ISKAY waranqa watas jinaña kashan, uj wawa nacekusqanmanta. Chay wawaqa mana mayqen wawa jinallachu karqa. Wiñaspaqa may rejsisqaman tukorqa, kunankamapis rejsisqallapuni. Chay tiempopeqa mana karqachu autos, aviones, televisores, computadoras, ni Internetpis.

Chay wawaj sutenqa Jesús karqa. Payqa tukuy runasmanta aswan yachayniyojman tukorqa, sumajtataj yachachej. Mana entiendeyta atikunchu, chay imastapis, entiendenapaj jinalla yachachej.

Jesusqa runasman tukuynejpi yachachej: jatun qocha kantuspi, barcospi, wasispi, ñanta rishaspapis. Chay tiempopi mana autospis, nitaj trenespis karqachu. Chayrayku Jesusqa runasman yachachinanpaj, uj lugarmanta waj lugarman chakipi rej.

Runasmantaqa ashkha imasta yachakusunman. Chaywanpis aswan sumaj imastaqa, Sumaj Yachachej Jesusmanta yachakunchej. Nisqasninta Bibliapi leerisun chayqa, Jesuspis parlashawasunman jina kanqa.

¿Imaraykutaj Jesús Sumaj Yachachej karqa? Yachachejniyoj kasqanrayku. Chantapis Jesusqa sumajta uyarikuna kasqanta yacharqa. ¿Pitataj pay uyarej? ¿Pitaj payman yachacherqa?... Paymanqa Tatan yachacherqa. Jesuspa Tatantaj Dios.

Jesusqa manaraj Jallpʼaman jamushaspa, Dioswan cielopi tiyakorqa. Chayrayku payqa mana waj runas jinachu karqa. Payllamin  Jallpʼapi manaraj nacekushaspa cielopi tiyakorqa. Cielopi kashaspa kʼacha wawa karqa, Tatantataj kasukoj. Chayrayku runasman yachachej imatachus Tatanmanta yachakusqanta. Qanpis tataykita, mamaykita kasukuspaqa, Jesús jina ruwanki.

Chantapis Jesusqa runasta munakusqanrayku, Diosmanta yachachiyta munasqanrayku Sumaj Yachachej karqa. Payqa mana kuraj runasllatachu munakoj, manaqa wawitastapis. Wawitastaj Jesusman kʼaskakoj kanku, paykunata parlapayasqanrayku, uyarisqanrayku ima.

Uj kuti, tatasqa wawasninkuta Jesusman pusarqanku. Yachachisqasnintaj yuyarqanku Jesús wawaspaj mana tiempoyoj kasqanta, chay runastataj ripunankuta nerqanku. ¿Yachankichu imatachus Jesús nisqanta?... Pay nerqa: “Saqeychej wawasta noqaman jamojta, amataj jarkʼaychejchu”, nispa. Arí, Jesusqa wawas payman qayllaykunankuta munarqa. Payqa may yachayniyoj, sumajpaj qhawasqa kaspapis, wawasta yachachinanpaj tiempochakorqa (Marcos 10:13, 14).

 ¿Imaraykutaj Jesús, wawasman yachachej, paykunatataj uyarej? Imaraykuchus wawas kusisqa kanankuta munaj. Chayrayku paykunaman Diosmanta yachachej. Qanrí, ¿imaynatá wajkunata kusisqa kanankupaj yanapawaj?... Diosmanta yachakusqaykita willarispa.

Uj kuti, Jesusqa yachachisqasninpa chaupinkuman uj wawata sayaykucherqa. Chay wawata rikuchispataj, yachachisqasninman chay wawa jina kanankuta nerqa.

¿Imatá chaywan niyta munarqa? ¿Imaynatá kuraj runas, sipasitas, waynuchituspis chay wawita jina kankuman?... Uj wawitaqa mana kuraj runa jinachu yachan. Chayrayku astawan yachakuyta munan. Jesustaj yachachisqasninman wawitas jina llampʼu sonqo kanankuta nerqa. Tukuypis wajkunamanta ashkhata yachakusunman. Jinapis yachayninchejmanta nisqaqa, Jesuspa yachachiykunasnin aswan sumaj. Chaytaqa allinta reparananchej tiyan (Mateo 18:1-5).

