JEHOVATA sirviy, ¿atikullanchu?... Jesusqa, mana facilllachu kananta nerqa. Wañuchisqa kananpaj uj chʼisi kashajtin, apostolesninman nerqa: “Sichus kay pachamanta runas chejnisunkichej chayqa, yachaychej noqataraj qankunamanta ñawpajta chejniwasqankuta”, nispa (Juan 15:18).

Pedroqa Jesusman maylla nerqa: ‘Manapuni jaykʼajpis saqerparisqaykichu’, nispa. Jesustaj nerqa: ‘Kunan chʼisipacha, kinsa kutita ninki mana rejsiwasqaykita’, nispa. Ajinapunitaj karqa (Mateo 26:31-35, 69-75). ¿Imaraykú Pedro chayta ruwarqa?... Imaraykuchus waj apóstoles jinallataj manchachikorqa.

¿Imaraykú apóstoles manchachikorqanku?... Imaraykuchus uj imata ruwayta qonqarqanku. Chayta mana qonqasunchu chayqa, wajkuna imata niwajtinchejpis chayri imanayta munawajtinchejpis Jehovata sirviyta atisun. Ñaupajtaqa parlarina, Jesusta wañuchinankupaj japʼisqanku chʼisimanta.

Chay chʼisi, Jesuswan apostolesninwan Pascuata ruwarqanku. Chay cenataqa watapi uj kutillata ruwakoj. Chaypeqa judíos yuyarikoj kanku, Egiptomanta Dios kacharichisqanta. Chantá Jesusqa apostolesninwan ñaupaj kutirayku waj cenata ruwarqa. Chay cena Jesusta yuyarinapaj kasqantataj, waj yachaqanapi yachakusunchej. Cenayta tukusqankutawan, Jesusqa apostolesninta kallpacharqa. Chantá Getsemaní huertaman paykunata pusarqa. Chaymanqa rejpuni kanku.

Jesusqa chayaytawan, chʼinnejman rerqa Diosmanta mañakoj. Chantapis Pedrota, Santiagota, Juantawan mañakunallankutataj  nerqa. Paykunarí puñurparerqanku. Jesusqa kinsa kutita mañakoj rerqa, sapa kutimuspataj kinsantinkuta puñushajta tariparqa (Mateo 26:36-47). ¿Imaraykú Diosmanta mañakunankupaj rijchʼarisqa kananku karqa?... Chayta yachakuna.

Chay chʼisi Jesusqa Judas Iscariotewan, waj apostolesninwan ima Pascuata ruwarqa. Yachakorqanchej jina, Judasqa suwa karqa, kunantaj wasanchajmanñataj tukusharqa. Payqa yacharqa Jesús apostolesninwan maynejpichus Getsemaní huertapi tantakuyta yachasqankuta. Chayrayku Jesusta japʼichinanpaj, soldadosta cheqanta pusarqa. Jesustaj paykunata rikuytawan taporqa: “Pitataj maskʼashankichej?”, nispa.

Paykunataj nerqanku: “Jesusta”, nispa. Jesusqa mana manchachikuspa nerqa: “Noqa kani”, nispa. Soldadosqa manchariywan, qhepaman suchurispa pampaman choqakorqanku. Chantá Jesús nerqa: ‘Noqatachus maskʼashawankichej chayqa, saqeychej kay apostolesniy ripunankuta’, nispa (Juan 18:1-9).

Apostolesqa Jesusta soldados presochajtinku, mancharikuspa ayqekorqanku. Pedrowan Juanwantaj imachus Jesuswan kananta yachanankupaj, karu qhepallanta rerqanku. Jesustaqa kuraj sacerdote Caifaspa wasinman aparqanku. Juanqa kuraj sacerdotej rejsisqan karqa. Chayrayku punkuta qhawaj sipasqa payta, Pedrotawan patioman yaykuchillarqa.

Sacerdotesqa juiciota ruwanankupaj, Caifaspa wasinpiña kasharqanku. Paykunaqa Jesusta wañuchiyta munaspa, llulla testigosta pusamorqanku. Runastaj Jesusta uyanpi laqʼarqanku, sajmarqankutaj. Pedrotaj chaynejpi kasharqa.

