WAKIN kuti, ¿llakikunkichu chayri sapallayki kasqaykitachu yuyanki?... ¿“Pillapis munakuwanchu” nispachu tapukunki?... Wakin wawasqa ajinata yuyanku. Diostajrí niwanchej: “Noqaqa ni jaykʼaj qonqasqaykichu”, nispa (Isaías 49:15). Chayta yachayqa kusikunapaj, ¿icharí?... Arí, Jehovaqa mayta munakuwanchej.

Uj salmista qhelqarqa: “Tatay mamay saqerpariwajtinkupis, Tata Diosqa mana saqerpariwanqachu”, nispa (Salmo 27:10). Chayta yachayqa mayta sonqochawanchej, ¿icharí?... Jehová niwanchej: ‘Ama manchachikuychu, imaraykuchus noqaqa qanwanpuni kashani. Noqa yanapasqayki’, nispa (Isaías 41:10).

Wakin kutispitaj, Jehová saqen kamachisninta Satanás llakiykunaman, juchaman ima tanqananta. Uj kuti, Supayqa Jesusta mayta ñakʼaricherqa. Chayrayku Jehovaman Jesús nerqa: “Diosníy, Diosníy, imaraykutaj saqerpariwankiri?”, nispa (Mateo 27:46). Jesusqa mayta ñakʼarispapis, Jehová payta munakusqanta yacharqa (Juan 10:17). Chantapis yachallarqataj, Satanás Jehovaj kamachisninta pruebaman churasqanta, ñakʼarichisqanta ima. Jehovataj chayta saqesqanta. Waj yachaqanapitaj, chaymanta astawan yachakusun.

Wawallaraj kaspaqa wakin kuti manchachikunchejpuni. Sutʼincharinapaj, ¿maykʼajllapis chinkarqankichu?... ¿Chinkaspa manchachikorqankichu?... Ashkha wawasqa chinkaspa manchikunku. Uj kuti, Jesusqa uj chinkasqa ovejamanta parlarqa.

 Qanpis uj ovejita jina kanki. Imaraykuchus uj ovejitaqa qan jinallataj, mana ancha jatunchu, nitaj ancha kallpayojchu. Chantapis uj michej qhawananta, jarkʼananta ima necesitan.

Jesusqa rijchʼanachinanpi, pachaj ovejasniyoj michejmanta parlarqa. Uj pʼunchay, lomapi ujnin ovejan chinkarqa. Ichapis chay ovejaqa, pisimanta pisi tropamanta karunchakorqa. Ladosninta qhawarinanpajtaj manaña waj ovejas karqachu. ¿Imaynataj chay oveja kashanman karqa?...

Michejrí ovejitan chinkasqanta reparaspa, ¿imatá ruwanman? “Imapaj quedakun, yachachun á”, ¿nispachu ninman? ¿Manachu 99 ovejasninta jarkʼachasqa lugarman saqespa, chinkasqa kajta maskʼamunman? Chay ovejitanta maskʼaspa, ¿tiempontachu pierdeshanman?... Qan chay chinkasqa oveja kawaj chay, ¿michejniyki maskʼasunanta munawajchu?...

Michej runaqa tukuy ovejasninta mayta munakorqa, chinkaj ovejitantapis. Chayrayku maskʼaj rerqa. Chay ovejitaqa michejninta rikuspa maytachá kusikorqa. Jesús  nisqanman jina, michejpis ovejitanta tarispa mayta kusikorqa. Chay 99 mana chinkajkunamanta nisqaqa, chay uj ovejitanmanta astawan kusikorqa. ¿Piwantaj chay michej ninakun? ¿Pitaj chay michej jina noqanchejmanta mayta llakikun?... Jesusqa, Tatan Jehová ajinata llakikusqanta nerqa.

Jehová Diosqa Sumaj Michejninchej. Payqa tukuy kamachisninta munakun, qan jina wawastapis. Jehovaqa mana munanchu ni mayqen ñakʼarinanta chayri chinkananta. Noqanchejmanta llakikusqanta yachaspa, mayta kusikunchej (Mateo 18:12-14).

¿Jehová Diospi creenkichu?... ¿Creenkichu pay kasqantapuni?... Jehovataqa mana rikuyta atinchejchu. Payqa mana rikukoj cuerpoyojchu, manaqa uj espíritu. Jinapis kanpuni, qhawamuwanchejtaj. Payqa yachan maykʼajchus yanapata necesitasqanchejta. Chantapis mañakuynejta uj runawan jina parlayta atinchej. Jehovaqa paywan parlanata munan.

 Maykʼajllapis llakisqa chayri sapallayki kajtiyki, ¿imatá ruwawaj?... Jehovawan parlariy. Payman qayllaykuy. Pay sonqochasonqa, yanapasonqataj. Sapallayki kasqaykita yuyajtiykipis, Jehovaqa munakusunki. Bibliapi leerina Salmo 23:1, 2 versiculosta. Chaypi nin: “Tata Diosqa michejniy; ni imata pisichiwanchu. Qʼomer pampaspi michiwan, qochasqa miskʼi yakusmantaj pusawan”, nispa.

Tawa kaj versiculopitaj nin: “Chʼin laqha wayqʼosta puriyman chaypis, mana ima sajramanta manchachikusajchu, qanqa noqawan kasqaykirayku. Varaykitawan, tojnuykitawan rikuspa, wapuchakuni”, nispa. Jehová Diosta yupaychajkunaqa chayta ninku. Imaraykuchus llakisqa kashajtinku Dios paykunata sonqochan. ¿Kikillantatajchu qanpis niwaj?...

Jehovaqa munakuyniyoj michej jina, tukuy kamachisninta jarkʼan, maynintachus purinankutapis rikuchin. Kamachisnintaj kusiywan chayninta rinku. Llakiypi kaspapis, mana manchachikunkuchu. Uj michejqa varanwan chayri tojnunwan ovejasninta phiña animalesmanta jarkʼan. Biblia nisqanman jina, Davidqa jovenllaraj kashaspa, ovejasninta leonmanta, jukumarimantawan jarkʼarqa (1 Samuel 17:34-36). Jehovaj kamachisnenqa yachanku, Dios kikillantataj paykunata jarkʼananta.  Jehová paykunawan kashasqanraykutaj, ni imamanta manchachikunkuchu.

Jehovaqa ovejasninta mayta munakun, sumajtataj qhawan. Biblia nin: “Uj michej jina ovejasninta michenqa; corderosta makisninwan marqʼarikonqa”, nispa (Isaías 40:11).

¿Manachu kusikunki Jehová ajina kasqanta yachaspa?... ¿Munawajchu ujnin ovejitan kayta?... Ovejasqa michejninkoj parlasqanta uyarinku, qayllallanpipunitaj kanku. Qanrí, ¿Jehovata uyarinkichu?... ¿Qayllallanpipunichu kanki?... Chayta ruwaspa ni jaykʼaj manchachikunkichu. Jehová qanwanpuni kanqa.