JEHOVAQA, profetasninman Qhispichiq Mesiasmanta tukuy imata willarqa. Kunantaq profetaspa qillqasqankuta ñawirispa pichus Mesías kasqanta yachasunman, imaraykuchus paykunaqa Mesías paqarikunanmanta, ruwananmanta,  wañunanmanta ima willarqanku. Tukuy chay parlasqankuqa tʼukunapaqjina Jesucristopi juntʼakurqa. Rikunapaq imaynatachus profecías Jesucristopi juntʼakusqanta, Jesús paqarikusqanmanta, wawitallaraq kachkaptin imachus pasasqanmanta ima qhawarisunchik.

Profeta Isaiasqa, Mesías Davidpa ayllunmanta jamunanta nirqa (Isaías 9:7). Chay ayllumantataq Jesús jamurqa (Mateo 1:1, 6-17).

 Diospa profetan Miqueasqa, ‘Efratamanta Belenpi’ Mesías paqarikunanta, chantá aswan qhipaman kamachiq kananta nirqa (Miqueas 5:2). Chay tiempopi iskay llaqta Belén sutiyuq karqa. Jukninqa Nazaretpa qayllanpi kachkarqa, juknintaq Judá suyupi, Jerusalenpa qayllanpi kachkarqa. ¿Maypitaq Mesías paqarikurqarí? Judá suyupi Jerusalenpa qayllanpi kaqtaqa Efratamanta Belén niq kanku. Chaypitaq Jesús paqarikurqa, jinamanta profeta Miqueaspa profecianqa juntʼakurqa (Mateo 2:1).

Wak profeciapi Dios, ‘Egiptomanta churinta waqyananta’ willakurqa. Biblia nisqanmanjina kay profecía juntʼakurqa. Jesuspa tatasninqa, paywan khuska Egiptoman ayqirqanku, chaypitaq Herodes wañunankama kamurqanku, chaymantataq Egiptomanta lluqsispa llaqtankuman kutipurqanku (Oseas 11:1; Mateo 2:15).

Kay libropi 200 paginapi, “ Profecía” nisqata qhawanki, chay chiqanpitaq, Mesiasmanta profeciasta tarinki. Pʼitikunata maskʼaspa “Juntʼakusqan” pʼitikunawan kikinchay. Jinamanta Bibliap willasqan chiqan kasqanta yachakunki.

Kay Bibliamanta pʼitikunaqa, manaraq Jesucristo paqarikuchkaptin qillqakurqa. Jesusllataq jinata nirqa: “Nerqaykichejña juntʼakunampuni kasqanta noqamanta chay tukuy, qhelqasqa kaj Moisespa leynimpi, profetaspa qhelqasqankupi, salmospi ima”, nispa (Lucas 24:44). Jinamanta Bibliaykipi tukuy profecías juntʼakusqanta rikunki.