BARCOPI yakuman chinkaykushajtiyki, ¿munawajchu pillapis salvasunanta?... ¿Imatá ruwawaj salvasunanrayku wañojtin?... Jesucristo chayta ruwarqa. Kay 37 yachaqanapi yachakorqanchej jina, salvanawanchejpaj wañorqa.

Jesusqa mana yakupi wañunanchejmantachu salvawanchej. ¿Imamantataj salvawanchej?... Adán juchata, wañuyta ima herenciata jina saqewasqanchejmanta. Jesusqa sajra runasraykupis wañullarqataj. Qan chay jina runasrayku, ¿wañuwajchu karqa?...

Biblia nin: “Mana pipis wañullanmanchu uj cheqan runarayku; ichapis atinman wañuyta uj kʼacha runarayku”, nispa. Chantá nillantaj, Jesusqa “juchasapasrayku”, nisunman Diosta mana yupaychajkunarayku wañusqanta. Biblia nin jina, “juchasapasllaraj kashajtinchej”, nisunman sajra imastaraj ruwashajtinchej, “Cristo wañorqa noqanchejrayku” (Romanos 5:6-8).

¿Pitaj niraj apóstol kashaspa sajra imasta ruwarqa? ¿Yuyarikunkichu?... Pay qhelqarqa: “Cristo Jesús kay pachaman jamorqa juchasapasta salvanampaj; chay juchasapasmantataj noqa aswan kuraj kani”, nispa. Payqa apóstol Pablo karqa. Nerqataj ñaupajtaqa “mana yuyayniyoj” kasqanta, “chʼichi yuyaypi” kausasqanta ima (1 Timoteo 1:15; Tito 3:3).

Diosqa maytapuni runasta munakun. Payqa Wawanta kachamorqa, sajra runasrayku wañunanpaj. Bibliapi Juan 3:16 maskʼarina. Chaypi nin: “Diosqa chay jinatapuni kay pachapi kaj chhikata munakusqanrayku, uj kʼata [Wawanta] qorqa. Ajinamanta  pillapis paypi creejqa mana chinkayman renqachu, astawanqa wiñay kawsayniyoj kanqa”, nispa.

Jesusqa Tatan jina mayta munakuwasqanchejta rikucherqa. Kay libroj 30 yachaqananpi rikorqanchej jina, Jesustaqa japʼerqanku chay chʼisi mayta ñakʼaricherqanku. Ñaupajtaqa juzganankupaj, kuraj sacerdote Caifaspa wasinman aparqanku. Chantá llulla testigosta pusamorqanku, Jesusmanta llullasta parlanankupaj. Runastaj Jesusta sajmarqanku. Chantapis Pedroqa Jesusta mana rejsisqanta nerqa. Kunanqa chaypi kashasqanchejta yuyana, qhawarinataj imaschus kasqanta.

Sutʼiyamunña, Jesusqa mana puñusqa kashan. Chay tuta ruwasqanku juicioqa, mana leyesman jinachu karqa. Chayrayku sacerdotesqa usqhayllata tantakunku Jatun Juntapi waj juiciota ruwanankupaj. Chaypipis nillankutaj, Jesusqa Diospa contranpi juchallisqanta.

Chantá sacerdotesqa Jesusta makisnin watasqata, kamachej Pilatoman pusanku. Ninkutaj: ‘Jesusqa kamachejpa contranta oqharikun. Wañuchisqa kanan tiyan’, nispa. Pilatotajrí, sacerdotes llullakushasqankuta yachan. Chayrayku nin: “Kay runapeqa mana ima juchatapis tarinichu. Kacharipusaj”, nispa. Sacerdotes, waj runaspiwan qhaparinku: ‘¡Mana, wañuchisqa kachun!’, nispa.

Chay qhepata, Pilatoqa runasman ujtawan nin Jesusta kacharipunanta. Sacerdotestaj runasman yachaykuchinku qhaparinankupaj: ‘Kacharinkichus chayqa, qanpis kamachejpa contranpi kanki. ¡Wañuchisqa kachun!’, nispa. Chantá aswan jatunmanta qhaparinku. ¿Yachankichu imatachus Pilato ruwasqanta?...

