LECCIÓN 03
¿Bibliaj nisqanpi creesunmanchu?
Bibliaqa sumaj imas kananmanta parlan. Sumajta kausakunapajpis yanapawanchej. Ichá qanpis imamantachus Biblia parlasqanta yachayta munanki. Jinapis ichá ninki: “Bibliaqa runaj ruwasqallan”, nispa. Chayrí ninki: “Bibliaqa may unayniyoj ni yanapawasunmanchu”, nispa. Chayrayku ichá ni creenkichu Biblia yanapayta atiwasqanchejta. Ichá nillataj creenkichu allin kausaymanta parlasqantapis. Jinapis may chhika runas Bibliaj nisqanpi creenku. Qanrí, ¿imaynatá yachawaj Bibliaj nisqan cheqachus manachus kasqanta? Chayta kay leccionpi yachakusun.
1. ¿Biblia imasmantachus parlasqanqa karqapunichu?
Biblia imasmantachus parlasqanqa karqapuni. Pikunamantachus parlan chay runaspis kausarqankupuni (Lucas 1:3; 3:1, 2 leey). Yachayniyoj runas imastachus tarisqanku chayta rikuchiwanchej. Biblia ima fechasmantachus, pikunamantachus, ima lugaresmantachus, imachus kasqanmantapis parlasqanqa karqapuni. Chayrayku Bibliaqa ‘cheqan palabrasniyoj maychus kajtaj qhelqasqaʼ kashan (Eclesiastés 12:10).
2. Biblia may unayniyojña kajtinpis, ¿atienekunapaj jinachu?
Bibliaqa imamanta parlaspapis mana pantanchu. Imastachus yachayniyoj runas kunan yachanku, chaymantapis Bibliaqa unayña parlarqa. Chay tiempomanta runastaj niraj chay imasta entienderqankuchu. Chayrayku kay tiempomanta wakin cientificospis, Bibliaqa mana pantasqanta ninku. Bibliaqa ‘atienekunapaj jina kunanpis wiñaypajpis’ (Salmo 111:7, 8).
3. ¿Biblia allin kausaymanta parlasqan juntʼakonqapunichu?
Biblia ñaupa tiempopi imaschus kananta willasqanqa juntʼakorqapuni. Kay tiempopi imaschus kananta nisqanpis juntʼakushallantaj. Bibliaqa unaymantapachaña willan, “imaschus manaraj ruwakunchu chay imasta” (Isaías 46:10). Chay willasqantaj profecías a sutikun. Kay leccionpeqa wakin profeciasmanta yachakunki, imaynatachus chay profecías juntʼakusqantapis. Chayta yachayqa mayta tʼukuchisonqa.
ASTAWAN YACHAKUNA
Kaypi yachakusun Bibliaj nisqanwan yachayniyoj runaspa nisqankuwan mana churanakusqanta. Yachakullasuntaj imaynatachus Bibliaj wakin profeciasnin juntʼakusqanta.
4. Bibliaqa cientificospa nisqankuwan mana churanakunchu
Unay tiempomanta runasqa yuyaj kanku kay jallpʼanchej jatun animalespa patanpi kashasqanta. Ajinachus manachus kasqanta yachanapaj VIDEOTA qhawariychej.
Imatachus Job libro nisqanta qhawarina. Chay libroqa 3.500 watas ñaupajta qhelqakorqa. Job 26:7 leeriychej, chantá yachakojta tapuriy:
-
¿Imatá Biblia jallpʼanchejmanta nishan? Jallpʼanchej ‘mana imallaman warkhusqa’ kasqanqa mayta tʼukuchiwanchej, ¿icharí?
Bibliaqa unayña maymantachus yakus jamusqanta sutʼincharqa. Chayta científicos entiendesqankumantaqa 200 watasllaraj pasan. Job 36:27, 28 leeriychej, chantá yachakojta tapuriy:
-
Biblia yakumanta imatachus nisqan, ¿imataj astawan tʼukuchisunki?
-
Bibliapi imasmantachus leerisqanchej, ¿yanapawanchejchu Bibliapi astawan creenapaj?
5. Biblia imaschus kananta nisqanqa juntʼakorqa
Isaías 44:27–45:2 leeriychej, chantá VIDEOTA qhawariychej. Chaymantataj yachakojta tapuriy:
-
200 watas ñaupajtaña, ¿imastataj Biblia nisqa Babilonia llajtamanta?
