¡Espiritusqa kankupuni! Espiritusqa ángeles kanku, wakintaq saqras, wakintaq mana. ¿Kay espíritus ñawpaqta runaschu karqanku?

¡Mana! Wañupuqkunaqa, mana maypichus espíritus kachkanku chaymanchu rinku. ¿Imaynatá kayta yachanchik? Biblia nisqanrayku. Bibliaqa, Jehová Diospa yuyaychasqan kasqanrayku chiqata nin. Jehovaqa runata ruwasqanrayku, juk runa wañupuspa imanakusqantachus yachan (Salmo 83:18, NM; 2 Timoteo 3:16).

Bibliaqa, Dios, Adanta “ñutʼu jallpʼamanta” ruwasqanta nin (Génesis 2:7). Juk Paraisoman churasqanta ima. Adanchus Jehovap kamachisqanta kasunman karqa chayqa, mana wañunmanchu karqa, kunankamataq kawsachkallanmanpuni karqa. Adán yachachkaspa juchallikusqanrayku, Jehová payta nirqa: “Jallpʼamanta ruwasqa kanki. Jallpʼa kanki, jallpʼallamantaj kutinki”, nispa (Génesis 3:19).

¿Imatá chay ninayan? Dios, niraq ñutʼu jallpʼamanta ruwachkaptin, ¿maypitaq Adán kachkarqa? Mana maypipis kachkarqachu, nitaq juk angelchu karqa. Jehovaqa, Adanta ‘ñutʼu jallpʼaman’, tukunki nispaqa, wañunanta nichkarqa. Wañupuspataq Adanqa, mana espiritumanchu tukurqa, manaqa chinkapurqa. Wañuyqa manaña kawsaniyuq kay ninayan.

Chaywanpis, ¿imatá wak wañupuqkunamanta nisunman? ¿Paykunapis chinkapunkuchu?  Biblia kay tapuykunaman kutichin.

• “Tukuyninku [runas, uywas ima] uj cheqallaman rinku: jallpʼamanta ruwasqa kasqankurayku, jallpʼallamantaj tukunku.” (Eclesiastés 3:20.)

• “Wañusqasrí [...] mana imatapis yachankuchu.” (Eclesiastés 9:5.)

• “Tukukapullantaj munakuyninku, chejninakuyninku, envidiakuyninku ima.” (Eclesiastés 9:6.)

• “Wañuspa maymanchus rinki chaypeqa manaña ima ruwanapis kanchu, ni yuyanapis, ni yachana, nitaq yachaypis.” (Eclesiastés 9:10, Qheshwa Biblia.)

• “[Runasqa] jallpʼamantaj tukupunku; chaypacha yuyayninkupi tukuy wakichikusqanku chinkapun.” (Salmo 146:4.)

¿Manachu Bibliap nisqanta creeyta atillanki? Jina kaptin kaypi tʼukuriy: Familiapiqa,  qusa llamkʼan familianta uywananpaq. Pay wañupuptintaq familianqa llakiypi qhipakun, wakin kutitaq ni mikhunallankupaqpis kapunchu. Ichá wañupuqpaq enemigosninqa familianta ñakʼarichinkuman. Tapurikuy: ‘Chay wañupuq runa, espiritujina kawsachkanman chayqa, ¿imaraykutaq mana familianta yanapachkallanpunichu? ¿Imaraykutaq familianta mana saqra runasmanta jarkʼanchu?’, Bibliap yachachisqan chiqa kasqanrayku. Bibliaqa, wañupuq mana kawsachkasqanta, nitaq imatapis ruwayta atisqanta nin (Salmo 115:17).

¿Kaytaq ninayanchu wañupuqkuna ni jaykʼaq kawsarimunankuta? Mana. Kaymantaqa astawan ñawpaqman sutʼinchakunqa. Chaywanpis, wañupuqkunaqa, qam imatachus ruwasqaykita mana yachankuchu nitaq uyarisunkumanchu, nitaq rikusunkumanchu, nitaq parlapayasunkumanchu. Arí, paykunaqa mana yanapasunkumanchu nitaq ñakʼarichisunkumanchu, chayrayku ama manchachikuychu (Eclesiastés 9:4; Isaías 26:14).