Chay runasta kasun. Ñaupajtaqa Jesusta jasutʼichin. Chantá wañuchinankupaj, soldadosman jaywaykun. Soldadostaj umanman khiskamanta coronata churaykunku, payman qonqorikuspataj  alqochakunku. Chantá uj jatun rakhu kʼaspita qʼepichinku, Tʼojlu Pata nisqa cheqaman. Chaytaj llajtaj jawa ladonpi kasharqa. Chaypeqa chay kʼaspiman makisninta, chakisninta ima clavaykunku. Chantá chay jatun rakhu kʼaspita sayarichinku, Jesustaj warkhusqa rikhurin. Yawarnin surumushan, maytataj nanashan.

Jesusqa mana chay ratochu wañupun. Unaytaraj chay kʼaspipi ñakʼarin. Warkhusqa kashajtintaj, sacerdotes paymanta alqochakunku. Chaynejta pasaj runaspis ninku: ‘Diospa Wawanchus kanki chayqa, uraykamuy chay kʼaspimanta’, nispa. Chaywanpis Jesusqa yachan, imapajchus Tatan kachamusqanta. Payqa wiñaypaj  kausananchejpaj kausayninta qoj jamorqa. Chantá tardenpi las tresta jina, Jesusqa Tatanmanta qhaparikuspa, wañupun (Mateo 26:36–27:50; Marcos 15:1; Lucas 22:39–23:46; Juan 18:1–19:30).

Jesusqa mana Adán jinachu karqa. Adanqa Diosta mana kasorqachu. Ajinamanta payta mana munakusqanta rikucherqa. Nillataj runastapis munakorqachu. Adanpa juchanrayku, tukuy runas juchayoj nacekunchej. Jesustajrí, Diosta, runastapis munakusqanta rikucherqa. Payqa tukuy imapi Diosta kasukorqa. Adanpa ruwasqanta allinchananpajtaj, kausayninta qorqa.

Jesuspa ruwasqanqa may sumaj, ¿icharí?... Diosmanta mañakushaspa, ¿agradecekunkichu?... Apóstol Pabloqa agradecekorqa. Cristomanta nerqa: “Paymin munakuwarqa, noqaraykutaj wañuchisqa kanampaj jaywaykukorqa”, nispa (Gálatas 2:20). Jesusqa qanrayku, noqarayku ima wañorqa. Payqa kausayninta qorqa, wiñaypaj kausananchejpaj. Chayrayku payta munakuna tiyan.

Pabloqa Corinto llajtapi cristianosman qhelqarqa: “Cristoj munakuynenqa tanqawayku”, nispa. ¿Imaman tanqawanchej?... Pablo nin: “Señorqa tukuypaj wañorqa, kunan kawsajkuna amaña paykunapajchu kawsanankupaj, astawanqa kawsanankupaj, jaqay pichus wañorqa, kawsarimporqataj paykunarayku, chaypaj”, nispa (2 Corintios 5:14, 15).

 ¿Imaynasmantá Cristopaj kausasqaykita rikuchiwaj?... Paymanta yachakusqaykita wajkunaman willariy. Waj imata ruwallawajtaj. Kaypi tʼukuriy: Sapallayki kashanki, ni mamayki, ni tatayki, nitaj pí runapis rikushasunkichu. Jesuspa chejnisqan imasta, ¿telepi chayri Internetpi qhawallankichu?... Yuyarikuy, Jesusqa kausashan, tukuy ima ruwasqanchejtataj qhawashan.

Jesustaqa munakunallataj tiyan, Jehová jina ruwanapaj. Jesús nerqa. ‘Diosqa munakuwan’, nispa. ¿Imaraykú Jehová, Jesusta munakun? ¿Imaraykú Jesusta munakuna tiyan?... Jesusqa Diospa munaynin juntʼakunanpaj, kausayninta tukuy sonqo qorqa (Juan 10:17). Chayrayku kay yuyaychayta kasukuna: ‘Diospa munasqa wawasnin kaspa, payta qhawarispa kikinta ruwaychej. Jinallataj munakuypi puriychej, imaynatachus Cristopis munakuwarqanchej, ajinata. Pay kikin Diosman jaywaykukorqa noqanchejrayku’, nispa (Efesios 5:1, 2).