Jinallapi, yaykojta saqerqa chay sipasqa Pedrota nerqa: ‘Qanpis Jesuswan purej kanki’, nispa. Pedrotajrí nerqa: ‘Mana payta  rejsinichu’, nispa. Chantá, waj sipas kamachiñataj, chaypi kajkunaman nerqa: ‘Kaypis Jesuswan kasharqa’, nispa. Pedrotaj ujtawan nerqa: ‘Mana chay runata rejsinichu’, nispa. Uj chhikanmantawan, chaypi kashajkunañataj Pedroman nerqanku: “Cheqatapuni qampis paykunamanta kanki”, nispa. Pedrotaj juraspa nerqa: “Manapuni rejsinichu chay runataqa pichus kampis”, nispa. Chaywanqa kinsa kutitaña Jesusta mana rejsisqanta nerqa. Jinallapi Jesusqa kutirimuspa, Pedrota qhawarerqa (Mateo 26:57-75; Lucas 22:54-62; Juan 18:15-27).

¿Imaraykú Pedro llullakorqa?... Manchachikusqanrayku. ¿Imaraykú manchikorqa? ¿Imatá ruwanan karqa mana manchikunanpaj? Kaypi tʼukuriy. ¿Imatá Jesús ruwarqa mana manchachikunanpaj?... Diosmanta mañakorqa, Diostaj mana manchachikunanpaj yanaparqa. Jesusqa Pedrotapis kinsa kutita nerqa rijchʼarisqa, wakichisqataj kananta. ¿Chayta kasorqachu?...

Pedroqa kinsantin kutipi puñurparerqa. Mana Diosmanta mañakorqachu, nitaj rijchʼarisqachu karqa. Chayrayku Pedroqa  Jesusta japʼishajtinku mana wakichisqachu kasharqa. Juzgashajtinkutaj mancharikorqa. Imajtinchus rikorqa Jesusta maqasqankuta, wañuchiyta munasqankuta ima. Chantá, ¿yuyarikunkichu imatachus Jesús apostolesninman nisqanta?... Paykunaman nerqa, pay jinallataj kay pachapi chejnisqa kanankuta.

¿Imapitaj Pedro jina rikukusunman? Kaypi tʼukuriy: Cursoykipi kashajtiyki, compañerosniyki rimayta qallarinku himno nacionalta mana takejkunamanta chayri cumpleañosta mana ruwajkunamanta.  Jinallapi ujnin, tapusunkiman: “¿Ciertochu mana himno nacionalta takinki?”, nispa. Chayri, “¿nichu cumpleañosta ruwanki?”, nispa. “Arí, mana chayta ruwanichu” niyta, ¿manchachikuwajchu?... ¿Pedro jinachu llullakuyta munawaj?...

Pedroqa Jesusta mana rejsinichu nisqanmanta mayta llakikorqa. Pantasqanta reparakuytawantaj, jawaman llojsispa waqarikorqa. Arí, Pedroqa pesachikorqa, Jesuspa yachachisqallanpunitaj karqa (Lucas 22:32). ¿Imataj yanapawasunman mana Pedro jinachu manchachikunapaj?... Pedroqa Diosmanta mana mañakorqachu, nitaj rijchʼarisqachu karqa. Noqanchejrí, ¿imatá ruwana tiyan Jesuspa yachachisqan kanapaj?...

Jehovamanta yanapata mañakuna. Diosmanta Jesús mañakojtin, ¿imatataj Dios ruwarqa?... Uj angelta kacharqa kallpachananpaj (Lucas 22:43). ¿Noqanchejta ángeles yanapawasunmanchu?... Biblia nin: “Diospa angelnenqa Diosta manchachikojkunaj muyuyninkupi jaraykukuspa, paykunata jarkʼakun”, nispa (Salmo 34:7). Jinapis Jehová yanapanawanchejpajqa, mana mañakunallachu. ¿Yachankichu imatawanchus ruwana kasqanta?... Jesusqa yachachisqasninta nerqa rijchʼarisqas, wakichisqastaj kanankuta. ¿Imaynatá chayta ruwasunman?...

Tantakuykunapi yachakusqanchejta, Bibliapi leesqanchejta ima kasukuna. Chantapis Diosta sirvinallapajpuni mana saykʼuspa mañakuna. Chayta ruwasun chayqa, mana manchachikunapaj Jehová yanapawasun. Ajinamanta Sumaj Yachachej Jesusmanta, Tatanmanta ima wajkunaman willarispa kusikusun.