Jehovap ruwasqan angelesqa tukuyninku kʼachas karqanku, chaymanta juknin saqraman tukurqa. Chaytaq Kuraq Supay Satanás kachkan. Satanasqa, runas Jehovata yupaychanankumanta nisqaqa, payta yupaychanankuta munarqa. Kaymanta astawan sutʼincharina.

Edén huertapiqa, tukuy laya sachʼas miskʼi puquykunasniyuq karqa. Jehovataq, Adanta, Evatawan, tukuy sachʼaspa puquyninmanta mikhunankuta nirqa. Chaywanpis mana wañunankupaq juk sachʼap puquynillanta, mana mikhunankuta nirqa (Génesis 2:9, 16, 17).

Juk pʼunchay Eva, Edén huertapi sapallan kachkaptin, juk katari parlapayarqa. Chaywanpis mana kataripunichu parlachkarqa, manaqa Satanaslla katariniqta parlapayarqa. Nirqataq, kay sachʼap puquyninta mikhunki chayqa Diosjina kanki, nitaq wañunkichu, nispa. Kay nisqantaq llulla karqa. Evaqa, Satanaspa nisqanta japʼikuspa, chay sachʼap puquyninta mikhuykurqa, Adanman quptintaq, paypis mikhuykullarqataq (Génesis 3:1-6).

Satanás, Evata chʼawkiyasqanrayku, llulla kasqanta yachanchik. Imaptinchus Evata nirqa: ‘Diosta mana kasunkichu chayqa mana wañunkichu’, nispa. Chaytaq llulla karqa, imaraykuchus Evaqa wañurqa, Adanpis wañullarqataq. Satanás juchallikusqanrayku chay kutipi mana wañuspapis, aswan qhipaman wañunqa. Kunankama Satanasqa llullakuspa, runasta, Diospa nisqanta pʼakinankupaq pantachichkallanpuni (Juan 8:44).

Aswan qhipamantaq wakin angelesqa saqraman tukullarqankutaq. Paykunataq kay Jallpʼapi warmista rikuspa, paykunawan qhariwarmijina puñuykuyta munaspa, runaman tukuspa uraykamurqanku, jinamanta chay warmiswan tiyakuyta qallarirqanku. Kay ruwasqankutaq mana Diospa munayninmanjinachu karqa (Génesis 6:1, 2; Judas 6).

Kaytaq juk jatun chʼampayta rikhurichirqa. Warmisqa kay saqra angelespaq wawasniyuq karqanku, chay wawasninkutaq jatuchaq, saqras, jukjinas ima, karqanku. Tiempo pasasqanmanjinataq Jallpʼaqa maqanakuymanta, saqra runasmanta ima, juntʼa karqa, chayrayku Jehová, saqra runasta jatun parawan chinkachinanta nirqa. Chay Jatun Paramantataq chiqa sunqu Noé, familian ima salvakurqanku (Génesis 6:4, 11; 7:23).

Chaywanpis saqra angelesqa, espiritusjina janaqpachaman kutipurqanku, manataq wañurqankuchu. Chantá castisgasqas karqanku. Diosqa, manaña chiqan kaqta ruwaq angeleswan kanankuta, nitaq watiqmanta runaman tukunankutapis saqirqachu. Kay angelestaq jatun juicio pʼunchaypi wañunqanku (Judas 6).

Kay 1914 watapi, janaqpachapi juk maqanaku karqa. Apocalipsis librotaq kayta sutʼinchan:  “Chaymanta jatun wañuchinaku maqanaku janaj pachapi karqa. Arcangel Miguelqa [kawsarimuq Jesucristo], [kʼacha] angelesnin ima sierpewan [Satanaswan] maqanakorqanku. Sierpepis sajra angelesninwan Miguelpa contranta maqanakullarqankutaj. Manapuni Miguelta atiparqankuchu, janaj pachapitaj sierpewan, angelesninwan mana qhepakuyta aterqankuchu. Chay jatun sierpe jawaman wijchʼusqa karqa; chayqa chay unay ñawpa katari, pichus sutichasqa Kuraj Supay, Satanastaj. Payqa llullakuspa kay pachapi kaj chhika runasta pantachin. Payta, sajra angelesnintawan kay pachaman wijchʼumorqanku”.

¿Imapitaq tukurqa? Biblia nillanpuni: “Chayrayku kusikuychej janaj pachakuna, chaypi tiyakojkunapis”. Kʼacha angelesqa, Satanás, supaykuna ima, manaña janaqpachapi kasqankumanta kusikurqanku. Chaywanpis, ¿imastaq kay Jallpʼapi, runaspaq kanan karqa? Biblia nin: “Ay, kay pacha jallpʼa patapi, mama qocha patapipis tiyakojkunamanta, imaraykuchus Kuraj Supayqa manchay phiñasqa qankunaman uraykʼamun, yachaspa paypaj pisi tiempollaña kasqanta”, nispa (Apocalipsis 12:7-9, 12).

Satanás, saqra angelesnin ima, kay Pachapi runasta tukuy imaymanamanta ñakʼarichichkanku. Kay saqra angelestataq supaykuna nispa sutichakun. Paykunataq Diospa enemigosnin kanku.