¿IMAYKITAPIS suwasorqankuchu?... ¿LIakikorqankichu?... Chayta ruwasojqa suwa karqa. Tukuytaj suwasta chejnikunchej. ¿Imaynapí uj runa suwaman tukun? ¿Suwapunichu nacekun?...

Kay libroj 23 yachaqananpi, juchayoj nacekusqanchejta yachakorqanchej. Chayrayku tukuyninchej pantaj runas kanchej. Nitaj pipis suwachu nacekun. Uj suwaqa allin familiamanta kanman. Tatan, maman, hermanosninpis, mana suwaschu kankuman. Uj runaqa ashkha qolqeyoj, tukuy imayojtaj kayta munasqanrayku suwaman tukunman.

¿Pitaj ñaupaj kutirayku suwakorqa?... Tʼukurina. Jesusqa chay suwata cielopi rejserqa. Chay suwaqa uj ángel karqa. Diosqa tukuy angelesta mana juchayojta ruwarqa. Chantá, ¿imaynamantá chay ángel suwaman tukorqa?... Pusaj yachaqanapi yachakorqanchej jina, chay angelqa wajpa kapuyninta munapayarqa. ¿Yuyarikunkichu imatachus munapayasqanta?...

Dios ñaupaj qharita, ñaupaj warmitawan ruwarqa. Chay angeltaj paykunawan yupaychachikuyta munarqa. Yachanchej jina, Dioslla yupaychasqa kanan tiyan. Chay angeltajrí Adanwan Evawan yupaychachikorqa. Ajinamanta suwaman tukorqa, Kuraj Supay Satanasmantaj.

¿Imaynamantá uj runa suwaman tukun?... Wajpa kapuyninta munapayasqanrayku. Chay sajra munayqa, kʼacha runastapis juchaman apan. Wakin suwasqa ni jaykʼaj pesachikunkuchu, nitaj  mañankutapis qonqankuchu. Ajina karqa Judas Iscariotewan. Payqa Jesuspa ujnin apostolnin karqa.

Judasqa suwakuy jucha kasqanta yacharqa. Diospa Leyninta wawamantapacha rejserqa. Yachallarqataj Diosqa cielomanta parlamuspa, llajtanman kamachisqanta: “Ama suwakunkichu”, nispa (Éxodo 20:15). Judasqa jatunña kaspa, Sumaj Yachachej Jesusta rejserqa, yachachisqanmantaj tukorqa. Aswan qhepaman, Jesusqa payta ajllarqa 12 apostolesninmanta kananpaj.

Jesuswan apostolesninwanqa khuska viajaj kanku, khuskataj mikhoj kanku. Qolqenkutaqa uj cajallapi waqaychaj kanku. Jesustaj chay cajata Judasman japʼicherqa. Chay qolqeqa mana Judaspatachu karqa. Judasrí, ¿imatá chay qolqewan ruwarqa?...

Judasqa qolqeta chʼinllamanta orqhoyta qallarerqa. Chaytaqa ni pí rikushajtin ruwaj. Astawanrajtaj japʼiyta munarqapis. Yuyaynenqa qolqellapi kasharqa. Chay sajra munaynin imamanchus apasqanta qhawarina. Chaytaj karqa Jesusta wañuchinankupaj pisi pʼunchaykuna kashajtin.

Jesuspa ujnin amigonqa Lázaro karqa. Lazaroj hermanan Mariaqa, valorniyoj perfumewan Jesuspa chakisninta jawerqa. Judastaj chayta mana allinpajchu qhawarqa. ¿Yachankichu imaraykuchus?... Judas nerqa: ‘¿Imaraykutaj chay perfume mana vendekorqachu? Chay qolqeqa wajchasman qosqa kanman karqa’, nispa. Judasqa chayta nisharqa, mana wajchasta khuyakusqanraykuchu. Manaqa suwakunanpaj astawan qolqe kananta munasqanrayku (Juan 12:1-6).

Jesusqa Judasman nerqa María kʼacha kasqanta, amataj jarkʼananta. Judasrí chay nisqanmanta phiñarikuspa, kuraj sacerdotesman rerqa. Paykunaqa Jesuspa enemigosnin karqanku, presochaytataj  munarqanku. Mana piwanpis rikuchikunankupajtaj tuta japʼichiyta munarqanku.