Chantapis Jesusqa, runas astawan yachakuyta munanankupaj jina yachachisqanrayku Sumaj Yachachej karqa. Payqa chʼuwitata, runas entiendenankupaj jinalla yachachej. Diosmanta runasman yachachinanpajqa pʼesqosmanta, tʼikasmanta, imastachá runas rejsej kanku chaymanta parlaj.

Uj kuti, Jesús uj kinraypi kashajtin, ashkha runas payman rerqanku. Jesustaj  kay dibujopi rikushanki jina, tiyaykukuytawan paykunaman yachacherqa. Nerqataj: ‘Qhawariychej phawaykachaj pʼesqosta. Paykunaqa mana tarpunkuchu, nillataj pirwaspipis jallchʼankuchu. Chaywanpis cielopi kashaj Tataykichej paykunataqa mikhuchin. Manachu qankunaqa aswan munasqa kankichej pʼesqosmanta nisqaqa?’, nispa.

Chantá nillarqataj: ‘Qhawariychej campo tʼikasta, imaynatachus wiñasqankuta. Chaykunaqa mana llankʼankuchu. ¡May kʼachitustaj kanku! Salomonpis tukuy qhapaj kayninpi, manapuni ujnin tʼika jinallapis pʼachallikorqachu. Dioschus chay tʼikasta mana qonqan chayqa, manallataj qankunata qonqasonqachejchu’, nispa (Mateo 6:25-33).

Pʼesqosmanta, tʼikasmanta parlaspa, ¿imatá Jesús yachachisharqa?... Payqa mikhunamanta chayri pʼachamanta, mana  anchata llakikunanchejta nisharqa. Imaraykuchus Diosqa yachan imaschus pisiwasqanchejta. Jesusqa mana nisharqachu mikhunapaj, ropapaj mana llankʼanataqa. Astawanpis Diosta ñaupajman churanata nisharqa. Chayta ruwasun chayqa, Dios ni imata pisichiwasunchu. ¿Creenkichu chayta?...

Jesús yachachiyta tukusqantawan, ¿imatá runas nerqanku?... Biblia nisqanman jinaqa, chay jinata yachachisqanmanta mayta tʼukorqanku. Paykunaqa Jesusta uyarispa miskʼichikoj kanku. Jesuspa  yuyaychasqantaj allin kajta ruwanankupaj yanapaj (Mateo 7:28).

Chayrayku Jesusmantaqa yachakunapuni tiyan. ¿Imaynatá paymanta yachakusunman?... Paypa yachachisqanqa uj libropi qhelqasqa kashan. ¿Yachankichu mayqenchus chay libro kasqanta?... Chay libroqa Biblia. Bibliata leespaqa Jesuspa nisqasninta uyarisunman. Biblia nisqanman jina, Diosllataj Jesusta uyarinanchejta nerqa. Qhawarina imaynatachus.

Ujpacha Jesusqa kinsa yachachisqasninta pusariykukuspa, uj orqoman wicharerqa. Paykunaqa karqanku Pedro, Santiago, Juan ima. Waj yachaqanaspi paykunamanta astawan yachakusunchej, paykunaqa Jesuspa sumaj amigosnin karqanku. Dibujopi kashan jina, Jesús orqopi kashajtin, uyan inti jina kʼancharerqa, ropanpis mayta lliphipirerqa.

Chantá Jesuswan yachachisqasninwan cielomanta kayta nimojta uyarerqanku: ‘Kaymin munasqa Wawayqa. Paywan ancha kusisqa kani. Payta uyariychej’, nispa (Mateo 17:1-5). ¿Yachankichu pichus parlamusqanta?... Dios parlamorqa. Arí, Diospuni Wawanta uyarinankuta nerqa.

Noqanchejrí, ¿Dios kamachisqanman jina Sumaj Yachachej Jesusta uyarisunchu?... Chaytaqa tukuy ruwananchej tiyan. ¿Yuyarinkichu imaynatachus chayta ruwanata?...

Chaytaqa ruwasunman Bibliapi Jesuspa kausayninmanta leespa. Sumaj Yachachej Jesusmantaqa mayta yachakusunman. Paypa yachachisqantaj Bibliapi kashan. Chaykunata yachakuspa, amigosniykiman willarispa ima, ¡mayta kusikunki!