Yachayniyoj runas nisqankuman jina Persia llajtamanta kamachej Ciroqa, 539 watapi Jesús niraj jamushajtin Babilonia llajtata japʼikaporqa. Paywan soldadosninwanqa llajtaj muyuyninpi kaj yakusta pisiyacherqanku. Chay llajtatataj mana maqanakuspalla japʼikaporqanku. Imaraykuchus babiloniosqa punkuta kichasqallata saqerparisqanku. Chaymantapacha 2.500 watasmanta astawanña pasan. Kunankamataj Babilonia llajtaqa rumi montonllapuni kashan. Imatawanchus Biblia nisqanta qhawarina.
Isaías 13:19, 20 leeriychej, chantá yachakojta tapuriy:
-
¿Kay versiculospi nisqanman jinapunichu Babilonia llajtawan kasqa?
Babiloniaqa kay tiempopi rumi montonllaña kashan. Chaytaj Irak suyupi kashan.
6. Bibliaqa imastachus rikunanchejta willarqaña
Bibliaqa kay tiemponchejta ‘qhepa pʼunchaykuna’ nispa sutichan (2 Timoteo 3:1). Qhawarina imastachus kay tiemponchejmanta nisqanta.
Mateo 24:6, 7 leeriychej, chantá yachakojta tapuriy:
-
¿Kay versiculospi imas kanantataj nisqa?
2 Timoteo 3:1-5 leeriychej, chantá yachakojta tapuriy:
-
Kay leerisqanchejman jina, ¿imaynataj kay tiempopi runas kananku kasqa?
-
¿Ajinapunitajchu runas kay tiempopi kanku?
WAKIN RUNAS NINKU: “Bibliaj nisqanqa cuentolla”, nispa.
-
Qanrí, ¿imatá yuyanki? Bibliaj nisqan, ¿uj cuentollachu kanman chayri atienekunapaj jinachu kanman?
¿IMASTÁ YACHAKUNCHEJ?
Kaypi yachakunchej Biblia imasmantachus parlasqanqa kasqantapuni, profeciasninpis juntʼakusqantapuni. Chantá yachakunchej Bibliaj nisqanqa yachayniyoj runaspa nisqankuwan mana churanakusqanta. Chayrayku Bibliaj nisqanqa creenapaj jinapuni.
Yuyarikunapaj
-
¿Bibliaj nisqan creenapaj jinachu?
-
¿Bibliaj nisqanwan cientificospa nisqankuwan churanakunchu?
-
¿Biblia willanchu imaschus qhepaman kananta? ¿Imas kanantataj willasqaña?
ASTAWAN YACHAKUNAYKIPAJ
¿Bibliaj nisqan yachayniyoj runaspa nisqankuwan churanakunchu? Chayta yachanaykipaj kayta leeriy.
¿Imastaj rikuchiwanchej tukukuy pʼunchaykunapi kausashasqanchejta? Chayta yachanaykipaj kayta leeriy.
“Bibliap suqta profeciasnin juntʼakuchkan” (Torremanta Qhawaj, 1 de julio de 2011)
Imatachus Biblia Grecia suyumanta nisqanta, imaynatachus chay nisqan juntʼakusqantapis yachanaykipaj kay videota qhawariy.
“Diospa tukuy ima nisqan” juntʼakusqanta yachayqa kallpachawanchej (5:22)
Uj runaqa Bibliaj profeciasnin juntʼakusqanta yachaspa Bibliapi astawan creerqa. Chaymanta astawan yachanaykipaj kayta leeriy.
a Profecías ninchej imastachus Dios ñaupajmantaña willachin chayta.
Kaykunatapis qhawaykurillawajtaj
¿IMATÁ TAPUKUNKU JEHOVAJ TESTIGOSNINMANTA?
¿Imaynatá Jehovaj testigosnin Bibliamanta yachachinku?
Jehovaj testigosnenqa, gratis Bibliamanta yachachiyku, qanpis gustasusqan Bibliawan yachakuyta atiwaj. Chantapis familiaykita, amigosniykitapis invitariwaj qanwan khuska yachakunankupaj.
