley nisqanman jina, israelitasqa Jerusalén templopi uywa qʼolachinasta Diosman jaywananku karqa. Chayrayku israelitasqa karusmanta Jerusalenman rej kanku, chaypi qhepakunankupajtaj mikhunata necesitaj kanku. Diostajrí paykunapaj uj leyta churarqa. Chay ley nisqanman jinataj, karusmanta rejkunaqa qolqeta apakuyta atej kanku, wakasta, ovejasta, cabrasta, tukuy ima necesitasqankutawan rantikunankupaj (Deuteronomio 14:24-26). Jerusalenmanta wakin runastajrí, wakasta, ovejasta, pʼisqosta ima temploj pationpi vendej kanku. Wakin vendejkunaqa sutʼi suwas karqanku, ancha valesqapi vendesqankurayku.

Jesuspa yachachisqasnintaj, Jesús chayta rikuspa phiñasqa kashasqanta rikorqanku.

Chanta, ¿imatataj Jesús ruwarqa? Payqa cambiajkunaj qolqesninkuta pampaman qhallarparerqa, mesasninkutapis tijrarparqa, tukuyninkutataj templomanta wijchʼorqa. Chantá nerqa: “¡Kaykunata orqhoychej kaymanta! Tataypa wasintaqa ama mercadoman tukuchiychejchu”, nispa (Juan 2:16).

Jesuspa yachachisqasnenqa chayta rikuspa tʼukorqanku. Yuyarikorqankutaj Diospa Wawanmanta qhelqasqa kasqanta: “Wasiykita sinchʼita munakusqayqa, nina jina sonqoypi kʼajarenqa”, nispa. Judiostajrí Jesusta taporqanku: “¿Ima señaltataj rikuchiwasqayku yachanaykupaj ima atiywanchus chay imasta ruwasqaykita?”, nispa. Jesustaj nerqa: “Kay templota thuñiychej, noqataj kinsa pʼunchaypi sayarichisaj”, nispa (Juan 2:17-19; Salmo 69:9).

Judiosqa yuyarqanku, Jerusalén templomantapuni parlashasqanta. Chayrayku nerqanku: “Kay templotaqa 46 wataspi ruwarqanku, ¿qantajchu kinsa pʼunchayllapi sayarichiwaj?”, nispa (Juan 2:20). Jinapis Jesusqa mana chay templomantachu parlasharqa, manachayqa cuerponta uj templowan kikinchasharqa. Jesuspa yachachisqasnintaj, kinsa watanmanraj chayta entienderqanku, maypachachus Jesús kausarimorqa, chaypacha.