Judasqa sacerdotesman nerqa: ‘Qolqeta qowajtiykichejqa Jesusta japʼinaykichejpaj yanapaykichejman. ¿Mashkhatataj qowankichejman?’, nispa.

Paykunataj nerqanku: “Kinsa chunka qolqeta qosqayku”, nispa (Mateo 26:14-16).

Judasqa chay qolqeta japʼikorqa. Chayta ruwasqanwantaj Jesusta vendeykushanmanpis jina karqa. Chay ruwasqan sajrapuni karqa, ¿icharí?... Qolqeta suwakuyman yachaykukojqa, chay jina sajra imasta ruwan. Runasta, Diosta ima munakunanmantaqa, qolqeta astawan munakun.

Ichapis qan ninki: “Noqaqa ni jaykʼaj imatapis Jehovamanta nisqa astawan munakusajchu”, nispa. Chay yuyasqaykeqa sumaj. Judaspis ichá ajinallatataj yuyarqa Jesús payta, apostolnin kananpaj ajllashajtin. Waj runaspis niraj suwaman tukushaspa, ichá kikillantataj yuyarqanku. Wakinmanta parlarina.

Ujnenqa Diospa kamachin Achán karqa.  Payqa unay tiempopi kausarqa, niraj Jesús nacekushajtin. Uj kuti, Achanqa uj kʼachitu mantata rikorqa, qolqeta, qoritawan. Chaykunaqa mana paypatachu karqa. Biblia nisqanman jina, chay imastaqa Diospa llajtan enemigosninmanta qhechorqa, chayraykutaj Jehovapaj tʼaqasqa karqa. Achantajrí chay imasta anchatapuni munapayasqanrayku suwakorqa (Josué 6:19; 7:11, 20-22).

Kunanqa Davidmanta parlarina. Jehovaqa payta Israelpi rey kananpaj ajllarqa. Uj pʼunchay, Davidqa uj kʼachita warmita rikorqa. Payqa Betsabé sutikorqa. Davidqa payta qhawallarqapuni, munarqataj wasinman pusakapuyta. Betsabetajrí Uriaspa warmin karqa. ¿Imatataj David ruwanan karqa?...

 Davidqa Betsabeta qonqanan kajtinpis, paypi yuyallarqapuni. Chayrayku Betsabeta wasinman pusachimorqa, Uriastataj wañuchicherqa. ¿Imaraykutaj David chay sajra imasta ruwarqa?... Waj runaj warminta munapayasqanrayku (2 Samuel 11:2-27).

David pesachikusqanrayku, Jehovaqa mana wañucherqachu. Jinapis chaymantapacha ashkha llakiykuna qhatirerqa. Wawan Absalonqa, cuentanmanta rey kayta munarqa. Chayrayku Absalonqa pillapis Davidta maskʼaj rejtin ojllaykoj, muchʼaykojtaj. Biblia nin jina Absalonqa “tukuy israelitaspa sonqonkuta suwarqa”. Chayraykutaj runasqa, Davidpa cuentanmanta payta churayta munarqanku rey kananpaj (2 Samuel 15:1-12).

Qanpis Achán jina, David jina, Absalón jina, ¿imatapis mayta munarqankichu?... Imatachus munasqayki wajpata kajtin, chayta chʼinllamanta oqharikuspaqa suwakushanki. ¿Yuyarikunkichu ñaupaj suwa Satanás imatachus munapayasqanta?... Payqa Diospa cuentanmanta yupaychachikuyta munarqa. Adanwan Evawan kasuchikuspataj, suwaman tukorqa.

Dueñoqa imallantapis mañariyta atin. Waj wawaspa wasinkuman pujllaj rejtiyki, ¿allinchu kanman imallankutapis apakanpunayki?... Mana. Tatan chayri maman mañarisojtillan apamuyta atiwaj. Imatapis chʼinllamanta apamuspaqa suwakushanki.

¿Imataj tanqasunkiman suwakunaykipaj?... Wajpa kapuyninta munapayay. Suwakushajtiyki ni pí rikusojtinpis, ¿pitaj rikushasunki?... Jehová Dios. Paytaj suwakuyta chejnikun. Chayrayku Diosta, runa masiykita ima munakuspaqa, mana suwakunkichu.